25-Jan-2021

ବଲାଙ୍ଗୀର (ସନ୍ତୋଷ କୁମାର ଠାକୁର) : ବଲାଙ୍ଗୀର ଜରାସିଂହା ଗାଁରେ ଡବଲ ମର୍ଡର ଘଟଣା । ମାମଲାରେ ପୋଲିସକୁ ମିଳିଛି ସଫଳତା। ହତ୍ୟା ଘଟଣାରେ ୪ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ। ଗାଁରେ ଏବେ ବି ଅଶାନ୍ତିର ବାତବାରଣ ରହିଛି । ସ୍ଥାନୀୟ ପ୍ରଶାସନ ପକ୍ଷରୁ  ଗାଁରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି ।

ଖବର ଅନୁଯାୟୀ, ଶନିବାର ଦିନ ମୁଗ କ୍ଷେତରେ ପାଣି ମଡ଼ାକୁ ନେଇ ବଲାଙ୍ଗୀର ଜରାସିଂହ ଗାଁରେ ଡବଲ ମର୍ଡର ହୋଇଥିଲା । ଶ୍ରୀପତି ନାମକ ଜଣେ ବ୍ୟକ୍ତି  ମୁଗ ବାଡିରେ ପାଣି ଦେବାକୁ ଯାଇ ପାଖରୁ ଜଣଙ୍କ ଠାରୁ ପମ୍ପ ମାଗି ଆଣିଥିଲେ। ଯାହାକୁ ନେଇ ଧନମତ ତାଙ୍କୁ ପମ୍ପ ମାଗିକି ଆଣିବା କଥା କହିବା ସହ ଦୁହିଁଙ୍କ ମଧ୍ୟରେ କଥା କଟାକଟି ହୋଇଥିଲା। ଏନେଇ ଉଭୟଙ୍କ ମଧ୍ୟରେ ମାରପିଟ ମଧ୍ୟ ହୋଇଥିଲା।
ଧନମତ ପାଖରେ ରଖିଥିବା ଗୋଟିଏ ଟାଙ୍ଗିଆ ସାହାଯ୍ୟରେ ଶ୍ରୀପତିଙ୍କୁ ଆକ୍ରମଣ କରିଥିଲେ। ଘଟଣାସ୍ଥଳରେ ଶ୍ରୀପତିଙ୍କ ମୃତ୍ୟୁ ହୋଇଥିଲା । ଏନେଇ ପାଖରେ ଥିବା ଶ୍ରୀପତିଙ୍କ ସମ୍ପର୍କୀୟ ମାନେ ଧନମତକୁ ଆକ୍ରମଣ କରିବା ସହ ଉଭୟଙ୍କ ମଧ୍ୟରେ ମାରପିଟ ହୋଇଥିଲା । ଏନେଇ ଅନ୍ୟ ଦୁଇ ଜଣ କର୍ମସୁନା ଓ ବ୍ରାହ୍ମାସୁନାଙ୍କ ହାତରେ ଟାଙ୍ଗିଆ ଚୋଟ ବାଜିଥିଲା। ଏଥିରେ ସେମାନେ ଗୁରୁତର ହୋଇଥିଲେ।
ଏହାପରେ ଧନମତଙ୍କ ଘରକୁ ଆସି ଶ୍ରୀପତିଙ୍କ ସମ୍ପର୍କିୟ ତାଙ୍କୁ ଗୋଟିଏ କାତି ସାହାଯ୍ୟରେ ଅତି ନିର୍ମମ ଭାବରେ ହାଣି ହତ୍ୟା କରିଥିଲେ । ତେବେ ଧନମତଙ୍କ ମୃତଦେହ ଶନିବାର ରାତିରୁ ୧୬ ଘଣ୍ଟା ପର୍ଯ୍ୟନ୍ତ ଗାଁରେ ପଡିରହିଥିବା ବେଳେ ରବିବାର ଉଭୟଙ୍କ ମୃତଦେହକୁ ବ୍ୟବଚ୍ଛେଦ କରାଯାଇଛି।  ଗାଁରେ ଶାନ୍ତି ସୃଙ୍ଖଳା ରକ୍ଷା କରିବା ପାଇଁ ୧ ପ୍ଲାଟୁନ ଫୋର୍ସ ମୂତୟନ କରାଯାଇଛି। ତେବେ ହତ୍ୟା ଘଟଣାରେ ୩୬ଘଣ୍ଟା ପରେ ୪ଜଣ ଅଭିଯୁକ୍ତଙ୍କୁ ଗିରଫ କରିଛି ପୋଲିସ ।