19-Jul-2025

ବଙ୍ଗୋମୁଣ୍ଡା/ସିନ୍ଧେକେଲା(ଅନୀଲ କୁମାର ତ୍ରିପାଠୀ):  ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ବ୍ଲକ ଅନ୍ତର୍ଗତ ଭୁସଲାଡ ପଞ୍ଚାୟତ ମୁଖ୍ୟାଳୟରେ ଥିବା ଭୀମଭୋଇ ଉଚ୍ଚ ବିଦ୍ୟାଳୟରେ ବହୁ ଦିନ ହେଲା ଶିକ୍ଷକ ଅଭାବ ରହିଅଛି। ବର୍ତ୍ତମାନ ସମୟରେ ମାତ୍ର ଦୁଇଜଣ ଶିକ୍ଷକ ନବମ ଓ ଦଶମ ଶ୍ରେଣୀକୁ ପାଠ ପଢ଼ାଉଛନ୍ତି। ଏମିତିରେ ଛାତ୍ରଛାତ୍ରୀଙ୍କ ପାଠପଢା ଯେ କିପରି ଚାଳିଥିବ ତାହା ସହଜରେ ଅନୁମେୟ। 
ତେବେ ଶିକ୍ଷା ବିଭାଗ ଏ ଉପରେ ନଜର ଦେଉନଥିବାରୁ ଛାତ୍ରଛାତ୍ରୀ ମାନଙ୍କ ପାଠପଢ଼ାରେ ବ୍ୟାଘାତ ସୃଷ୍ଟି ହେଉଛି। ତେଣୁ ଅଭିଭାବକ ମହଲରେ ବେଶ୍ ଅସନ୍ତୋଷ ଦେଖା ଦେଉଛି। ଏହାକୁ ନଜରରେ ରଖି ଭୁସଲାଡ ସରପଞ୍ଚ ଦୀପକ ଛୁରା ବଲାଙ୍ଗୀର ଜିଲ୍ଲା ଶିକ୍ଷାଧିକାରୀଙ୍କୁ ଖାଲିପଡ଼ିଥିବା ଶିକ୍ଷକ ପଦବୀ ପୂରଣ କରିବା ପାଇଁ ଲିଖିତ ଜଣାଇଛନ୍ତି। ଏହି ସମୟରେ ଏସଏମସି ସଭାପତି ନରେନ୍ଦ୍ର ଭୋଇ, ରଥ ବଗର୍ତ୍ତୀ, ଓ୍ବାର୍ଡ ସଭ୍ୟ ମନୋରଞ୍ଜନର ଭୋଇ ଓ ସନ୍ତୋଷ ଛୁରା ପ୍ରମୁଖ ଉପସ୍ଥିତ ଥିଲେ। ତେବେ ୧୫ ଦିନ ମଧ୍ୟରେ ସମସ୍ୟାର ସମାଧାନ କରାଯିବ ବୋଲି ଜିଲ୍ଲା ଶିକ୍ଷାଧିକାରୀ ପ୍ରତିଶ୍ରୁତି ଦେଇଥିବା ସରପଞ୍ଚ ଶ୍ରୀ ଛୁରା ସୁଚନା ଦେଇଛନ୍ତି।