12-Jan-2021

ପୁରୀ, (ପ୍ରେରଣା ଖବର ବ୍ୟୁରୋ): ଶ୍ରୀଜଗନ୍ନାଥ ମହାପ୍ରଭୁଙ୍କ ଘୋଷଯାତ୍ରା ପାଇଁ ରଥ ନିର୍ମାଣ ଉଦ୍ଦେଶ୍ୟରେ ରଥ ସଂହିତା ଅନୁଯାୟୀ, ପ୍ରତିବର୍ଷ ନୟାଗଡ଼ ବନଖଣ୍ଡରୁ କାଠ ଯୋଗାଇ ଦିଆଯାଇଥାଏ । ଏହି ପରିପ୍ରେକ୍ଷୀରେ ମା’ ବଡ଼ରାଉଳ ଠାକୁରାଣୀଙ୍କ ପୀଠରେ ଅନୁକୂଳ ପୂଜାର୍ଚ୍ଚନା କରାଯାଇଥାଏ। ଚଳିତ ବର୍ଷ ମା’ବଡ଼ରାଉଳ ଠାକୁରାଣୀଙ୍କ ପୀଠ ବଡମୂଳରେ ମଙ୍ଗଳବାରେ ପୂଜାର୍ଚ୍ଚନା କରାଯାଇ ରଥକାଠ ସଂଗ୍ରହର ଶୁଭାରମ୍ଭ କରାଯିବ । ୧୨୮ଖଣ୍ଡ ଅସନ ଓ ଧଉରା କାଠ ସଂଗ୍ରହ କରାଯିବ ବୋଲି ସୂଚନା ମିଳିଛି!!ମହାପ୍ରଭୁ ଶ୍ରୀଜଗନ୍ନାଥଙ୍କ ରଥ କାଠ ଚିହ୍ନଟ ଅନୁକୂଳ ପାଇଁ ସୋମବାର ଅପରାହ୍‌ଣ ୩ଟାରେ ପୁରୀରୁ ନୟାଗଡ଼ ଯାତ୍ରା କରିଛନ୍ତି ଶ୍ରୀମନ୍ଦିର ସେବକ । ବଡ଼ରାଉଳ ଠାକୁରାଣୀଙ୍କ ପୂଜାର୍ଚ୍ଚନା ପାଇଁ ବଡ଼ଦେଉଳରୁ ଶ୍ରୀଜିଉଙ୍କ ମାଳ ମହାର୍ଦ୍ଦ, ଲାଗି ଲୁଗା ନେଇ ଶ୍ରୀମନ୍ଦିର ମୁଖ୍ୟ କାର୍ଯ୍ୟାଳୟରୁ କାଠ ଚିହ୍ନଟ ଅନୁକୂଳ ଦଳ ଯାତ୍ରା କରିଛନ୍ତି । ସନ୍ଧ୍ୟାରେ ଏହି ଦଳ ନୟାଗଡ଼ରେ ପହଞ୍ଚିଛନ୍ତି । ଆଜି ରାତିରେ ଏହି ଦଳ ନୟାଗଡ଼ ବନ ବିଭାଗ ଡାକ ବଙ୍ଗଳାରେ ରହିବେ । ମଙ୍ଗଳବାର ବଡ଼ରାଉଳ ଠାକୁରାଣୀଙ୍କ ପୀଠରେ କାଠ ଅନୁକୂଳ ପୂଜା ସମ୍ପନ୍ନ ହେବ । ଏହି ଦଳରେ ଶ୍ରୀମନ୍ଦିର ନୀତି ପ୍ରଶାସକ ଜିତେନ୍ଦ୍ର ସାହୁ, ରଥକାଠ ତତ୍ତ୍ୱାବଧାରକ ସୁଦର୍ଶନ ମେକାପ, ରଥକାଠ ଅମିନ ଲକ୍ଷ୍ମଣ ମହାପାତ୍ର, ରଥ ଭୋଇ ସର୍ଦ୍ଦାର ରବି ଭୋଇ ଅଛନ୍ତି!!ରଥସଂହିତା ମୁତାବକ ତିନି ରଥ ନିର୍ମାଣ ପାଇଁ ମୋଟ ୮୬୫ ଖଣ୍ଡ କାଠ ଗଣ୍ଡି ଆବଶ୍ୟକ । ୨୦୨୦ ରଥଯାତ୍ରାର ତିନି ରଥ ନିର୍ମାଣ ବେଳେ ୬୯ କାଠ ଗଣ୍ଡି ବଳକା ଥିଲା । ଆଉ ୭୯୬ କାଠ ଗଣ୍ଡି ନୟାଗଡ଼ ବନ ଖଣ୍ଡରୁ ସଂଗ୍ରହ କରାଯିବ । ଏହି କାଠରୁ ବଡ଼ଦାଣ୍ଡସ୍ଥିତ ରଥଖଳାକୁ ୩୦୬ କାଠ ଗଣ୍ଡି ଆଉ କଟକ ଖପୁରିଆସ୍ଥିତ ବନ ନିଗମର କରତ କଳକୁ ୪୯୦ କାଠ ଗଣ୍ଡି ଯିବ । ମୁଖ୍ୟତଃ ଅସନ, ଧଉରା, ଫାସୀ, ସିମିଳି ଆଦି କାଠଗଣ୍ଡି ଏହି ଦୁଇ ସ୍ଥାନରେ ପହଞ୍ଚିବ । ରଥକାଠ ଚିହ୍ନଟ ଅନୁକୂଳ ଦଳର ନୟାଗଡ଼ ବନଖଣ୍ଡ ଯାତ୍ରାଠାରୁ ଶ୍ରୀମନ୍ଦିର ପ୍ରଶାସନର ରଥଯାତ୍ରା ପ୍ରସ୍ତୁତି ଆରମ୍ଭ ହୋଇଯାଇଛି!!ଶ୍ରୀମନ୍ଦିର ରଥଯାତ୍ରା ସଂହିତା ମୁତାବକ କାଠ ଚୟନ ଅନୁକୂଳ ପରେ ସରସ୍ୱତୀ ପୂଜାରେ (ଫେବ୍ରୁଆରୀ ୧୬) ରଥ କାଠ ପୂଜା, ଅକ୍ଷୟ ତୃତୀୟା ( ମେ ୧୫)ରେ ରଥ ନିର୍ମାଣ ଅନୁକୂଳ, ଭଉଁରୀ ଯାତ୍ରାରେ ରଥ ଚକ ଡେରା (୪ ଜୁନ), ଦେବସ୍ନାନ ପୂର୍ଣ୍ଣିମା (୨୪ ଜୁନ)ରେ ତିନି ରଥର ଚାରି ନାହାକା ଉଠିବା ସହ ରଥ ନିର୍ମାଣ ଶେଷ ପରେ ତିନି ରଥ ସିଂହଦ୍ୱାରକୁ ବିଜେ କରିବେ । ପରେ ଜୁଲାଇ ୧୨ରେ ମହାପ୍ରଭୁଙ୍କ ରଥଯାତ୍ରା, ଜୁଲାଇ ୧୬ରେ ହେରାପଞ୍ଚମୀ, ଜୁଲାଇ ୨୦ରେ ବାହୁଡ଼ା ଯାତ୍ରା, ୨୧ ଜୁଲାଇରେ ରଥ ଉପରେ ମହାପ୍ରଭୁଙ୍କ ସୁନାବେଶ, ୨୨ରେ ରଥ ଉପରେ ଅଧରପଣା, ଜୁଲାଇ ୨୩ରେ ନୀଳାଦ୍ରି ବିଜେ ଆଦି ନୀତି ରହିବ ବୋଲି କ୍ୟାଲେଣ୍ଡରରେ ଦର୍ଶାଯାଇଛି। ରଥଯାତ୍ରାର ସମସ୍ତ ନୀତିର ତିଥି ଶ୍ରୀମନ୍ଦିର ପରିଚାଳନା କମିଟି ନୀତି ଉପକମିଟି ଆଉ ଛତିଶା ନିଯୋଗର ପରାମର୍ଶ ମାର୍ଗଦର୍ଶନରେ ହେବ!!