21-Apr-2025

କଣ୍ଟାମାଳ(ଜୟ କୁମାର ମହାରଣା): କଣ୍ଟାମାଳ ବ୍ଲକ ବରଗାଁ ପଞ୍ଚାୟତର ମଲିକୁଦ ଠାରୁ ସାହାଜପିଟା ପର୍ଯ୍ୟନ୍ତ ଯାଇଥିବା ରାସ୍ତାର ମରାମତି କାମରେ ବ୍ୟାପକ ଦୁର୍ନୀତି ହୋଇଥିବା ନେଇ ଜିଲ୍ଲାପାଳଙ୍କ ନିକଟରେ ସାହାଜପିଟା ଗ୍ରାମବାସୀ ଅଭିଯୋଗ କରିଛନ୍ତି l ଅଭିଯୋଗ ପ୍ରକାରେ ଉକ୍ତ ରାସ୍ତା ଜଙ୍ଗଲ ବିଭାଗ ଅଧୀନରେ ରହିଥିବା ବେଳେ ଜଙ୍ଗଲ ବିଭାଗ ଦ୍ୱାରା ନିମ୍ନମାନର କାମ କରାଯାଇଛି l ଏପରିକି ପ୍ରତିବର୍ଷ ଲକ୍ଷାଧିକ ଟଙ୍କା ବ୍ୟୟରେ ଉକ୍ତ ରାସ୍ତା ମରାମତି କରାଯାଉଥିବା ବେଳେ ଯେଣତେଣ ପ୍ରକାରେ କାମ ସାରିଦେଇ ବ୍ୟାପକ ଟଙ୍କା ହରିଲୁଟ କରାଯାଉଛି l ଫଳରେ ବର୍ଷା ଋତୁରେ ରାସ୍ତା ଅତି ଦୟନୀୟ ହୋଇପଡେ l ତେଣୁ ବର୍ଷା ଚାରିମାସ ସାହାଜପିଟା ଗ୍ରାମକୁ ଆମ୍ବୁଲାନ୍ସ ଆସିପାରେ ନାହିଁ l ବିଶେଷ ଭାବରେ ଗୌରୀବେଙ୍ଗେସ ଠାରୁ ସାହାଜପିଟା ପର୍ଯ୍ୟନ୍ତ ରାସ୍ତା କାଦୁଅ ହୋଇଯାଏ ଯାନବାହାନ ତ ଦୂରର କଥା ଚାଲିକରି ଯିବା କଷ୍ଟକର ହୋଇପଡେ ବୋଲି କବିବନ୍ତ ଭୋଇ, ସୁଦର୍ଶନ ବଘାର, ଜଳେଶ୍ୱର ମନହିରା, ଦୁର୍ଯ୍ୟୋଧନ ମନହିରା, ପ୍ରଶାନ୍ତ ନନ୍ଦ ପ୍ରମୁଖ ଅଭିଯୋଗ କରିଛନ୍ତି l ଏହି ରାସ୍ତା ଉପରେ ବରଗାଁ ଓ ନାରାୟଣପ୍ରସାଦ ପଞ୍ଚାୟତର ସାତଖଣ୍ଡ ମୌଜାର ଲୋକେ ନିର୍ଭର କରୁଥିବାରୁ ବିଭାଗୀୟ ଉଚ୍ଚ କତ୍ତୃପକ୍ଷ ଶୁଭ ଦୃଷ୍ଟି ଦେଇ ସ୍ଥାୟୀ ରାସ୍ତା ନିର୍ମାଣ କରିବାକୁ ସାଧାରଣରେ ଦାବି ହେଉଛି l