24-Jul-2024

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ) ସଂପ୍ରତି ବର୍ଷାଦିନର ରାସ୍ତାଘାଟର ଅସୁବିଧାର ଆଳରେ ପଞ୍ଚାୟତଗୁଡିକୁ ଏକକାଳୀନ ୩ ମାସର ସରକାରୀ ଚାଉଳ ବଣ୍ଟନ କରାଯାଉଛି । ତେବେ ଏଥିରେ ଗୋଦାମରଦ୍ଦି, ପଚାସଢା ଓ ବେରଙ୍ଗ ଚାଉଳକୁ ପାର୍ କରିଦିଆ ଯାଉଛି । ଏହା ସରକାରୀ ଚାଉଳକୁ କଳାବଜାରରେ କିଣି ରିସାଇକ୍ଲିଂ କରାଯାଉଥିବା କୁହାଯାଉଛି ।  ଏଥିରେ ମିଲର୍ସଙ୍କ ଠାରୁ ଆରମ୍ଭ କରି ରାଇସ୍ ରିସିଭିଂ ସେଣ୍ଟର, ପରିବହନ ଠିକାଦାର ଓ ପଞ୍ଚାୟତ ସମେତ ଯୋଗାଣ ବିଭାଗର ମିଳିତ ଦୁର୍ନୀତି ରହିଛି । ନିକଟରେ ବଲାଙ୍ଗୀର, ସୋନପୁର, ବୌଦ୍ଧ, ନୂଆପଡା, ବରଗଡ ଓ କଳାହାଣ୍ଡି ଆଦି ଜିଲ୍ଲାର କେତେକ ସ୍ଥାନରେ ଏପରି ଘଟଣା ଜଣାପଡିଛି । ଅନୁସନ୍ଧାନରୁ ପ୍ରକାଶ ଯେ, ରାଇସ୍ ମିଲ୍ ଗୁଡିକରେ ନାମକୁ ମାତ୍ର କମ୍ ପରିମାଣର ଚାଉଳ ମିଲିଂ କରାଯାଉଥିବା ବେଳେ ସରକାର ଯୋଗାଉଥିବା ଖାଦ୍ୟ ସୁରକ୍ଷା ଓ ସ୍କୁଲ୍ ଗୁଡିକୁ ମଧ୍ୟାହ୍ନ ଭୋଜନ ନିମନ୍ତେ ଯୋଗାଣ କରାଯାଉଥିବା ରିହାତି ମୂଲ୍ୟର ଚାଉଳକୁ ପଞ୍ଚାୟତ, ସ୍କୁଲ୍ ବା ଅଙ୍ଗନବାଡି କେନ୍ଦ୍ରଗୁଡିକରୁ ବେପାରୀଙ୍କ ଜରିଆରେ ସଂଗ୍ରହ କରାଯିବାପରେ ତାହାକୁ ଠୁଳକରାଯାଇ କଳାବଜାରରେ ମିଲ୍ ଗୁଡିକୁ ବିକି ଦିଆଯାଉଛି ।  ଚାଉଳକଳଗୁଡିକର ବିଦ୍ୟୁତ୍ ବିଲ୍ ଓ ବଏଲିଂ ରିପୋର୍ଟରୁ ଏହା ଜଣାପଡିପାରିବ । ଏହା ସହିତ ସି ଡବ୍ଲୁ ସି ବା କେନ୍ଦ୍ରୀୟ ଗୋଦାମରେ ଖତ ଖାଇଥିବା ଚାଉଳକୁ ମଧ୍ୟ ଆମଦାନୀ କରି ମିଲର୍ସ ଅଧା ଭଲ ଚାଉଳ ସାଙ୍ଗରେ ଏହାକୁ ଅପମିଶ୍ରଣ 

କରିଦେଉଛନ୍ତି । ଏହି ଚାଉଳକୁ ମିଲର୍ସ ଆର୍ ଆର୍ ସି କୁ ଧରାଧରି କରି ଲଟ୍ ଲଟ୍ ପୁରାଇ ଦେଉଛନ୍ତି । ଚଳିତ ରବିଋତୁର ଚାଉଳ ଏକ ଆର ଆର ସିରେ ଏଭଳି  ଟନ୍ ପିଛା ପଚାଶହଜାର ଟଙ୍କା ପ୍ରୋକ୍ୟୁରମେଣ୍ଟ ଇନିସପେକ୍ଟର ତଥା କ୍ବାଲିଟିକଣ୍ଟ୍ରୋଲ୍ ଇନିସପେକ୍ଟରଙ୍କୁ ଉତ୍କୋଚ ଦେଇ ରିସିଭ୍ କରାଇଥିବା ଓ  ଏହା ପଞ୍ଚାୟତରେ ଧରାପଡିଯିବାରୁ ପୁଣି ଫେରାଇ ଅଣାଯାଇଥିବା ବିଶ୍ବସ୍ତ ସୂତ୍ରରୁ ପ୍ରକାଶ । 

ଆହୁରି ମଧ୍ୟ ସୋନପୁର ଜିଲ୍ଲାର ଏକ କର୍ପୋରେଟ୍ ମଡେଲ ର ଅତ୍ୟାଧୁନିକ ଏଫ ଆରକେ ମିଲ୍ ରେ ଏଭଳି ଚାଉଳର ରୂପାନ୍ତରିକରଣ କରାଯାଉଥିବା ସନ୍ଦେହ ପ୍ରକାଶ ପାଇଛି । ଆହୁରି ମଧ୍ୟ ପୂର୍ବବର୍ଷ ମାନଙ୍କରେ ଧରାପଡିଥିବା ବଜଲାଙ୍ଗୀର ସି ଡବ୍ଲୁ ସିରେ ସୋନପୁର ମିଲର୍ସଙ୍କ ଦ୍ବାରା ଖତଚାଉଳ ଏଥର ମଧ୍ୟ ପୁରାଯାଉଥିବା ଖବର ମିଳୁଛି । 

ଏହା ଯୋଗାଣ ବିଭାଗର ସମ୍ପୂର୍ଣ୍ଣ ଜ୍ଞାତସାରରେ ଚାଲୁଥିବା ବେଳେ ପ୍ରଶାସନିକ ଅଧିକାରୀଙ୍କର ମଧ୍ୟ ସଲାସୁତୁରା ଚାଲିଛି  ପ୍ରାୟ ସମସ୍ତ ଆର ଆର ସି ରେ ଏବେ ଏହି ଅପମିଶ୍ରଣ ଓ  ଚାଉଳର ଗୁଣବତ୍ତା ପ୍ରତି କୋହଳ କାରବାର ଏହାର ମୁଖ୍ୟ କାରଣ । ତେଣୁ ନୂତନ ସରକାରଙ୍କ ପକ୍ଷରୁ ତୁରନ୍ତ ଏସବୁ ଜିଲ୍ଲାର ଯୋଗାଣ ସହାୟକଠାରୁ ଅଧିକାରୀ, ପିଆଇ ବା କ୍ବାଲିଟି କଣ୍ଟ୍ରୋଲ୍ ଇନିସପେକ୍ଟରଙ୍କୁ ସ୍ଥାନାନ୍ତର କରାଯିବାକୁ ଦାବି କରାଯାଇଛି ।