30-Jul-2024

ହରଭଙ୍ଗା(ଦେବବ୍ରତ ଦାଶଙ୍କ ରିପୋର୍ଟ): ଉପାନ୍ତ ମାରଡ଼ା ଗାଁ ରେ ପହଁଚିଲା ସ୍ୱାସ୍ଥ୍ୟ ବିଭାଗ ର ସୋତନ୍ତ୍ର ଟିମ । ସମ୍ଭାବ୍ୟ ବନ୍ୟା କୁ ଦୃଷ୍ଟି ରେ ଯୋଗାଇ ଦେଲେ ସ୍ୱାସ୍ଥ୍ୟ ସେବା । ସୂଚନାମୁତାବକ ହୀରାକୁଦ ଡ୍ୟାମ ରେ ପ୍ରଥମ ବନ୍ୟାଜଳ ଆସିବା ଫଳରେ ଏବେ ମହାନଦୀ ଫୁଲିବାରେ ଲାଗିଛି । ବିପଦ ସଙ୍କେତ ଠାରୁ ଅତି ନିକଟରେ ପ୍ରବାହିତ ହେଉଛି ମହାନଦୀ ରେ ବନ୍ୟାଜଳ । ଯାହାକୁ ନେଇ ଏବେ ବୌଦ୍ଧ ଜିଲ୍ଲା

ହରଭଙ୍ଗା ବ୍ଲକ ର ୪୦ରୁ ଉର୍ଦ୍ଧ ଗାଁ ଲୋକେ ଏବେ ଭୟବିତ ଅବସ୍ଥାରେ ରହିଛନ୍ତି । ସମ୍ଭାବ୍ୟ ବନ୍ୟା ପରିସ୍ଥିତି କୁ ମୁକାବିଲା କରିବା ପାଇଁ ଜିଲ୍ଲା ପ୍ରଶାସନ ବିଶେଷ କରି ସ୍ୱାସ୍ଥ୍ୟ ବିଭାଗ ସମ୍ପୂର୍ଣ୍ଣ ପ୍ରସ୍ତୁତ ରହିଛି । ବନ୍ୟା ପ୍ରପୀଡ଼ିତ ଗ୍ରାମ ଗୁଡିକରେ ସ୍ୱାସ୍ଥ୍ୟ ବିଭାଗ ର ସୋତନ୍ତ୍ର ଟିମ ପହଞ୍ଚି ଜନସାଧାରଣଙ୍କୁ ସ୍ୱାସ୍ଥ୍ୟ ସେବା ଯୋଗାଇ ଦେଉଛନ୍ତି । ଏହି ପରିପ୍ରେକ୍ଷୀରେ ହରଭଙ୍ଗା ବ୍ଲକ ର ଉପାନ୍ତ ଅପହଞ୍ଚ ଗ୍ରାମ ମାରଡା ରେ ପହଞ୍ଚିଛି ସ୍ୱାସ୍ଥ୍ୟ ବିଭାଗର ଏକ ଟିମ । ମହାନଦୀ ର କୂଳେ କୂଳେ ବିପଦ ପୂର୍ଣ୍ଣ ଅବସ୍ଥାରେ ଅଭୟାରଣ୍ୟ ରାସ୍ତା ଦେଇ ଗୋଟିଏ ପାହାଡି ନାଳ ଡେଇଁ ଗ୍ରାମବାସୀ ଙ୍କ ନିକଟରେ ପହଞ୍ଚିଛି ସ୍ୱାସ୍ଥ୍ୟ ବିଭାଗ ର ଏହି ଟିମ । ଗାଁ ରେ ପହଞ୍ଚି ଜନସାଧାରଣ ଙ୍କ ସ୍ୱାସ୍ଥ୍ୟ ଅବସ୍ଥା ଯାଞ୍ଚ କରିବା ସହ ଔଷଧ ମଧ୍ୟ ପ୍ରଦାନ କରିଛନ୍ତି । ବିଶେଷ କରି ମ୍ୟାଲେରିଆ, ମଧୁମେହ, ରକ୍ତଚାପ , ଝାଡା ଓ କାଛୁକୁଣ୍ଡିଆ ଭଳି ଅନେକ ରୋଗର ଯାଞ୍ଚ କରିବା ସହ ଗ୍ରାମବାସୀ ଙ୍କୁ ମଧ୍ୟ କରାଯାଇଛି ସଚେତନ । ବନ୍ୟା ସମୟରେ ସାପ କାମୁଡ଼ା ର ଭୟ ରହିଥିବାରୁ ସତର୍କତା ଅବଲମ୍ବନ କରିବା ସହ ସାପ କାମୁଡ଼ିଲେ ଗୁଣିଗାରେଡି ରେ ଭରସା ନ କରି ଡାକ୍ତରଖାନା ଯିବା ସହ ଗର୍ଭବତୀ ମହିଳା ଓ ଛୋଟ ଛୁଆ

ଙ୍କୁ ଅଧିକ ସତର୍କତା ଅବଲମ୍ବନ କରିବା ପାଇଁ ଟିମ ପକ୍ଷରୁ କୁହାଯାଇଛି । ଯଦି ଅଧିକ ବନ୍ୟାପାଣି ଗାଁକୁ ଆସେ ଉଚ୍ଚ ଜାଗାରେ ଆଶ୍ରୟ ନେବା ପାଇଁ ସଚେତନ କରାଯାଇଛି । ଏହି ଟିମ ରେ ହରଭଙ୍ଗା ବ୍ଲକ ବିପିଏମ ଅରୁନ କୁମାର ପାଢୀ ସହ ମ୍ୟାଲେରିଆ ସ୍ୱାସ୍ଥ୍ୟକର୍ମୀ ଓ ଡାକ୍ତର ସିଦ୍ଧାର୍ଥ ଶଙ୍କର ସାହୁ ଥିଲେ । ଅନ୍ୟପଟେ ଆଗକୁ ମହାନଦୀ ରେ ବନ୍ୟା ଆସିବାର ସମ୍ଭାବନା ରହିଛି ଏହାକୁ ଦୃଷ୍ଟିରେ ରଖି ନଦୀ କୂଳିଆ ଗ୍ରାମ ଗୁଡିକରେ ବୌଦ୍ଧ ଜିଲ୍ଲାପାଳ ଓ ସିଡିଏମୋ ଙ୍କ ନିର୍ଦ୍ଦେଶ କ୍ରମେ ସ୍ୱାସ୍ଥ୍ୟ ଶିବିର କରାଯାଇ ଜନସାଧାରଣଙ୍କୁ ଚିକିତ୍ସା ସେବା ଯୋଗାଇ ଦେବା ସହ ବନ୍ୟା ସମୟର ବିଭିନ୍ନ ସତର୍କ ଅବଲମ୍ବନ କରିବା ପାଇଁ ସଚେତନତା କରାଯାଇଛି ବୋଲି ଡାକ୍ତର ସିଦ୍ଧାର୍ଥ ଶଙ୍କର ସାହୁ ସୂଚନା ଦେଇଛନ୍ତି । ସ୍ୱାସ୍ଥ୍ୟ ବିଭାଗ ର ଏଭଳି ପ୍ରୟାସ କୁ ବୁଦ୍ଧିଜୀବୀ ମହଲରେ ପ୍ରଶଂସା କରାଯାଇଛି ।