06-Jan-2021

ଢେଙ୍କାନାଳ:(ରାଜଶ୍ରୀ ଶତପଥୀ)- ଦଳରୁ ଅଲଗା ହୋଇଥିଲା ହେଲେ ନୂଆ ଠିକଣାରେ ମିଳିଲେ ନୂଆ ବନ୍ଧୁ। କୁନି ହାତୀ ପଦ୍ମାକୁ ମିଳିଛି ଏବେ ନୂଆ ପରିବାର। ଢେଙ୍କାନାଳ କପିଳାସ ହାତୀ ଉଦ୍ୟାନରେ ପଦ୍ମା ହାତୀ ଏବେ ଅନ୍ୟ ବଡ଼ ହାତୀଙ୍କ ସହ ମିଶିଛି। ଏକାଠି ରହୁଛି, ଖାଉଛି ଏବଂ ବୁଲୁଛି ମଧ୍ୟ। ସେହିପରି ଉଦ୍ୟାନରେ ଥିବା ଅନ୍ୟ ହାତୀ ବି ପଦ୍ମାକୁ ଦଳରେ ମିଶାଇବା ପରେ ବେଶ ଖୁସ୍ ଥିବା ଦେଖିବାକୁ ମିଳିଛି। ଅନ୍ୟ ହାତୀଙ୍କ ସହ ପଦ୍ମାର ମିଳିମିଶା ଉପରେ ନଜର ରଖାଯାଇଛି। ପଦ୍ମାର ବ୍ୟବହାର ଓ ଚଲଣିକୁ ବି ବନ ବିଭାଗ ଟିମ୍ ତଦାରଖ କରୁଛି। ପଦ୍ମାର ସ୍ୱାସ୍ଥ୍ୟ ପରୀକ୍ଷା ବି କରାଯାଇଛି। କିଛି ମାତ୍ରାରେ ଦୂର୍ବଳ ଥିବା ପଦ୍ମାକୁ ବିଶେଷ ଭାବେ ଖାଦ୍ୟ ଓ ରାତିରେ ଶୋଇବା ସ୍ଥାନ ଉପରେ ଦିଆଯାଇଛି ବିଶେଷ ଧ୍ୟାନ। ଗତମାସ ବ୍ରହ୍ମପୁର ସୁନାପୁର ହଦ୍ରରୁ ହାତୀକୁ ଉଦ୍ଧାର କରାଯିବା ପରେ କପିଳାସକୁ ନିଆଯାଇଥିଲା। ତେବେ ସ୍ଥାନୀୟ ବନବିଭାଗର ଅଫିସର କହିଛନ୍ତି ଯେ, “ପଦ୍ମା ଅତି ସହଜରେ ପୂର୍ବରୁ ଏଠାରେ ଥିବା ହାତୀଙ୍କ ସହ ମିଶୁଛି। କେବଳ ଯେ, ମିଶୁଛି ତାହା ନୁହେଁ ବରଂ ସେମାନଙ୍କ ସହ ବୁଲାବୁଲି ମଧ୍ୟ କରୁଛି।  ମାହନ୍ତର ପଛେ ପଛେ ବୁଲୁଛି ଛୁଆ ହାତୀ ପଦ୍ମା। କିନ୍ତୁ ବଡ ହାତୀ ଛୁଆ ହାତୀକୁ ପୂରା ପାଖରେ ରଖୁଛି। ଯଦି କେଉଁ ଆଡେ ପଳାଉଛି ତେବେ ତାକୁ ଟାଣି ନେଉଛି। କିନ୍ତୁ ଏ ପର୍ଯ୍ୟନ୍ତ ଛୁଆ ହାତୀଟି ଦନ୍ତା ହାତୀ ସହ ମିଶିନାହିଁ। ମାଇ ହାତୀ ସହ ବୁଲାବୁଲି କରୁଛି। ୧୦ କିମ୍ବା ୧୫ ଦିନରେ ସେ ସମସ୍ତଙ୍କ ସହ ମିଶିବ” ବୋଲି ଡିଏଫଓ କହିଛନ୍ତି।