08-Jan-2021

ଖଣ୍ଡପଡା,(ପ୍ରଦୀପ କୁମାର ପଣ୍ଡା)-ଖଣ୍ଡପଡା ବ୍ଳକ ଅଧିନ ଖଳିସାହି- କୋଟପୋଖରୀ ରାସ୍ତା ପାଶ୍ୱର୍ରେ ଡଃ ଆବିଦ ହୁସେନଙ୍କ ଘରେ ଭଡା ରହୁଥିବା ଜଣେ ମହିଳାଙ୍କ ନିକଟରୁ କେନ୍ଦ୍ରାଚଂଳ ଅବକାରୀ ଗୁଇନ୍ଦା ବିଭାଗ, କଟକ ଟିମ ଶୁକ୍ରବାର ପୂର୍ବାହ୍ନରେ ଅଚାନକ ଚଢାଉ କରି ୧୦ ଲକ୍ଷରୁ ଉର୍ଦ୍ଧ ଟଙ୍କା ମୂଲ୍ୟର ବ୍ରାଉନସୁଗାର ଜବତ କରିବା ସହ ଏହି କାରବାରରେ ସଂପୃକ୍ତ ଥିବା ଅଭିଯୋଗରେ ଲକି ସ୍ୱାଇଁ(୨୩) ନାମ୍ନି ଜଣେ ମହିଳାଙ୍କୁ ଗିରଫ କରି ଘଟଣାର ତଦନ୍ତ ଚଳାଇଥିବା ଜଣାଯାଇଛି । କେନ୍ଦ୍ରାଚଂଳ ଗୁଇନ୍ଦା ବିଭାଗ ଆଇଆଇସି ଜଗଦୀଶ ଚନ୍ଦ୍ର ସାମଲଙ୍କ ନେତୃତ୍ୱରେ ଅବକାରୀ ଟିମ ଖଳିସାହି ଗ୍ରାମରେ ଚଢାଉ କରିଥିଲା । ଉକ୍ତ ମହିଳାଙ୍କ ନିକଟରୁ ୧୦୧ ଗ୍ରାମ ଓଜନର ବ୍ରାଉନସୁଗାର ଅବକାରୀ ଟିମ୍ ଜବତ କରିଥିବା ଜଣାଯାଇଛି । ଉକ୍ତ ମହିଳାଙ୍କ ସ୍ୱାମୀ ଶେଖ ନିୁଜାମଉଦ୍ଦିନ ଜଣେ ପେଶାଦାର ଅପରାଧୀ ବୋଲି ଜଣାପଡିଛି । ଚଢାଉ ସମୟରେ ଶେଖ୍ ନିଜାମଉଦ୍ଦିନ ଘରେନଥିବା ଅବକାରୀ ଟିମ ସୂଚନା ଦେଇଛି । ଗତ କିଛିମାସ ଧରି ଶେଖ୍ ନିଜାମଉଦ୍ଦିନ ଉକ୍ତ ଡ଼ାକ୍ତରଙ୍କ ଘର ଭଡା ନେଇ ସପରିବାର ସହ ରହୁଥିଲା । ବିଳମ୍ବିତ ରାତିରେ ଉକ୍ତ ଭଡାଘରକୁ ଅନେକ ଅଜଣା ଅପରିଚିତ ଲୋକମାନଙ୍କ ଯିବାଆସିବା ଲାଗି ରହୁଥିବା ସ୍ଥାନୀୟ ବାସିନ୍ଦାଙ୍କ ସୁତ୍ରରୁ ଜଣାପଡିଛି । ଖଳିସାହି, ମର୍ଦ୍ଦରାଜପୁର, ଖଣ୍ଡପଡା, କଂଟିଲୋ ଓ ବାହାଡା ଅଂଚଳରେ ବ୍ରାଉନସୁଗାର କାରବାର ଦିର୍ଘବର୍ଷ ଧରି ଚାଲିଥିବା ନେଇ ସାଧାରଣରେ ଉଠିଥିବା ଅଭିଯୋଗର ସତ୍ୟତା ଥିବା ନେଇ ଉପରୋକ୍ତ ଘଟଣାରୁ ସ୍ପଷ୍ଟ ବାରି ହୋଇପଡୁଛି । ଏ ନେଇ ଅବକାରୀ ଟିମ ଅଧିକ ଖୋଲତାଡ କଲେ ଖଳିସାହି ଅଂଚଳରେ ଚାଲିଥିବା ବ୍ରାଉନସୁଗାର ର‌୍ୟାକେଟର ପର୍ଦ୍ଦାଫାସ ହୋଇପାରିବ ବୋଲି ସାଧାରଣରେ ଚର୍ଚ୍ଚା ହେଉଛି । ଏନେଇ ଏକ ମାମଲା ରୁଜୁ ହୋଇଥିବା ଆଇଆଇସି ଶ୍ରୀ ସାମଲଙ୍କଠାରୁ ପ୍ରକାଶ ।