01-Jan-2021

ଭୁବନେଶ୍ୱର,(ଶୁଭାଶିଷ ନାୟକ)-  ଆହୁରି ସଶକ୍ତ ହେଲା ଆମ୍ବୁଲାନ୍ସ ସେବା ।  ପୂର୍ବରୁ ୮୪ଟି ୧୦୮ ଆମ୍ବୁଲାନ୍ସ କିଣିବାକୁ ସ୍ବାସ୍ଥ୍ୟ ବିଭାଗକୁ କୁହାଯାଇଥିବା ବେଳେ ଆଜି  ରାଜ୍ୟରେ ୨୭ଟି ଜିଲ୍ଲା ପାଇଁ ୮୪ଟି ୧୦୮ ଆମ୍ବୁଲାନ୍ସ ଲୋକାର୍ପିତ ହୋଇଛି । ଭିସି ଜରିଆରେ ଲୋକାର୍ପିତ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏହି ଆମ୍ବୁଲାନ୍ସ ରୁ ସର୍ବାଧିକ ୧୧ଟି ଆମ୍ବୁଲାନ୍ସ ବାଲେଶ୍ୱର ଜିଲ୍ଲାକୁ ପଠାଯିବ । ରାଜ୍ୟରେ ୧୦୮ ଆମ୍ବୁଲାନ୍ସ ସେବା ଦ୍ୱାରା ଲକ୍ଷାଧିକ ଲୋକ ଉପକୃତ ହେଉଛନ୍ତି । ରାଜ୍ୟରେ ଲୋକଙ୍କୁ ଉନ୍ନତ ଓ ତ୍ୱରିତ ସ୍ବାସ୍ଥ୍ୟସେବା ଯୋଗାଇବା ସରକାରଙ୍କ ଲକ୍ଷ୍ୟ ।

     ପୂର୍ବରୁ ରାଜ୍ୟରେ ୫୨୦ଟି ୧୦୮ ଆମ୍ବୁଲାନ୍ସ ଗଡ଼ୁଥିବାବେଳେ ବର୍ତ୍ତମାନ ୬୦୪ଟି ୧୦୮ ଆମ୍ବୁଲାନ୍ସ ସେବା ଲୋକମାନଙ୍କ ନିକଟରେ ପହଁଛି ପାରିବ । ଏଗୁଡ଼ିକୁ ମୁଖ୍ୟତଃ ଦୁର୍ଘଟଣାପ୍ରବଣ ସ୍ଥାନଗୁଡ଼ିକରେ ରଖାଯିବ । ଜାତୀୟ ରାଜପଥ ଓ ରାଜ୍ୟ ରାଜପଥରେ ଯେଉଁଠି ଅଧିକ ଦୁର୍ଘଟଣା ଘଟୁଛି ସେହି ଅଞ୍ଚଳରେ ଆମ୍ବୁଲାନ୍ସ ସେବା ଯେପରି ତୁରନ୍ତ ମିଳିବ ସେନେଇ ଏହି ନିଷ୍ପତ୍ତି ନିଆଯାଇଛି ।