01-Nov-2024

କେସିଙ୍ଗା:   ଆଜି ନଭେମ୍ବର ୧ ତାରିଖରେ ଥିଲା  କଳାହାଣ୍ଡି ଜିଲ୍ଲାର କେସିଙ୍ଗା ପଞ୍ଚାୟତ ସମିତି ଅଧ୍ୟକ୍ଷଙ୍କ ବିରୁଦ୍ଧରେ ଆଗତ ଅନାସ୍ଥାପ୍ରସ୍ତାବ ।  ତେବେ କୋରମ୍ ଅଭାବରୁ ଓ ପ୍ରିଜାଇଡିଂ ଅଫିସର ଦାୟିତ୍ୱରେ ଥିବା ଭବାନୀପାଟନା ସହକାରୀ ଉପଜିଲ୍ଲାପାଳଙ୍କ ପତ୍ନୀଙ୍କ ଦେହ ଖରାପ ହୋଇପଡିବା ଯୋଗୁଁ ସେ ହଠାତ୍ ଛୁଟିରେ ଚାଲିଯିବାରୁ ଏହି ଅନାସ୍ଥାପ୍ରସ୍ତାବଟି ବାତିଲ୍ ହୋଇଯାଇଥିବା ଜଣାଯାଇଛି । 

ଏହି ନର୍ଲା ଓ ଭବାନୀପାଟଣା ବିଧାନସଭା ନିର୍ବାଚନ ମଣ୍ଡଳୀ ରେ ଆସୁଥିବା ୨୬ ପଞ୍ଚାୟତବିଶିଷ୍ଟ କେସିଙ୍ଗା ପଞ୍ଚାୟତ ସମିତିର ମୋଟ ସଭ୍ୟଙ୍କ ସଂଖ୍ୟା ୫୫ ଓ  ଏଥିରୁ ଅଧ୍ୟକ୍ଷଙ୍କ ବିପକ୍ଷରେ ଦାବି କରିଥିବା ସମିତିସଭ୍ୟ ମନୋଜ ପଟ୍ଟନାୟକଙ୍କ ସପକ୍ଷରେ ୩୪ ଟି ସଭ୍ୟଙ୍କ ସମର୍ଥନ ରହିଥିବା ବେଳେ ଆଉ ୩ ଟି ସଭ୍ୟଙ୍କର ସମର୍ଥନ ଆବଶ୍ୟକ ଥିଲା। ସେଥିମଧ୍ୟରୁ ନର୍ଲା ବିଧାୟିକା ମନୋରମା ମହାନ୍ତି(ବିଜେଡି) ତାଙ୍କ ସପକ୍ଷରେ ଥିବାବେଳେ, ଭବାନୀପାଟଣା ବିଧାୟକ ସାଗର ଚରଣ ଦାସ (କଂଗ୍ରେସ ) ଓ କଳାହାଣ୍ଡି ସାଂସଦ ମାଳବିକା ଦେଓ (ବିଜେପି) ଭୋଟ୍ ଦେବାକୁ ଆସିଲେ ନାହିଁ। ଏଣୁ ତାଙ୍କର ଆବଶ୍ୟକ ଥିବା ମୋଟ ୩୭ ଟି ଭୋଟ୍ ରୁ  ୨ ଟିର ଅଭାବରୁ କୋରମ୍ ପୁରି ପାରିଲା ନାହିଁ। ଆହୁରି ମଧ୍ୟ ଏହି ଅନାସ୍ଥା ପ୍ରସ୍ତାବର ପ୍ରିଜାଇଡିଂ ଅଫିସର ଭବାନୀପାଟନା ସହକାରୀ ଉପଜିଲ୍ଲାପାଳଙ୍କ ପତ୍ନୀଙ୍କର ହଠାତ୍ ଦେହଖରାପ ହୋଇପଡିବା ଦର୍ଶାଇ ସେ ଛୁଟିରେ ଚାଲିଗଲେ । ଏଣୁ ଏହି ଦୁଇଟି କାରଣ ନିମନ୍ତେ ଏହି ଅନାସ୍ଥାପ୍ରସ୍ତାବ ବାତିଲ୍ ହୋଇଥିବା ପ୍ରକାଶ । 

ଅସମର୍ଥିତ ସୂତ୍ରରୁ ପ୍ରକାଶ ଯେ , ଏହି ବ୍ଲକ୍ ର ବିଜେଡିର ଅଧ୍ୟକ୍ଷ ଚନ୍ଦନ କୁମାର ସେନାପତି ଇତିମଧ୍ୟରେ ଭବାନୀପାଟଣା ବିଧାୟକ ସାଗର ଚରଣ ଦାସଙ୍କ ସହିତ ବିଜେପି ଆଡକୁ ଢଳିଥିବା ପ୍ରକାଶ। ସେହିପରି ନିର୍ଦ୍ଦଳୀୟ ଥିବା ଓ ଏବେ ବିଜେଡି ଆଡକୁ ଢଳିଥିବା ସମିତିର ଉପାଧ୍ୟକ୍ଷା ରାଜଲକ୍ଷ୍ମୀ ପଟ୍ଟନାୟକଙ୍କ ସ୍ବାମୀ ସମିତିସଭ୍ୟ ମନୋଜ ପଟ୍ଟନାୟକଙ୍କୁ ନର୍ଲା ବିଧାୟିକାଙ୍କ ସ୍ବାମୀ ତଥା ନର୍ଲା ପଞ୍ଚାୟତ ସମିତିର ଭାରପ୍ରାପ୍ତ ଅଧ୍ୟକ୍ଷ ଦୁର୍ଗାପ୍ରସାଦ ମହାନ୍ତିଙ୍କ ସମର୍ଥନ ଓ ଗୋଟି ଚାଳନା ସତ୍ତ୍ୱେ ତାଙ୍କୁ ଏଥର ସଫଳତା ମିଳିପାରିଲା ନାହିଁ l    ଉଲ୍ଲେଖନୀୟ ଯେ, ଗତବର୍ଷଠାରୁ ଏହି ବ୍ଲକ୍ ରେ ଅଧ୍ୟକ୍ଷ ଚନ୍ଦନ କୁମାର ସେନାପତି ଓ ଉପାଧ୍ୟକ୍ଷାଙ୍କ ସ୍ବାମୀ ସମିତିସଭ୍ୟ ମନୋଜ ପଟ୍ଟନାୟକଙ୍କ ମଧ୍ୟରେ ଟଣାଓଟରା ଆରୋପ ପ୍ରତ୍ୟାରୋପ ଚାଲି ଆସୁଛି। ଏପରିକି ବ୍ଲକ୍ ପ୍ରଶାସନରେ ଅନିୟମିତତା ଚାଲିଥିବା ଆଳରେ ସରପଞ୍ଚ ସଂଘ ଧାରଣା ଦେଇ ଆନ୍ଦୋଳନ ମଧ୍ୟ କରିଥିଲା। ଅନ୍ୟାନ୍ୟ ବିଶୃଙ୍ଖଳା ସୃଷ୍ଟିର ଥାନାରେ ଅଭିଯୋଗ ମଧ୍ୟ କରାଯାଇଥିଲା। ଏହି ଅନାସ୍ଥାପ୍ରସ୍ତାବ ପାଇଁ ସାଂସଦ ଓ ବିଧାୟକମାନଙ୍କୁ ନିଜ ନିଜ ପକ୍ଷକୁ ଆଣିବା ପାଇଁ ଗତକାଲି ସୁଦ୍ଧା ଭୁବନେଶ୍ବରରେ ଉଭୟଗୋଷ୍ଠୀ ଡେରା ପକାଇଥିଲେ । 

ଏହା ସହିତ ବିଜେପି-ବିଜେଡି ମଧ୍ୟରେ ରାଜନୈତିକ କସରତ ଓ ଅର୍ଥବଳରେ ଏହି ଅନାସ୍ଥାପ୍ରସ୍ତାବ ମାମଲାକୁ ଚାପ ପକାଯାଇ ହାଇଜେକ୍ କରି ନିଆଗଲା ବୋଲି ଲୋକମାନଙ୍କ ମଧ୍ୟରେ ଚର୍ଚ୍ଚା ହେଉଛି ।