19-Jul-2024

ତରଭା(ପ୍ରେରଣା ଖବର): ସୋନପୁର ଜିଲ୍ଲା ତରଭା ଥାନା ମେଣ୍ଡା ଫାଣ୍ଡି ଅଞ୍ଚଳରେ କେବୁଲତାର ଚୋର ର‌୍ୟାକେଟ ସକ୍ରୀୟ ହୋଇଛନ୍ତି । ଏହି ଫାଣ୍ଡି ଅଞ୍ଚଳର ଅନେକ ଗୁଡିଏ ପାନୀୟଜଳ ଯୋଗାଣ ପ୍ରକଲ୍ପରୁ କେବୁଲ ତାର ଓ କଟଆଉଟ ଚୋରୀ ହୋଇଥିବା ମେଣ୍ଡା ଫାଣ୍ଡିରେ ଅଭିଯୋଗ ହୋଇଛି । ସୂଚନାରୁ ଜଣାଯାଇଡ଼ି ଯେ, ମେଣ୍ଡା ଫାଣ୍ଡି ଅଞ୍ଚଳର ମେଣ୍ଡା ଗ୍ରାମପଞ୍ଚାୟତର ଖଗସାକନା ଗ୍ରାମକୁ ଜଳଯୋଗାଣ କରାଯାଉ ଥିବା ନଦୀକୂଳର ପଏଣ୍ଟରୁ ୧୮ ତାରିଖ ରାତିରେ ପ୍ରାୟ ୩୦୦ ମିଟରର ତମ୍ବାତାର ଯୁକ୍ତ କେବୁଲ ଓ କଟଆଉଟ ଚୋରୀ ହୋଇଛି । ଏହା ପୂର୍ବରୁ ବୁର୍ଡା-ଅର୍ଜୁନପୁର ପୂର୍ତ୍ତବିଭାଗ ରାସ୍ତା କଡରେ ଥିବା ପ୍ରମୋଦ ପର୍ଡିଆଙ୍କ ବନ୍ଦପଡିଥିବା କ୍ରସରରୁ ମଧ୍ୟ କେବୁଲ ଚୋରୀ ହୋଇଥିଲା । ଠିକ ସେହିପରି ପୁଆ,  ଦେଉଳପଦର ଇତ୍ୟାଦି ଗ୍ରାମକୁ ଜଳଯୋଗାଣ ପାଇଁ ଥିବା ସୁକତେଲନଦୀ କୂଳରେ ଥିବା ପଏଣ୍ଟଗୁଡିକରୁ ମଧ୍ୟ କେବୁଲ ତାର ଚୋରୀ ହୋଇଥିବା ସୂଚନା ମିଳିଛି । ଏକ ନିର୍ଦ୍ଦିଷ୍ଟ ତାରଚୋର ର‌୍ୟାକେଟ ବିଭିନ୍ନ ଅଞ୍ଚଳରୁ ତମ୍ବାତାର ଯୁକ୍ତ କେବୁଲ ଚୋରୀକରି ନେଇ ବାହାରେ ବିକ୍ରୀ କରୁଥିବା ଅଭିଯୋଗ ଉଠୁଛି । ଏନେଇ ମେଣ୍ଡା ଫାଣ୍ଡିଅଧିକାରୀ ରବିନ୍ଦ୍ରକୁମାର ସାହୁଙ୍କୁ ଫୋନରେ ଯୋଗା ଯୋଗ କରିବାରୁ ତାର ଚୋରୀର ଅଭିଯୋଗ ଆସିଛି ଓ ତଦନ୍ତ ଚାଲୁରହିଛିଁ ବୋଲି କହିଛନ୍ତି । ପ୍ରକାଶ ଯେ,ବିଦ୍ୟୁତକେବୁଲରେ ମୁଲ୍ୟବାନ ତମ୍ବାତାର ରହିଥାଏ ଓ ବାହାରେ ଏହାର ଚାହିଦା ରହିଛି । ଚୋରମାନେ ରାତିରେ ଚୋରୀକରି କିଛି ନିଦ୍ଦିଷ୍ଟ ବ୍ୟବସାୟୀଙ୍କୁ ଏହାକୁ ବିକ୍ରି କରୁଛନ୍ତି । ଏବେ କେବୁଲ ତାର ଚୋରୀ ହୋଇ ଯାଇଥିବାରୁ ବହୁଗୁଡିଏ ଜଳ ଯୋଗାଣ ପ୍ରକଲ୍ପ ଅଚଳ ହୋଇ ପଡିଛି । ପୋଲିସ ବିଭାଗ ତୁରନ୍ତ ଏନେଇ ପଦକ୍ଷେପ ନେବାକୁ ଅଞ୍ଚଳବାସୀ ଦାବି କରିଛନ୍ତ I