07-Jan-2021

ଭୁବନେଶ୍ୱର/ଖୋର୍ଦ୍ଧା, (ଶୁଭାଶିଷ ନାୟକ): ଏସ. ଟି. ଏଫ ଟିମକୁ ପୁଣି ଆଉ ଏକ ସଫଳତା । ଖୋର୍ଦ୍ଧା ସହର ବାଇପାସ ନିକଟରୁ ଏସ.ଟି.ଏଫ ଟିମ ଜଣଙ୍କୁ ଗିରଫ କରି ତା ଠାରୁ ଏକ କେଜି ୩୧୦ ଗ୍ରାମର ବ୍ରାଉନସୁଗାର ଜବତ କରିଛି ।

ବିଶ୍ୱସ୍ତ ସୂତ୍ରରୁ ଖବର ପାଇ ଆଜି ଦିନ ୧୨ଟା ବେଳେ ସ୍ପେଶିଆଲ ଟାସ୍କଫୋର୍ସ ଖୋର୍ଦ୍ଧା ବାଇପାସ ରାସ୍ତାରେ ଜଣେ ବ୍ରାଉନ୍‌ସୁଗାର ବେପାରୀକୁ ଗିରଫ କରିବା ସହ ତାଠାରୁ ୧ କେଜି ୩୧୦ ଗ୍ରାମ ଓଜନର ବ୍ରାଉନ୍‌ସୁଗାର ଓ ଏକ ବାଇକ ଜବତ କରିଛି । ଜବତ ବ୍ରାଉନସୁଗାରର ମୂଲ୍ୟ ୧କୋଟି ଟଙ୍କାରୁ ଉର୍ଦ୍ଧ ହେବ ବୋଲି ଆକଳନ କରାଯାଉଛି । ମିଳିଥିବା ସୂଚନା ଅନୁସାରେ, ଖୋର୍ଦ୍ଧା କାଇପଦର ଅଞ୍ଚଳର ଦେଉଳିଟାଙ୍ଗୀ ମୁସଲିମ ସାହିରେ ରହୁଥିବା ଶେଖ ତବିରଙ୍କ ପୁଅ ଶେଖ ଅନୱର ଦୀର୍ଘ ଦିନ ଧରି ଜିଲ୍ଲା ବାହାରୁ ବ୍ରାଉନ୍‌ସୁଗାର ଆଣି ନିଜ ଅଞ୍ଚଳ ସମେତ ନିକଟସ୍ଥ ଅଞ୍ଚଳର ଛୋଟ ଛୋଟ ବ୍ୟବସାୟୀଙ୍କୁ ଯୋଗାଉଥିବା ନେଇ ପୁଲିସକୁ ପୂର୍ବ ରୁ ସୂଚନା ମିଳିଥିଲା । ତେଣୁ ଦୀର୍ଘ ଦିନ ଧରି ପୁଲିସ୍ ଅନୱର ଉପରେ ନଜର ରଖିଥିଲା। ଆଜି ଏସ.ଟି.ଏଫ୍ ଜାଣିବାକୁ ପାଇଥିଲା ଯେ ଅନୱର ବେପାର ପାଇଁ ବ୍ରାଉନ୍‌ସୁଗାର ନେଇ କାଇପଦର ଫେରୁଛି। ଏହି ସୂଚନା ଆଧାରରେ ଏସ.ଟି.ଏଫ୍ ଟିମ୍ ଅନୱରକୁ ଗିରଫ କରିବା ସହ ତା ଠାରୁ ବ୍ରାଉନ୍‌ସୁଗାର ଜବତ କରିଥିବା ନେଇ ଏସ୍.ଟି.ଏଫ୍ ତରଫରୁ ସୂଚନା ମିଳିଛି ।

ଅଭିଯୁକ୍ତକୁ ଏନ.ଡି.ପି.ଏସ ୧୯୮୫ ଆକ୍ଟ ଆଧାରରେ ଭାରତୀୟ ପିଙ୍ଗଳ କୋଡ଼ ୨୧(ସି)/୨୯ ଦଫାରେ ଏସ୍.ଟି. ଏଫ୍. ଥାନା କେଶ ନମ୍ବର ୨ ରେ ମାମଲା ରୁଜ୍ଜୁ କରାଯାଇ କୋର୍ଟ ଚାଲାଣ କରାଯାଇଛି ।