13-Jul-2025

ବିନିକା(ହିମାଂଶୁ ଶେଖର ପୁଟେଲ)ବିନିକା ସହର ମୁଖ୍ୟ ରାସ୍ତା ପ୍ରଶସ୍ତିକରଣ ହେବାପରେ ଯୁଦ୍ଧକାଳୀନ ଭିତ୍ତିରେ କାମ ଚାଲୁ ରହିଛି। କାର୍ଯ୍ୟ ବିଳମ୍ବରେ ହେଲେ ମଧ୍ୟ ସମ୍ପୂର୍ଣ୍ଣ ହେବାକୁ ଯାଉଥିବାରୁ ରାସ୍ତାର ନବକଳେବରକୁ ନେଇ ଅଞ୍ଚଳର ଜନସାଧାରଣରେ ଖୁସିର ଲହରୀ ଖେଳିଯାଇଛି। ରାସ୍ତା ଚଉଡା ହେବା ସହିତ ଦୁର୍ଘଟଣାରୁ ତ୍ରାହି ପାଇବା ପାଇଁ ରାସ୍ତାରେ ଡିଭାଇଡର ଦିଆଯାଉଛି। ଏହା ଯୋଗୁଁ ଯାନବାହାନ ହେଉ କି ବାଇକ,ସାଇକଲ କିମ୍ବା ସାଧାରଣ ଲୋକେ ନିଜ ପଟରେ ଯିବାର ସୁବିଧା ପାଇ ପାରିବେ । ହେଲେ ଅତ୍ୟନ୍ତ ପରିତାପର ବିଷୟ ବିଭିନ୍ନ ଗୁରୁତ୍ତ୍ୱପୂର୍ଣ୍ଣ ଛକ ମାନଙ୍କରେ ଡିଭାଇଡର ଦେଇ ରାସ୍ତା ନଥିବାରୁ ଆର ପାରିକୁ ଯିବା ନେଇ ଲୋକେ ହଇରାଣ ହରକତ ଆଶଙ୍କା ରହିଛି।ଯାର ଜ୍ୱଳନ୍ତ ଉଦାହରଣ ହେଉଛି ।ବସଷ୍ଟାଣ୍ଡ ଠାରୁ ଥାନା ଛକର  ଦୂରତା ପ୍ରାୟ ଅଧ କିମି ହେବ ।ଏହି ଅଧ କିମି ରାସ୍ତାରେ ବସଷ୍ଟାଣ୍ଡ ପଟରୁ ବାମ ପଟରେ ବିଜୁ ମାର୍କେଟ କମ୍ପ୍ଲେକ୍ସ,ଟାଉନ ହଲ,ଦୁର୍ଗା ମନ୍ଦିର,ଆହାର କେନ୍ଦ୍ର,ଏନଏସି ଅଫିସ,ସହର ଭିତରକୁ ୨ଟି ରାସ୍ତା ରହିଛି ।ହେଲେ ଯେଉଁ ମାନେ ଏସବୁ ଉପରେ ନିର୍ଭର ସେମାନଙ୍କୁ ବସଷ୍ଟାଣ୍ଡ କିମ୍ବା ଥାନା ଛକ କୁ ଯାଇ ବୁଲିବାକୁ ପଡ଼ିବ ଯାହା ଫଳରେ ସେମାନେ ହଇରାଣ ହରକତ ହେବେ। ବିଶେଷ କରି ଆହାର ଖାଇବାକୁ ଆସୁଥିବା ସାଧାରଣ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ଦେଖିବାକୁ ମିଳିଛି ।ଦୁର୍ଘଟଣାକୁ ଏଡାଇବା ପାଇଁ ରାସ୍ତା ମଝିରେ ଡିଭାଇଡର ନିର୍ମାଣ ସ୍ବାଗତ ଯୋଗ୍ୟ ପଦକ୍ଷେପ ହେଲେ ସାଧାରଣ ଲୋକେ ଯେପରି ଏ ପଟରୁ ସେପଟକୁ ଯିବା ଆସିବାରେ  ଅସୁବିଧାର ସମ୍ମୁଖୀନ ନହେବେ ସେଥିପ୍ରତି ଗୁରୁତ୍ୱ ଦେବା ଆବଶ୍ୟକ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି।