10-Aug-2025

ବଲାଙ୍ଗୀର(ଦେବାଶିଷ ବହିଦାର): ରାକ୍ଷୀପୂର୍ଣ୍ଣୀମା-ଭାଇଭଉଣୀଙ୍କ ଅମୂଲ୍ୟ ସମ୍ପର୍କ, ପ୍ରେମ ଓ ସୁରକ୍ଷାର ପବିତ୍ର ପ୍ରତୀକ। ଏହି ପାବନ ଅବସରକୁ ଅନନ୍ୟ ଭାବେ ପାଳନ କରିବା ପାଇଁ, ବଲାଙ୍ଗୀର ଜେଏସଏମ କଳା, ବିଜ୍ଞାନ ଓ ବାଣିଜ୍ୟ ମହାବିଦ୍ୟାଳୟର ଛାତ୍ରୀମାନେ ଏବଂ ଶିକ୍ଷୟତ୍ରୀମାନେ ୧୮୯ ବାଟାଲିୟନ ସିଆରପିଏଫ କ୍ୟାମ୍ପ ପରିସରକୁ ଯାଇ ସୈନିକମାନଙ୍କ ସହିତ ହୃଦୟସ୍ପର୍ଶୀ ରକ୍ଷାବନ୍ଧନ ପର୍ବ ପାଳନ କରିଛନ୍ତି  ।
ସାହସ ଓ ସମର୍ପଣର ପ୍ରତୀକ ସେହି ସୈନିକମାନଙ୍କ ହାତରେ ପ୍ରେମ ଓ କୃତଜ୍ଞତାର ରାକ୍ଷୀ ବାନ୍ଧି, ଭାଇ-ଭଉଣୀଙ୍କ ସୁରକ୍ଷାର ଅବିଚ୍ଛିନ୍ନ ବନ୍ଧନକୁ ସ୍ମରଣ କରାଇଛନ୍ତି । ପାରମ୍ପାରିକ ରୀତି-ରିବାଜ ସହିତ ହସ, ଆନନ୍ଦ ଓ ଭାବନାରେ ପରିପୂର୍ଣ୍ଣ ହୋଇ ଏହାକୁ ପଳନ କରିବା ସହିତ ଅନୁଷ୍ଠାନରେ କଲେଜ ଅଧ୍ୟକ୍ଷ ସିଏ ଶ୍ରୀକାନ୍ତ ଶର୍ମା ସମସ୍ତଙ୍କୁ ଶୁଭେଚ୍ଛା ଜଣାଇ, ଦେଶ ସୁରକ୍ଷାରେ ସୈନିକମାନଙ୍କ ଅଦମ୍ୟ ପ୍ରତିବଦ୍ଧତା ପ୍ରତି ଗଭୀର ସମ୍ମାନ ପ୍ରକାଶ କରିଥିଲେ।
ଏହି ଅବସରରେ ବାଟାଲିୟନ କମାଣ୍ଡାଣ୍ଟ ଶ୍ରୀ ପ୍ରଶାନ୍ତ କୁମାର ସାହୁ ଓ ଡେପୁଟି କମାଣ୍ଡାଣ୍ଟ ଶ୍ରୀ ସରୱାର ଖାନ ମଞ୍ଚାସୀନ ହୋଇ, ଛାତ୍ରୀମାନଙ୍କର ଏହି ସ୍ନେହମୟ ପ୍ରୟାସକୁ ସ୍ୱାଗତ କରିଥିଲେ।
ସମାଜ ଓ ସଶସ୍ତ୍ର ବାହିନୀ ମଧ୍ୟରେ ପ୍ରେମ, ଆଦର ଓ ସମ୍ମାନର ସେତୁ ଗଢ଼ିଥିବା ଏହି ରକ୍ଷାବନ୍ଧନ ଉତ୍ସବ, ମାନବୀୟ ସମ୍ବେଦନାର ସୁଗନ୍ଧରେ ପରିପୂର୍ଣ୍ଣ ହୋଇ ଦୀର୍ଘ ସ୍ମୃତିରେ ପରିପୂର୍ଣ୍ଣ ହୋଇଥିଲା ।