16-Jul-2024

ନବରଙ୍ଗପୁର(ମିହିର ଶଙ୍କର ପାତ୍ର) ୨୫୦ ବର୍ଗଫୁଟ୍ ବିଶିଷ୍ଟ ପ୍ରଧାନମନ୍ତ୍ରୀ ଆବାସ ପକ୍କାଘର ତିଆରି ହେଉଛି ୧ ଲକ୍ଷ ୩୦ ହଜାର ଟଙ୍କାରେ। କିନ୍ତୁ ୧୫୪ ବର୍ଗଫୁଟ୍ ବିଶିଷ୍ଟ ଯାତ୍ରୀ ପ୍ରତୀକ୍ଷାଳୟ ପାଇଁ ଖର୍ଚ୍ଚ ହେଉଛି ୫ ଲକ୍ଷ ୧୮ ହଜାର ଟଙ୍କା। ଲକ୍ଷ୍ମୀବସ୍ ପାଇଁ ଯାତ୍ରୀ ପ୍ରତୀକ୍ଷାଳୟ ନିର୍ମାଣ ନାଁରେ ସରକାରୀ ଅର୍ଥ ହରିଲୁଟ୍ ହୋଇଥିବା ଅଭିଯୋଗ ଆସିଛି।ଏହି ଟଙ୍କା ହଡ଼ପ ପାଇଁ ନିର୍ମାଣକାରୀ ଠିକାଦାର କେବଳ ଦାୟୀ ନୁହନ୍ତି, ସରକାରୀ ବାବୁ ମାନେ ଵି ସାମିଲ । ଏହି ଯୋଜନାରେ ତିଆରି ହେଉଥିବା ଲକ୍ଷ୍ମୀ ବସ୍‌ ପ୍ରତୀକ୍ଷାଳୟ ଗୁଡ଼ିକ ୧୫୪ ବର୍ଗଫୁଟ୍‌ ବିଶିଷ୍ଟ। ଏଥିରେ ୪ଟି କଲମ, ଗୋଟିଏ କାନ୍ଥ, ଗୋଟିଏ ସିମେଣ୍ଟ ବେଞ୍ଚ ଓ ଛାତ ରହୁଛି। କିଛି ସ୍ଥାନରେ ଚଟାଣରେ ଟାଇଲ୍‌ ବିଛାଯାଇ ଥିବାବେଳେ ଅନ୍ୟସ୍ଥାନରେ କେବଳ ସିମେଣ୍ଟ ପଲସ୍ତର  କରାଯାଇଛି। ଏହାର ମୋଟ ଅଟକଳ ହେଉଛି ୫ ଲକ୍ଷ ୧୮ ହଜାର ଟଙ୍କା ଅନ୍ୟପକ୍ଷରେ  'ପ୍ରଧାନମନ୍ତ୍ରୀ ଗ୍ରାମୀଣ ଆବାସ' ଯୋଜନାରେ ପକ୍କାଘର ତିଆରି ପାଇଁ ଗ୍ରାମାଞ୍ଚଳର ଗରିବ ହିତାଧିକାରୀଙ୍କୁ ୨୫୦ ବର୍ଗଫୁଟ୍‌ ବିଶିଷ୍ଟ ଛାତପକା ଘର ପାଇଁ ୧ ଲକ୍ଷ ୩୦ ହଜାର ଟଙ୍କା ମଞ୍ଜୁର ହେଉଛି। ସେତିକି ଟଙ୍କାରେ ହିତାଧିକାରୀ ଘର ନିର୍ମାଣ କରୁଛନ୍ତି। ଏହି ଘରେ ପୁଣି କବାଟ, ଝରକା ଆଦି ବିଭିନ୍ନ ଉପାଦାନ ରହୁଛି ଯାହା ପ୍ରତୀକ୍ଷାଳୟରେ ନାହିଁ।ଦୁଇଟି ଯୋଜନାର ତଦାରଖ ଗୋଟିଏ ସଂସ୍ଥା କରୁଥିବାବେଳେ ଖର୍ଚ୍ଚ ଅଟକଳରେ ଆକାଶପାତାଳ ଫରକ ଦେଖିବାକୁ ମିଳୁଛି। ପ୍ରଧାନମନ୍ତ୍ରୀ ଗ୍ରାମୀଣ ଆବାସ ପାଇଁ ବର୍ଗଫୁଟ୍ ପିଛା ୫୨୦ ଟଙ୍କା ବ୍ୟୟ ହେଉଥିବା ବେଳେ,ପ୍ରତୀକ୍ଷାଳୟ ପାଇଁ ବର୍ଗଫୁଟ୍ ପିଛା ୩୩୬୩ ଟଙ୍କା ଖର୍ଚ୍ଚ ହେଇଛି ଯାହା ବଜାର ଦରଠାରୁ ମଧ୍ୟ ୫ ଗୁଣରୁ ଅଧିକ ବ୍ୟୟ ହୋଇଥିବା ନିର୍ମାଣ ବିଶେଷଜ୍ଞମାନେ କହୁଛନ୍ତି