02-Sep-2025

ତୁଷୁରାରୁ ପଞ୍ଚାନନ ନାଏକଙ୍କ ରିପୋର୍ଟ

 ବଲାଙ୍ଗୀର ଜିଲ୍ଲା ଗୁଡଭେଲା ବ୍ଲକ ହେଉଛି ଗୋଟିଏ ପଛୁଆ ବ୍ଲକ।  ପଛୁଆ ବ୍ଲକ ମାନଙ୍କର ଶିକ୍ଷା ବ୍ୟବସ୍ଥା ସୃଦୃଢ଼ କରିବା ପାଇଁ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି, କିନ୍ତୁ ଗୁଡଭେଲା ବ୍ଲକ ରେ ତାର ଓଲଟା ଚିତ୍ର ଦେଖିବାକୁ ମିଳୁଛି ।

        ■■◇◇◇◇■■◇◇◇◇■■

ବଲାଙ୍ଗୀର ଜିଲ୍ଲା ଗୁଡ଼ଭେଲା  ବ୍ଲକରେ ଶିକ୍ଷା ବ୍ୟବସ୍ଥା ଆଗକୁ ଯିବା ପରିବର୍ତ୍ତେ ଆହୁରି ୧୦ ବର୍ଷ ତଳକୁ ଯାଇଥିବା ମନେ ହେଉଛି। ୨ ବର୍ଷ ତଳେ ଶିକ୍ଷା ବ୍ୟବସ୍ଥା ସୁଧାରିବାକୁ ସେ ସମୟର ବ୍ଲକ ଶିକ୍ଷା ଅଧିକାରୀ ରୁଷିଆ ମେହେର ଅଣ୍ଟା ଭିଡିଥିଲେ ଏବଂ ସଫଳ ମଧ୍ୟ ହୋଇଥିଲେ। ପ୍ରତ୍ୟେକ ଦିନ ୧୦ ରୁ ୪ ଟା ସମୟ ପର୍ଯ୍ୟନ୍ତ ପୁରା ପୁରି ବ୍ଲକ ସାରା ବିଦ୍ୟାଳୟ ମାନଙ୍କୁ ପରିଦର୍ଶନ କରି ଅମାନିଆ ଶିକ୍ଷକ ମାନଙ୍କୁ ସାବାଡ କରିଥିଲେ। କିନ୍ତୁ ୨୦୨୪ ରେ ରୁଷିଆ ମେହେରଙ୍କୁ ବଦଲି କରିଦିଆଗଲା। ଏବଂ ତାଙ୍କ ସ୍ଥାନରେ ନମିତାରାଣୀ ଭୋଇ ଶିକ୍ଷା ଅଧିକାରୀ ଭାବରେ ଯୋଗଦାନ କଲେ। ପୂର୍ବତନ ଶିକ୍ଷା ଅଧିକାରୀଙ୍କ ପରି ବର୍ତ୍ତମାନର ଶିକ୍ଷା ଅଧିକାରୀଙ୍କ ଦବଦବା ଦେଖିବାକୁ ମିଳୁନାହିଁ ଯାହା ଫଳରେ କିଛି ଅମାନିଆ ଶିକ୍ଷକ ଶିକ୍ଷୟିତ୍ରୀ ମାନେ ପୁଣି ମନଇଛା ବିଦ୍ୟାଳୟ ମାନଙ୍କୁ ଯାଉଥିବା ଦେଖିବାକୁ ମିଳୁଛି। ସରକାର ବିଦ୍ୟାଳୟ ମାନଙ୍କରେ ୯.୩୦ ସୁଦ୍ଧା ସମସ୍ତ ଶିକ୍ଷକ ପହଞ୍ଚିବା ପାଇଁ ଆଦେଶ କରିଥିଲେ ମଧ୍ୟ କିଛି ୧୦ ଟା ପରେ ବିଦ୍ୟାଳୟକୁ ଯାଉଥିବାର ଦୃଶ୍ୟ ଦେଖି ବୁଦ୍ଧିଜୀବୀ ଅସନ୍ତୋଷ ଜାହିର କରିଛନ୍ତି। ତୁରନ୍ତ ଜିଲ୍ଲା ଶିକ୍ଷା ବିଭାଗ ଅବହେଳିତ ଗୁଡଭେଲା ବ୍ଲକ ଶିକ୍ଷା ବ୍ୟବସ୍ଥା ସୃଦୃଢ଼ କରିବା ପାଇଁ ଚେଷ୍ଟା କରନ୍ତୁ ନ ହେଲେ ଆଗକୁ ରାଜରାସ୍ତାକୁ ଓହ୍ଲାଇବୁ ବୋଲି ପଶ୍ଚିମ ଓଡ଼ିଶା ସେବା ସଂଘ ସଭାପତି ରାଜେଶ ବଗର୍ତ୍ତି ଚେତାବନୀ ଦେଇଛନ୍ତି।