16-Jul-2024

ବଲାଙ୍ଗୀର(ପ୍ରେରଣା ଖବର ): ଆଜି ଭୋର ସକାଳୁ ଭୁବନେଶ୍ୱରରୁ ଭବାନୀପାଟଣାକୁ ଫେରୁଥିବା ଦିଳଖୁସ୍ ବସ ଦୁର୍ଘଟଣାଗସ୍ତ ହୋଇଛି। ଏଥିରେ ୨୦ଜଣ ଯାତ୍ରୀ ଆହତ ହୋଇଛନ୍ତି ଓ ସେମାନଙ୍କୁ ଭୀମଭୋଇ ମେଡିକାଲ କଲେଜ ହସପିଟାଲରେ ଭର୍ତ୍ତି କରା ଯାଇଛି ବୋଲି ଜଣାଯାଇଛି । ମିଳିଥିବା ତଥ୍ୟରୁ ଜଣାଯାଇଛି ଯେ, ଆଜି ଭୁବନେଶ୍ୱରରୁ ବଲାଙ୍ଗୀର ଦେଇ ଭବାନୀପାଟଣାକୁ ଆସୁଥିବା ଦିଲଖୁସ୍ ବସ ଜାତୀୟ ରାଜପଥ-୫୭ର ପୁଇଁତଳା ଛକରେ ରାସ୍ତାକଡାରେ ଛିଡା ହୋଇଥିବା ଏକ ହାଇୱାକୁ ପଛପଟୁ ଧକ୍କା ଦେଇଥିଲା । ଏହି ଦୁର୍ଘଟଣା ଫଳରେ ବସର ଆଗପଟ ସଂପୂର୍ଣ୍ଣ ଚେପା ହୋଇଯାଇଥିଲା। ବସରେ ଥିବା ଯାତ୍ରୀମାନଙ୍କୁ ମଧ୍ୟରୁ ୨୦ଜଣ ପୁରୁଷ /ମହିଳା ଆହତ ହୋଇଥିଲେ ଓ ସେଥିରୁ ୩ଜଣ ଗୁରୁତର ରହିଛନ୍ତି। ପୁଇଁତଳା ଥାନା ପାଖରେ ଏହା ହୋଇ ଥିବାରୁ ପୋଲିସ ପହଞ୍ଚି ସମସ୍ତ ଆହତଙ୍କୁ ଉଦ୍ଧାର କରି ଭୀମଭୋଇ ମେଡିକାଲ କଲେଜ ହସପିଟାଲକୁ ନେଇ ଭର୍ତ୍ତି କରାଇଥିଲେ । ତେବେ ବଲାଙ୍ଗୀର ପାଖରେ ଅନେକ ଗୁଡିଏ ରାତ୍ରୀକାଳିନ ଯାତ୍ରୀବାହୀ ବସ ଦୁର୍ଘଟଣା ହେଉ ଥିବାରୁ ଯାତ୍ରୀମାନେ ଭୟଭୀତ ହୋଇପଡିଛନ୍ତି। ଗତ କିଛି ଦିନ ପୂର୍ବରୁ ବଲାଙ୍ଗୀର ସହର ମଧ୍ୟରେ ଭାଗିରଥିଛକରେ ଏକ ଯାତ୍ରୀବାହୀ ବସ ଆଉ ଏକ ବସକୁ ଓଭରଟେକ୍ କରୁଥିବା ବେଳେ ପଛପଟୁ ଧକ୍କାଦେଇ ଥିଲା । ସେହି ଘଟଣାରେ ମଧ୍ୟ ଯାତ୍ରୀମାନେ ଆହତ ହୋଇଥିଲେ । ଫଳରେ ବସରେ ଯାତ୍ରା କରିବାକୁ ଯାତ୍ରୀମାନେ ଭୟ କରୁଛନ୍ତି । ଠିକ ସେହିପରି ଆଜି ସକାଳ ୧୧ଟା ବେଳେ ଏନଏଚ- ୫୭ର ଅର୍ଜୁଣ୍ଡାଛକରେ ରାସ୍ତାରେ ଆସୁଥିବା ଜଣେ ବୃଦ୍ଧାଙ୍କୁ ଏକ ଅଜଣାଗାଡି ଧକ୍କା ଦେଇଥିଲା । ଘଟଣାସ୍ଥଳରେ ହିଁ ସେହି ବୃଦ୍ଧାଙ୍କର ମୃତ୍ୟୁ ହୋଇଥିଲା । ଫଳରେ ଉତ୍ତେଜିତ ଲୋକମାନେ ଅର୍ଜୁଣ୍ଡାଛକରେ ଛକରେ ରାସ୍ତା ଅବରୋଧ କରି ଧାରଣା ଦେଇଥିଲେ। ଏହି ରାସ୍ତାରେ ବାରମ୍ବାର ଦୁର୍ଘଟଣା ଘଟୁଥିବାରୁ ଲୋକମାନେ ଭୟରେ ଯିବା ଆସିବା କରୁଛନ୍ତି ।