09-Apr-2025

ବଲାଙ୍ଗିର(ପ୍ରେରଣା ଖବର)-ମହୋତ୍ସବର କେବଳ ମନୋରଂଜନର ମାଧ୍ୟମ ନୋହୋଇ ବିସ୍ଥାପିତଙ୍କ ସମସ୍ୟାର ସମାଧାନର ମଞ୍ଚ ହେଉ । ଲୋୟରସୁକତେଲ ପ୍ରକଲ୍ପରେ ବିସ୍ଥାପିତ ହୋଇଥିବା ଗ୍ରାମବାସୀମାନଙ୍କର ସମସ୍ୟା ସମାଧାନ କରିବାରେ ସରକାରମାନେ ବିଫଳ ହୋଇଛନ୍ତି । ବିସ୍ଥାପିତ କଲୋନୀରେ ସେମାନଙ୍କ ପାଇଁ ମୌଳିକ ସୁବିଧା କରାଯାଇ ପାରିନାହିଁ । ବିସ୍ଥାପିତଙ୍କ ପାଇଁ ରହିଥିବା ସରକାରୀ ନିୟମର ଏଠାରେ ଖୋଲାଖୋଲି ଉଲଂଘନ କରାଯାଉଛି । ବିସ୍ଥାପନର ଦୁଇବର୍ଷ ପରେ ଲୋକଙ୍କୁ ଉଚିତ କ୍ଷତିପୂରଣ ମିଳିନାହିଁ କିମ୍ବା ଥଇଥାନ କରାଯାଇ ପାରିନାହିଁ । ପ୍ରକଲ୍ପ ହେବା ସମୟରେ ଯେଉଁମାନେ ପ୍ରକଲ୍ପକୁ ସମର୍ଥନ କଲେ ସେମାନେ ପ୍ରଶାସନ ସହିତ ଆଲୋଚନା କରି ଉଚିତ ଥଇଥାନ କରାଇବେ ବୋଲି

କହୁଥିଲେ ସେମାନେ ଏବେ ମୁହଁ ମୋଡିଦେଇଛନ୍ତି । ବୃହତ୍ତର ସ୍ୱାର୍ଥପାଇଁ ଭିଟାମାଟି ଛାଡିଥିବା ଲୋକେ ଏବେ ଅପଦସ୍ତ ହେଉଛନ୍ତି । ଏବେ ସମୟ ଆସିଛି ବିସ୍ଥାପିତଙ୍କ ସହିତ ଛିଡାହୋଇ ତାଙ୍କର ସମସ୍ୟାକୁ ସମସାଧାନ କରାଇବା  ବୋଲି ବଲାଙ୍ଗୀର ଜିଲ୍ଲା ଲୋୟରସୁକତେଲ ପ୍ରକଲ୍ପ ତଳେ ମାଗୁରବେଢାଠାରେ ଚାଲିଥିବା ବନଦୁର୍ଗା ମହୋତ୍ସବର ଦ୍ୱିତୀୟଦିନରେ ଅତିଥିଗଣ ମତବ୍ୟକ୍ତ କରିଛନ୍ତି । ବନଦୁର୍ଗା ମହୋତ୍ସବ କମିଟିର ସଭାପତି ମାଗୁରବେଢା ସରପଞ୍ଚ ସଞ୍ଜୟ ଗଡତ୍ୟାଙ୍କ ସଭାପତିତ୍ୱ ଓ ବିକାଶରଂଜନ ରଥଙ୍କ ସଂଯୋଜନାରେ ଅନୁଷ୍ଠିତ ସାଂସ୍କୃତିକ ସଭାରେ ମୁଖ୍ୟଅତିଥି ଭାବରେ ଚାଷିନେତା ଆକାଶ ମିଶ୍ର,ସମ୍ମାନୀତ ଅତିଥି ଭାବରେ ଲୋଇସିଂହା ବ୍ଲକଅଧ୍ୟକ୍ଷ ଜତିନ ପଟେଲ,କୁସମେଲ ସରପଞ୍ଚ କୌସ୍ତୁଭ ସାହୁ,ରତାଖଣ୍ଡି ସରପଞ୍ଚ ହୀମାଞ୍ଚଳ ମେହେର, କୁସମେଲ ସମିତି ସଭ୍ୟ ବିରେନ୍ଦ୍ରସାହୁ,ମାଗୁରବେଢା ସମିତିସଭ୍ୟ ଦିଲିପ ଦାସ ଓ ମୁଖ୍ୟବକ୍ତା ଭାବରେ ବରିଷ୍ଠ ସାମ୍ବାଦିକ ପ୍ରଗତିବାଦୀର ଜିଲ୍ଲାପ୍ରତିନିଧି ପୂର୍ଣ୍ଣଚନ୍ଦ୍ର ପଣ୍ଡା ଯୋଗଦେଇଥିଲେ । ମୁଖ୍ୟଅତିଥି ଶ୍ରୀ ମିଶ୍ର ତାଙ୍କ ବକ୍ତବ୍ୟରେ ଲୋୟରସୁକତେଲ ପ୍ରକଲ୍ପରୁ ଜଳସେଚନ ନେଇ ସନ୍ଦେହ ବ୍ୟକ୍ତ କରି ୨୦୦୦ ମସିହାରେ ଯାହା ସନ୍ଦେହ କରାଯାଉଥିଲା ଯେ,ପ୍ରକଲ୍ପରୁ ଖଣି ଓ କାରଖାନାକୁ ପାଣି ଦିଆଯିବ ବୋଲି

ତାହା ସତ୍ୟ ହେବାକୁ ଯାଉଛି ବୋଲି କହିଥିଲେ । ଆଜି ଲୋୟରସୁକତେଲ ପ୍ରକଲ୍ପ ଉପରମୁଣ୍ଡରେ ଖଣି ଖନନ କରିବାକୁ ସରକାର ଯୋଜନା କରୁଛନ୍ତି ଓ ପ୍ରକଲ୍ପରୁ ଆଖିବୁଜା ପାଣି ସେମାନଙ୍କୁ ଦେବାର ଆଶଂକା ରହିଛି । ଏହା ହେଲେ ପ୍ରକଲ୍ପର ଅସଲ ଉଦ୍ଦେଶ୍ୟ ସାଧିତ ହେବ ନାହିଁ । ବିସ୍ଥାପିତଙ୍କ ସମସ୍ୟାର ମିଳିତ ଭାବରେ ସମାଧାନ କରାଯାଉ ବୋଲି ଶ୍ରୀ ମିଶ୍ର ମତବ୍ୟକ୍ତ କରିଥିଲେ । ଠିକ ସେହିପରି ଲୋଇସିଂହା ବ୍ଲକଅଧ୍ୟକ୍ଷ ଜତିନ ପଟେଲ,ସରପଞ୍ଚ କୌସ୍ତୁଭ ସାହୁ ଓ ଅନ୍ୟମାନେ ବିସ୍ଥାପିତ କଲୋନୀଗୁଡିକର ସମସ୍ୟା ବିଷୟରେ କହିଥିଲେ । କାର୍ଯ୍ୟକ୍ରମରେ ମହୋତ୍ସବ କମିଟର ସଂପାଦକ ଜୟକୃଷ୍ଣ ମିଶ୍ର  ସାଂସ୍କୃତିକ କାର୍ଯ୍ୟକ୍ରମଗୁଡିକୁ ସଂଯୋଜନା କରିଥିଲେ । ଏହି ଅବସରରେ ସଂସ୍କୃତିବିଭାଗ ଅନୁକୂଲ୍ୟରେ ପ୍ରାୟୋଜିତ ସାଂସ୍କୃତିକ ଦଳଗୁଡିକ  ଦିଲିପ କୁମାର ସାହୁ, ପଦ୍ମଶ୍ରୀ ଖଟେଇ ଓ ସାଥୀ କଳାଜିବୀ ବରଗଡ଼, ପାୟଲ ଇନଷ୍ଟିଚ୍ୟୁଟ କଟକ, ଆକାଶ, ବିଦ୍ୟା ଓ ସାଥୀ ମହାନୀ ନୃତ୍ୟ ଅନୁଷ୍ଠାନ ବଲାଙ୍ଗିର କାର୍ଯ୍ୟକ୍ରମ ପରିବେଷଣ କରିଥିଲେ । ସେହିପରି କଳାକାର ଗୋପାଳ ପଣ୍ଡାଙ୍କ ଟିମଦ୍ୱାରା କଂସ ଦରବାର ଆୟୋଜିତ ହୋଇଥିଲା ।