08-Jan-2021

 ସଇଁତଳା , (ପ୍ରେରଣା ଖବର) - ଶାରିରୀକ ଦୂରତା ବଜାୟ ରଖିବା, ମାସ୍କ ପିନ୍ଧିବା,  ହାତକୁ ସାବୁନ କିମ୍ବା ସାନିଟାଇଜର ଦ୍ୱାରା ବାରମ୍ବାର ଧୋଇବା ନିୟମ ଗୁଡିକ ପାଳନ କରିବା ପାଇଁ ଦଶମ ଶ୍ରେଣୀ ଛାତ୍ରଛାତ୍ରୀମାନଙ୍କୁ ସଇଁନ୍ତଲା ଗୋଷ୍ଠୀ ଉନ୍ନୟନ ଅଧିକାରୀ ଦେବାଶିଷ ସାମଲ ସଇଁନ୍ତଲା ବ୍ଲକ ଅନ୍ତର୍ଗତ ଡେଙ୍ଗ ଉନ୍ନୀତ ଉଚ୍ଚ ବିଦ୍ୟାଳୟ ଜୁନିୟର ରେଡକ୍ରସ ତରଫରୁ ଶିକ୍ଷାର୍ଥୀମାନଙ୍କୁ ମାସ୍କ ଓ ସାବୁନ ବଣ୍ଟନ କାର୍ଯ୍ୟକ୍ରମରେ ମୁଖ୍ୟଅତିଥି  ଭାବରେ ଯୋଗଦେଇ ପରାମର୍ଶ ଦେଇଥିଲେ ।    ଅନ୍ୟାନ୍ୟ ସମ୍ମାନୀତ ଅତିଥି ଭାବରେ ଡେଙ୍ଗ ସରପଞ୍ଚ ଜେମାମଣୀ ମଲ୍ଲିକ, ସଇଁନ୍ତଲା ସରପଞ୍ଚ ଭୀମସେନ ସ୍ୱାଇଁ ଯୋଗ ଦେଇଥିଲେ । କରୋନା ଭୁତାଣୁ ସଂକ୍ରମଣ ଯୋଗୁଁ ଦୀର୍ଘ ୮ ମାସରୁ ଉର୍ଦ୍ଧ୍ୱ ହେବ ବିଦ୍ୟାଳୟ ଗୁଡିକ ବନ୍ଦ ଥିଲା । ବିଦ୍ୟାଳୟ ଗଣଶିକ୍ଷା ବିଭାଗ, ଓଡିଶା ନିର୍ଦ୍ଦେଶ ଅନୁସାରେ କେବଳ ଦଶମ ଶ୍ରେଣୀ ବିଦ୍ୟାର୍ଥୀମାନଙ୍କୁ ଅଧ୍ୟୟନ ପାଇଁ ଅନୁମତି ପ୍ରଦାନ କରାଯାଇଛି । ବିଦ୍ୟାଳୟର ପ୍ରଧାନଶିକ୍ଷକ ବିଶ୍ୱନାଥ ମେହେରଙ୍କ ଅଧ୍ୟକ୍ଷତାରେ ଓ ଜୁନିୟର ରେଡକ୍ରସ କାଉନ୍ସିଲର ରାମ ନାରାୟଣ ଦାଶଙ୍କ ପରିଚାଳନା କରିଥିବା କାର୍ଯ୍ୟକ୍ରମରେ ସଂସ୍କୃତ ଶିକ୍ଷକ ସୁଦର୍ଶନ ଦାଶ ଧନ୍ୟବାଦ ଅର୍ପଣ କରିଥିଲେ ।  ଏହି ଅବସରରେ ଜୁନିୟର ରେଡକ୍ରସ ତରଫରୁ ପ୍ରତ୍ୟେକ ଶିକ୍ଷାର୍ଥୀଙ୍କୁ ମାସ୍କ ଓ ସାବୁନ ବଣ୍ଟନ କରାଯାଇଥିଲା । ଶିକ୍ଷାର୍ଥୀମାନଙ୍କୁ ହାତ ଧୋଇବାର ୬ଟି ସୋପାନ ପ୍ରଦର୍ଶନ ମାଧ୍ୟମରେ ଶିଖା ଯାଇଥିଲା । ତତ୍ପରେ ନୂତନ ଭାବେ ନିଯୁକ୍ତି ପାଇଥିବା ଶିକ୍ଷକ ଆଦିତ୍ୟ ରଣା, ଶିକ୍ଷୟତ୍ରୀ ଗାୟତ୍ରୀ ବାରିକ, ସ୍ୱାଗତିକା ଦାସ ଓ ଯଶୋବନ୍ତି ସୁନା, ହିମାଂଶୁ ବିଶ୍ୱାଳଙ୍କୁ ବିଦ୍ୟାଳୟ ତରଫରୁ କୋଭିଡ-୧୯ ମାର୍ଗଦର୍ଶିକା ପାଳନ କରି ସ୍ୱାଗତ କରାଯାଇଥିଲା ।  ଶିକ୍ଷକ କୈବଲ୍ୟ ତରିଆ, ବ୍ରଜ ମୋହନ ମାଝି, ଲିଙ୍ଗରାଜ ନନ୍ଦ, ରେଣୁକା ସାହୁ, ଭାରତୀ ପ୍ରଧାନ, ପ୍ରକାଶ ଚନ୍ଦ୍ର ପ୍ରଧାନ, ଦୌପଦୀ ଭୋଇ, ପୂର୍ବତନ ଛାତ୍ର ବିଘ୍ନରାଜ ରଣା, ଚୁଡାମଣୀ ରଣା କାର୍ଯ୍ୟକ୍ରମରେ ଅଂଶଗ୍ରହଣ କରି ସହଯୋଗ କରିଥିଲେ ।