05-May-2025

ବଲାଙ୍ଗୀର (ଦେବାଶିଷ ବହିଦାର)

ଗତ ମେ  ୨ ରୁ ୫ ତାରିଖ ପର୍ଯ୍ୟନ୍ତ ବିଶ୍ବାତ୍ମ ବିଦ୍ୟା ମନ୍ଦିର, ଆନନ୍ଦ ନିକେତନ, ବଲାଙ୍ଗିର ଠାରେ “ଶିକ୍ଷକ ପ୍ରଶିକ୍ଷଣ ଏବଂ ବ୍ୟକ୍ତିତ୍ବ ପରିମାର୍ଜନ ଶିବିର” ଅନୁଷ୍ଠିତ ହୋଇଥିଲା । ଏହି ଶିବିରର ଶୁଭଉଦ୍ଘାଟନ ପୂଜ୍ୟପାଦ ଶ୍ରୀ ସ୍ଵାମୀଜୀ ମହାରାଜଙ୍କ ଦ୍ଵାରା ହୋଇଥିଲା।

ଉକ୍ତ ଅବସରରେ ବିଶ୍ବାତ୍ମ ଚେତନା ପରିଷଦର ସାଧାରଣ ସମ୍ପାଦକ ତଥା ବିଦ୍ୟା ମନ୍ଦିରର ବଲାଙ୍ଗୀରର ସଭାପତି ସ୍ଵାମୀ ସତ୍ୟ ବେଦାନନ୍ଦ ସରସ୍ଵତୀ, ସମ୍ପାଦକ ନବୀନ କୁମାର ବେଦବାକ, ନିର୍ଦ୍ଦେଶିକା ମାଁ ଶ୍ରଦ୍ଧାମୂର୍ତ୍ତି ସରସ୍ବତୀ, ବିଶ୍ବାତ୍ମ ବିଦ୍ୟା ମନ୍ଦିର ଉଚ୍ଚ ମାଧ୍ୟମିକ ବିଦ୍ୟାଳୟର ପ୍ରାଚାର୍ଯ୍ୟ ଡଃ ସୁଶାନ୍ତ କୁମାର ପ୍ରଧାନ, ପ୍ରଧାନଆଚାର୍ଯ୍ୟ ତରୁଣ କୁମାର ତ୍ରିପାଠୀ ତଥା ପ୍ରଶିକ୍ଷଣ ଶିବିରର ସଂଯୋଜକ ଚନ୍ଦ୍ରକୁମାର ପୁରୋହିତ ସମସ୍ତ ପ୍ରଶିକ୍ଷାର୍ଥୀମାନଙ୍କୁ ମାର୍ଗଦର୍ଶନ କରିଥିଲେ ।

ଉକ୍ତ ଶିବିରରେ ବଲାଙ୍ଗିର, ସମ୍ବଲପୁର, ଜୟପାଟଣା, ବାନେର, ଆମଜୋର, ଡୁଙ୍ଗୁରିପାଲି ଓ ସାହାଜବାହାଲ୍ ବିଦ୍ୟାମନ୍ଦିରର ସମସ୍ତ ଆଚାର୍ଯ୍ୟ-ଆଚାର୍ଯ୍ୟାଗଣ ଯୋଗଦାନ କରି ପ୍ରଶିକ୍ଷଣ ପ୍ରାପ୍ତ କରିଥିଲେ ।
   ଏହି ଶିବିରରେ ପ୍ରାକ୍-ପ୍ରାଥମିକ, ପ୍ରାଥମିକ, ଉଚ୍ଚପ୍ରାଥମିକ ଏବଂ ଉଚ୍ଚ ମାଧ୍ୟମିକ ବିଦ୍ୟାଳୟ ସ୍ତରରେ ବିଭିନ୍ନ ଶୈକ୍ଷିକ ବିଷୟ ଉପରେ ଅଭିଜ୍ଞ ପ୍ରଶିକ୍ଷକମାନଙ୍କ ଦ୍ଵାରା ପ୍ରଶିକ୍ଷଣ ଦିଆ ଯାଇଥିଲା । ଏହି କାର୍ଯ୍ୟକ୍ରମରେ ପ୍ରଶିକ୍ଷକ ଭାବରେ ଡଃ ସୁଧିର ସାହୁ, ଡଃ ଅଜିତ କୁମାର ପ୍ରଧାନ,  ଅନନ୍ତ କୁମାର ନାଏକ, ମଦନ ସିଂ ମାଝି, ଦିବ୍ୟସିଂହ ସାହୁ, ସୁଶିଲ କୁମାର ମହଲା ଯୋଗଦାନକରି ଆଚାର୍ଯ୍ୟ-ଆଚାର୍ଯ୍ୟାମାନଙ୍କୁ ପ୍ରଶିକ୍ଷଣ ପ୍ରଦାନ କରିଥିଲେ। ଏହି ପ୍ରଶିକ୍ଷଣ ଶିବିରରେ ସ୍ଵାମୀ ସତ୍ୟବେଦାନନ୍ଦ ସରସ୍ଵତୀଜୀ ପ୍ରତ୍ୟହ ପ୍ରାତଃ କାଳରେ ଶିବିରାର୍ଥୀମାନଙ୍କୁ ଯୋଗାଭ୍ୟାସ ସହ ପ୍ରାର୍ଥନା ଓ 

ବୈଦିକ ମନ୍ତ୍ରର ଅଭ୍ୟାସ କରାଉଥିଲେ ଏବଂ ସାନ୍ଧ୍ୟ ସତ୍ରରେ ପୂଜ୍ଯପାଦ ସଦ୍‌ଗୁରୁଦେବ ଶ୍ରୀ ସ୍ଵାମୀଜୀ ମହାରାଜ ଶିବିରାର୍ଥୀ ମାନଙ୍କ ଜିଜ୍ଞାସାର ସମାଧାନ ତଥା ବ୍ୟକ୍ତିତ୍ଵ ପରିମାର୍ଜନ ଓ ବିକାଶ ସନ୍ଦର୍ଭରେ ମାର୍ଗଦର୍ଶନ କରିଥିଲେ ।
  ଉଦ୍‌ଯାପନୀ ଉତ୍ସବରେ ପୂଜ୍ୟପାଦ ଶ୍ରୀ ସ୍ଵାମୀଜୀ ମହାରାଜଙ୍କ ଦ୍ଵାରା ସମସ୍ତ ପ୍ରଶିକ୍ଷକ ମାନଙ୍କୁ ସମ୍ବର୍ଧନା ତଥା ଆଚାର୍ଯ୍ୟ-ଆଚାର୍ଯ୍ୟା ମାନଙ୍କୁ ପ୍ରମାଣପତ୍ର ପ୍ରଦାନ କରାଯାଇଥିଲା । ଶେଷରେ ବିଶ୍ଵାତ୍ମ ବିଦ୍ୟାମନ୍ଦିରର ସଂଯୋଜକ ସଂବିତ୍ କୁମାର ଧନ୍ୟବାଦ ଅର୍ପଣ କରିଥିଲେ। ସମସ୍ତ କାର୍ଯ୍ୟକ୍ରମକୁ ନବୀନ କୁମାର ବେଦବାକ୍, ଡଃ ସୁଶାନ୍ତ କୁମାର ପ୍ରଧାନ ଏବଂ ଚନ୍ଦ୍ର କୁମାର ପୁରୋହିତ ପରିଚାଳନା କରିଥିଲେ ।