19-Jan-2021

ବଲାଙ୍ଗୀର,(ପ୍ରେରଣା ଖବର ବ୍ୟୁରୋ) ବଲାଙ୍ଗୀରର ଜଣେ ଜଣାଶୁଣା ସମାଜସେବୀ ତଥା ଶ୍ରମିକନେତା ଲଳିତକୁମାର ନାୟକଙ୍କର  ଦେହାନ୍ତ ହୋଇଯାଇଛି । ଦୀର୍ଘ ୯ମାସ ହେଲା ସେ ଭୁବନରଶ୍ୱରର ବିଭିନ୍ନ ହସପିଟାଲରେ ଚିକିତ୍ସିତ ହେଉଥିଲେ ଓ ଶେଷରେ ଏମ୍ସରେ ଫୁସଫୁସ ଜନିତ ସମସ୍ୟାର ଚିକିତ୍ସା ହେଉଥିବା ବେଳେ ଆଜି ସକାଳ ୫ଟାରେ ଦେହାନ୍ତ ହୋଇଯାଇଛି । ପ୍ରଥମେ ତାଙ୍କର ଦୁର୍ଘଟଣା ଘଟି ଗୋଡଭାଙ୍ଗି ଯାଇଥିଲା । ଏହା ପରେ ବୋନମେରୋ କ୍ୟାନସର ତା ପରେ କରୋନାରେ ପିଡିତ ହୋଇ ଫୁସଫୁସରେ ସମସ୍ୟା ହୋଇଥିଲା । ତାଙ୍କ ବିୟୋଗରେ ବଲାଙ୍ଗୀର ତଥା ଓଡିଶାର ବିଭିନ୍ନ ମହଲରେ ଶୋକର ଛାୟା ଖେଳିଯାଇଛି । ରାଜେନ୍ଦ୍ର କଲେଜ ଛାତ୍ରଜୀବନରୁ ରାଜନୀତି ଆରମ୍ଭ କରି ରାଜେନ୍ଦ୍ରକଲେଜର ଛାତ୍ରସଂସଦର ସଭାପତି ହେବା ସହିତ ବଲାଙ୍ଗୀରର ଜଣେ ଯୁବସଂଗଠକ ହୋଇଯାଇଥିଲେ । ସେ ବଲାଙ୍ଗୀରର ଅନେକ ସାମାଜିକ ତଥା ରାଜନୈତିକ ଆନ୍ଦୋଳନର ନେତୃତ୍ୱ ନେଉଥିଲେ । ଛାତ୍ର ଜୀବନରୁ ଜଣେ ରକ୍ତଦାତା ହୋଇ ଯୁବରକ୍ତଦାତାଙ୍କୁ ପ୍ରେରଣା ଦେଉଥିଲେ । ନିଜେ ଛାତ୍ରଜୀବନରୁ ଜଣେ ରକ୍ତଦାତା ଭାବରେ ଜଣାଯାଉଥିବା ବେଳେ ସେ ୭୯ଥର ରକ୍ତଦାନ କରିଥିଲେ । ଏହା ସହିତ ଆମ ଓଡିଶା,ଜୀବନବିନ୍ଦୁ ଇତ୍ୟାଦି କାର୍ଯ୍ୟକ୍ରମ ସହିତ ଜଡିତ ରହି ରକ୍ତାଦାନ ଶୀବିର କରାଉଥିଲେ । ସାମାଜିକ ଜୀବନରେ ବିଭିନ୍ନ ବର୍ଗର ଲୋକଙ୍କ ସହିତ ସେ ସମ୍ପର୍କ ବଢାଇ ଗରୀବ ଦିନମଜୁରିଆ,ରିକ୍ସାଚାଳକଙ୍କ ସଂଘର ନେତୃତ୍ୱ ନେଇ ଶ୍ରମିକନେତା ହୋଇଥିଲେ । ପରେ ବିତ୍ୟୁତବିଭାଗର ସବୁଠୁ ବଡ ଶ୍ରମିକସଂଗଠନ ହିରାଜିଟିଡିର ସଭାପତି,ପଶ୍ଚିମ ଓଡିଶା କର୍ମଚାରୀମହାସଂଘ,ବିଏସଏନଏଲ କର୍ମଚାରୀସଂଘର ସଭାପତି,ରାଜ୍ୟ ଗ୍ରାମପଞ୍ଚାୟତ ଚତୁର୍ଥଶ୍ରେଣୀ କର୍ମଚାରୀସଂଘ,ନିର୍ମାଣଶ୍ରମିକ ସଂଘର ସଭାପତି,ସମବାୟ ବ୍ୟାଙ୍କକର୍ମଚାରୀ ସଂଘର ସଭାପତି,ପୌରପାଳିକା ସଫେଇକର୍ମଚାରୀ ସଂଘର ସଭାପତି ,ରାଜେନ୍ଦ୍ର ପୁରାତନ ଛାତ୍ରସଂସଦର ସଭାପତି ଇତ୍ୟାଦି ସମେତ ୫୦ରୁ ଅଧିକ ସଂଗଠନର ନେତୃତ୍ୱ ନେଇ ଆସୁଥିଲେ । ପୁରାତନ ଛାତ୍ରସଂସଦର ସଭାପତି ଭାବରେ ସେ ୧୯୯୫ରେ ରାଜେନ୍ଦ୍ର କଲେଜର ସୁବର୍ଣ୍ଣଜୟନ୍ତି ଓ ୨୦୧୯ରେ ପ୍ଲାଟିନମ ଜୁବିଲିକୁ ସଫଳତାର ସହିତ କରାଇପାରିଥିଲେ । ତାଙ୍କ ନେତୃତ୍ୱରେ ବଲାଙ୍ଗୀରରେ ହାଇକୋର୍ଟ ବେଞ୍ଚ ଆନ୍ଦୋଳନ,କୃଷିବିଶ୍ୱବିଦ୍ୟାଳୟ ଆନ୍ଦୋଳନ ଇତ୍ୟାଦି ଅନେକଥର କରାଯାଇ ପାରିଥିଲା । ତାଙ୍କ କାର୍ଯ୍ୟାଳୟ ଚାଲୁଥିବା ଶ୍ରମିକ ମଙ୍ଗଳଭବନ ଏକ ପ୍ରକାର କୋର୍ଟ ଭାବରେ ପରିଗଣିତ ହେଉଥିଲା । ପାରିବାରିକ କଳହ,ପଡାମାନଙ୍କର ଗଣ୍ଡଗୋଳ ତାଙ୍କ କାର୍ଯ୍ୟାଳୟରେ ହିଁ ସମାଧାନ ହୋଇଯାଉଥିଲା । ଗରୀବ,ଦୁଃଖି ରଙ୍କିମାନେ ରକ୍ତ ଆବଶ୍ୟକ ହେଉ କି,ଚିକିତ୍ସା ପାଇଁ ଅର୍ଥର ଆବଶ୍ୟକତା ହେଉଥିଲେ ପହଞ୍ଚି ଯାଉଥିଲେ ଶ୍ରମିକମଙ୍ଗଲ ଭବନକୁ । ବଲାଙ୍ଗୀର ରୁଗୁଡିପଡାର ଯୁବକଙ୍କୁ ସଂଗଠିତ କରି ଅନେକ କାର୍ଯ୍ୟକ୍ରମ କରୁଥିବା ଲଳିତ ପରବର୍ତ୍ତି ସମୟରେ ଜିଲ୍ଲାର ତଥା ପଶ୍ଚିମ ଓଡିଶାର ଅନେକ କାର୍ଯ୍ୟକ୍ରମକୁ ସଫଳତାର ସହିତ କରାଇ ପାରୁଥିଲେ । ବଲାଙ୍ଗୀର ଲୋକଉତ୍ସବ ହେଉ କି ବହିହାଟ ହେଉ ସବୁଠି ଲଳିତଙ୍କୁ ଖୋଜା ପଡୁଥିôଲା । ୯୦ଦଶକରେ ଭାରତୀୟଜନତା ପାର୍ଟି ସହିତ ରାଜନୈତିକ କ୍ୟାରିୟର ଆରମ୍ଭ କରି ୨୦୦୪ ମସିହାରେ ଲୋଇସିଂହା ବିଧାନସଭା କ୍ଷେତ୍ରରୁ ବିଧାୟକ ପ୍ରାର୍ôଥ ହୋଇଥିଲେ । ପରେ ବିଜେପି ଛାଡି ବିଜୁଜନତା ଦଳରେ ସାମିଲ ହୋଇଥିଲେ । ଏବେ ସେ ରାଜ୍ୟସରକାରଙ୍କ ଶ୍ରମିକ କଲ୍ୟାଣବୋର୍ଡର ସଭ୍ୟ ରହିଥିଲେ ଓ ଅନେକ ଶ୍ରମିକଙ୍କ ସମସ୍ୟାର ସମାଧାନ କରାଉଥିଲେ । ଆଜି ତାଙ୍କର ବିୟୋଗରେ ବଲାଙ୍ଗୀର ସହର ସଂପୂର୍ଣ୍ଣ ଭାଙ୍ଗି ପଡିଛି । ସମସ୍ତଙ୍କ ଆଖିରେ ଲୁହ । ଆଜି ସଂଧ୍ୟାରେ ତାଙ୍କ ମରଶରୀର ବଲାଙ୍ଗୀର ପହଞ୍ଚିବା ପୂର୍ବରୁ ବୌଦ୍ଧ,ସୋନପୁର,ବଇରାସର,ମଳମୁଣ୍ଡା,ପୁଇଁତଳା ଇତ୍ୟାଦି ଛକରେ ରାସ୍ତାରେ ହଜାର ହଜାର ଲୋକ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ । ସେହିପରି ବଲାଙ୍ଗୀର ରୁଗୁଡିପଡା ଦୁର୍ଗାପୂଜା କମିଟି ପକ୍ଷରୁ ମଣ୍ଡପଠାରେ ଏକ ଭବ୍ୟ ଶ୍ରଦ୍ଧାଞ୍ଜଳିର ଆୟୋଜନ କରାଯାଇଥିଲା । ଏଠାରେ ବଲାଙ୍ଗୀର ବିଧାୟକ ନରସିଂହ ମିଶ୍ର,ପୂର୍ବତନ ସାଂସଦ କଳିକେଶ ନାରାୟଣ ସିଂଦେଓ, ରାଜ୍ୟ ମହିଳାକମିଶନର ପୂର୍ବତନ ଅଧ୍ୟକ୍ଷା ଜ୍ୟୋତି ପାଣିଗ୍ରାହୀ,କାଜୁନୀଗମର ପୂର୍ବତନ ଅଧ୍ୟକ୍ଷ ସରୋଜ ପାଣିଗ୍ରାହୀ,ବିଜେଡିନେତା ଅଜୟ ଦାସ,ବଲାଙ୍ଗୀର ଜିଲ୍ଲାପାଳ ଚଞ୍ଚଳ ରାଣା,ଏସପି ନୀତିନ କୁସଲକର ଡାଗଡୁ,ଜିଲ୍ଲା ସଂସ୍କୃତି ଅଧିକାରୀ ବିଜୟକୁମାର ଶତପଥି,ଜିଲ୍ଲା ସୂଚନା ଓ ଲୋକସଂପର୍କ ଅଧିକାରୀ ଜୟଦେବ ପାଣିଗ୍ରାହୀ,ସମ୍ବାଦର ମୁଖ୍ୟବାର୍ତ୍ତା ସଂପାଦକ ଅରବିନ୍ଦ ଦାସ,ପୌରପାଳିକାର ପୂର୍ବତନ ଅଧ୍ୟକ୍ଷା ସନ୍ତୋଷିନୀ ବେହେରା,କୋସଲବାଦୀ ନେତା ପ୍ରମୋଦ ମିଶ୍ର,ବରିଷ୍ଠ ସାମ୍ବାଦିକ ସତ୍ୟନାରାୟଣ ବେହେରା,ସାମ୍ବାଦିକ ସଂଘର ସଭାପତି ହରିନାରାୟଣ ପୂଜାହାରୀ,ପ୍ରେସକ୍ଲବର ସଭାପତି ଅରୂଣ ମିଶ୍ର,ବଣିକସଂଘର ସଭାପତି ତ୍ରୀପୁରାରୀ ପାଣିଗ୍ରାହୀ,ବିଏସପିର ଜିଲ୍ଲା ସଭାପତି ଦ୍ରୋଣ କୁମ୍ଭାର,ବିଙ୍ଗହ୍ୟୁମାନ ଫାଉଣ୍ଡେସନର ସଭାପତି ସୋମନାଥ ମିଶ୍ର,ଘରୋଇ ବସମାଲିକସଂଘର ସଭାପତି ହେମନ୍ତ ପଣ୍ଡାଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତିବିଶେଷ ଶେଷଦର୍ଶନ କରିବା ସହିତ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ । ଏକ ଭବ୍ୟ ଶୋଭାଯାତ୍ରାରେ ସ୍ଥାନୀୟ ବିଭୁତିପଡାର ଶ୍ମସାନକୁ ନିଆଯାଇ ସେଠାରେ ଶେଷକୃତ୍ୟ ସମ୍ପନ୍ନ କରାଯାଇଥିଲା । ତାଙ୍କର ପୁତୁରା ଜ୍ୟୋତିରଂଜନ ନାୟକ ମୁଖାଗ୍ନୀ ଦେଇଥିଲେ । 
   ଲଳିତନାୟକଙ୍କ ବିୟୋଗରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶୋକବ୍ୟକ୍ତ କରିଛନ୍ତି । ଟୁଇଟରରେ ମୁଖ୍ୟମନ୍ତ୍ରୀ ଲଳିତଙ୍କ ଜନକଲ୍ୟାଣ କାର୍ଯ୍ୟ ଓ ରକ୍ତଦାନ କ୍ଷେତ୍ରରେ ଅବଦାନ ଉଲ୍ଲେଖ କରି ତାଙ୍କ ବିୟୋଗରେ ଦୁଃଖପ୍ରକାଶ କରିଛନ୍ତି । ସେହିପରି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ,ମହିଳା ଓ ଶିଶୁ କଲ୍ୟାଣମନ୍ତ୍ରୀ ଟୁକୁନୀ ସାହୁ,ବରଗଡ ସାଂସଦ ସୁରେଶ ପୂଜାହାରୀ,କଣ୍ଟାବାଞ୍ଜି ବିଧାୟକ ସନ୍ତୋଷ ସିଂ ସାଲୁଜା,ଲୋଇସିଂହା ବିଧାୟକ ଡ,ମୁକେଶ ମହାଲିଙ୍ଗ ପ୍ରମୁଖ ଗଭୀର ଶୋକପ୍ରକାଶ କରି ସୋସିଆଲ ମିଡିଆରେ ଉଲ୍ଲେଖ କରିଛନ୍ତି ।