20-Apr-2025

 ବଲାଙ୍ଗୀର(ପ୍ରେରଣା ଖବର): ଆଜି ଅପରାହ୍ନରେ ପତିତପାବନ ଏକାଡେମୀର ପୂର୍ବତନ ପ୍ରଧାନଶିକ୍ଷକ ଶିକ୍ଷକ ଶରତ ଚନ୍ଦ୍ର ଦୀକ୍ଷିତ ଙ୍କ ୮୧ ବର୍ଷ ବୟସରେ ପରଲୋକ ହୋଇଯାଇଛି l ବାର୍ଦ୍ଧକ୍ୟ ଜନିତ ଅସୁସ୍ଥତା ଯୋଗୁଁ ତାଙ୍କୁ ସମ୍ବଲପୁରର ଏକ ଘରୋଇ ହସ୍ପିଟାଲରେ ଗତ ଦୁଇ ଦିନ ତଳେ ଭର୍ତ୍ତୀ କରାଯାଇଥିଲା l ତେବେ ଡ଼ାକ୍ତରଙ୍କ ସମସ୍ତ ପ୍ରଚେଷ୍ଟା ସତ୍ତ୍ୱେ ଅପରାହ୍ଣ ପ୍ରାୟ ୨ଟା ସମୟରେ ସେ ଶେଷ ନିଶ୍ଵାସ ତ୍ୟାଗ କରିଥିଲେ l ଜଣେ  ଅମାୟିକ ବ୍ୟକ୍ତିତ୍ୱ, ଆଦର୍ଶ ଶିକ୍ଷକ, କ୍ରୀଡାବିତ୍ ଓ  ସାଲିସବିହୀନ ନୀତିନିଷ୍ଠ ବ୍ଯକ୍ତି ଭାବରେ ସେ  ବଲାଙ୍ଗୀର ଜିଲ୍ଲାରେ ପରିଚିତ ଥିଲେ l ଶିକ୍ଷା ପ୍ରତି ତାଙ୍କ ଜୀବନ ସମର୍ପିତ ଥିବା ବେଳେ ତାଙ୍କ ଉଚ୍ଚକୋଟୀର ଶିକ୍ଷାଦାନ ଶୈଳୀ ସମସ୍ତଙ୍କୁ ପ୍ରଭାବିତ କରିଥିଲା l ମୃତ୍ଯ ଶଯ୍ୟାରେ ତାଙ୍କର ଧର୍ମପତ୍ନୀ ତଥା ଅବସରପ୍ରାପ୍ତ ଶିକ୍ଷୟିତ୍ରୀ ସନ୍ଧ୍ୟାରାଣୀ ଦୀକ୍ଷିତଙ୍କ ସମେତ ୩ ପୁତ୍ର, ପୁତ୍ରବଧୂ ଓ  ଦୀକ୍ଷିତ ପରିବାରର ସଦସ୍ୟ ମାନେ ଉପସ୍ଥିତ l   ବଲାଙ୍ଗୀରରେ ପ୍ରାଥମିକ ଓ ଉଚ୍ଚ ଶିକ୍ଷା ର ଗୁଣାତ୍ମକ ମାନ  ବୃଦ୍ଧି ସକାଶେ ନିଜ ପିତା ସ୍ଵର୍ଗତ ଇନ୍ଦ୍ରମଣି ଦୀକ୍ଷିତଙ୍କ ସ୍ମୃତିରେ ସ୍ଥାପନ କରିଥିଲେ ଆଇଡିଏମ୍ ପବ୍ଲିକ୍ ସ୍କୁଲ୍ l ମୃତ୍ୟୁ ପର୍ଯ୍ୟନ୍ତ ଏଇ ପରିଣତ ବୟସରେ ମଧ୍ଯ ନିଜ ପ୍ରତିଷ୍ଠା କରିଥିବା ସ୍କୁଲରେ ସେ ପିଲା ମାନଙ୍କୁ ପାଠ ପଢ଼ାଉଥିଲେ l ସ୍ଵର୍ଗତ ଦୀକ୍ଷିତ ଜଣେ ଏଥିଲେଟ (ଜାଭିଲିଅନ୍ ଖେଳାଳି)ଭାବେ ନିଜର ପରାକାଷ୍ଠା ପ୍ରଦର୍ଶନ କରିପାରିଛନ୍ତି l ୧୯୬୪ ମସିହରେ ରାଜେନ୍ଦ୍ର କଲେଜ ତରଫରୁ ଜାଭିଲିଏନ ରେ  ସେ ଚାମ୍ପିୟନ ହୋଇଥିଲେ l ଇଂରାଜୀ ଓ ରାଜନୀତି ବିଜ୍ଞାନରେ ଏମ୍ ଏ ଓ ଏମ୍ ଇ ଡି କରିଥିବା ତଥା ବିଭିନ୍ନ ସମୟରେ ଚେରୁପାଲି ହାଇସ୍କୁଲ, ଟାଉନ୍ ହାଇସ୍କୁଲ ଓ ପତିତପାବନ ଏକାଡେମୀ ରେ ଶିକ୍ଷକତା କରି ନିଜର ଏକ ଅଲିଭା ଛାପ ଛାଡି ଚାଲିଯାଇଥିବା ସ୍ଵର୍ଗତ ଦୀକ୍ଷିତଙ୍କ ପରଲୋକରେ ବଲାଙ୍ଗୀର ଜିଲ୍ଲାରେ ଶୋକର ଛାୟା ଖେଳି ଯାଇଛି l ଆଇ ଡି ଏମ  ପବ୍ଲିକ ସ୍କୁଲ ସମେତ ପତିତପାବନ ଏକାଡେମୀ ପୂରାତନ ଛାତ୍ର ସଂଘ ଓ ଜିଲ୍ଲା ଏଥିଲେଟିକ ସଂଘ ପକ୍ଷରୁ ସ୍ଵର୍ଗତ ଶରତ ଚନ୍ଦ୍ର ଦୀକ୍ଷିତଙ୍କ ଅବର୍ତ୍ତମାନରେ ଗଭୀର ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଛି l

ସନ୍ଧ୍ୟା ପ୍ରାୟ ୭ଟା ସମୟରେ ସ୍ଵର୍ଗତଃ ଦୀକ୍ଷିତଙ୍କ ମରଶରୀର କୁ ପ୍ରଥମରେ ଆଇଡିଏମ୍ ପବ୍ଲିକ ସ୍କୁଲକୁ ନିଆଯିବ ଓ ସେଠାରୁ ନିଜର ମାଲପଡା ସ୍ଥିତ ବାସଭବନକୁ ଅନ୍ତିମ ଦର୍ଶନ ନିମନ୍ତେ ନିଆଯିବ ବୋଲି ପରିବାର ସୂତ୍ରରୁ ପ୍ରକାଶ l