05-Jul-2024

ବାଲାଙ୍ଗୀର (ପ୍ରେରଣା ଖବର): ବଲାଙ୍ଗୀର ଜିଲ୍ଲା ପୁଇଁତଳା ବ୍ଲକଅଞ୍ଚଳରେ ୧୦୦ଏକର ଜମିରେ ଭିଟାମିନଯୁକ୍ତ ଧାନ ଓ ୧୦ ଏକର ଜମିରେ ସଜନାଚାଷ କରାଯିବାକୁ ପ୍ରଗତି ଫାର୍ମର୍ସ ପ୍ରଡ୍ୟୁସରକମ୍ପାନୀ ଲକ୍ଷ୍ୟ ରଖିଛି । ସେଥିପାଇଁ ଚାଷିଙ୍କୁ ଆବଶ୍ୟକ ତାଲିମ ଦେବା ସହିତ ଆଜି ଚାଷିଙ୍କୁ ମାଗଣାରେ ବିହନବଣ୍ଟନ କରିଛି । ପୁଇଁତଳା ବ୍ଲକର ଛତାପିପଲ ପଞ୍ଚାୟତର କୁଣ୍ଡାମାଳ ଗାଁଠାରେ ଥିବା ପ୍ରଡ୍ୟୁସରକମ୍ପାନୀର କାର୍ଯ୍ୟାଳୟରେ ଆଜି ଏହି ବିହନବଣ୍ଟନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ପ୍ରଗତି ଏଫପିଓର ପରିଚାଳନା ନିର୍ଦ୍ଦେଶକ ମୋତିଲାଲ ମିଶ୍ରଙ୍କ ସଭାପତିତ୍ୱ ଓ କମ୍ପାନୀର ବିଟିଏମ ବାସୁଦେବ ବସ୍ତିଆଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବରେ ପୁଇଁତଳା ବ୍ଲକର ସହକାରୀ କୃଷିଅଧିକାରୀ ଅଭିଷେକ ପାଢୀ,ସମ୍ମାନୀତ ଅତିଥି ଭାବରେ ସାମ୍ବାଦିକ ପୂର୍ଣ୍ଣଚନ୍ଦ୍ର ପଣ୍ଡା,ମହାଶକ୍ତି ଫାଉଣ୍ଡେସନର ଜିଲ୍ଲା କ୍ଷେତ୍ରଅଧିକାରୀ ସମ୍ପଦ ପଟେଲ ପ୍ରମୁଖ ଯୋଗଦେଇ ଚାଷିଙ୍କୁ ଭିଟାମିନଯୁକ୍ତ ଧାନ ଓ ଏହାର ଚାଷସମ୍ପର୍କିତ ପରାମର୍ଶ ଦେବା ସହିତ ବିହନବଣ୍ଟନ କରିଥିଲେ । ମୋତିଲାଲ ମିଶ୍ର ପ୍ରଗତି ଏଫପିଓ ବିଷୟରେ କହିବା ସହିତ ଏହା ଚାଷିଙ୍କୁ ବିଭିନ୍ନ ସରକାରୀ ଯୋଜନା ଓ କମ୍ପାନୀର କାର୍ଯ୍ୟକ୍ରମ ସହିତ ଯୋଡିବାର କାର୍ଯ୍ୟକରୁଛି । ଗତ ୨୦୧୯ ମସିହାରୁ ଏହା କାର୍ଯ୍ୟ ଆରମ୍ଭ କରି ଆଜି ପୁଇଁତଳା ବ୍ଲକର ୧ହଜାର ଚାଷି ଓ ୨୭ଟି ମହିଳା ସ୍ୱୟଂସହାୟିକା ଗୋଷ୍ଠୀର ମହିଳାଙ୍କୁ ଯୋଡି ପାରିଛି । ଗତବର୍ଷ ଏହି ଏଫପିଓ ପକ୍ଷରୁ ୧୦ଏକର ଜମିର ଫର୍ଟିଫାଏଡ ଧାନ ବଣ୍ଟନ କରିଥିବା ବେଳେ ଚଳିତବର୍ଷ ଏହା ୧୦୦ଏକର ଜମିରେ ଏହାକୁ କରାଯିବ । ଗତବର୍ଷ ମୁଗ, ତିଆସିଚଣା ଇତ୍ୟାଦି ମଧ୍ୟ ଚାଷ କରାଯାଇଥିଲା ଓ କମ୍ପାନୀ ସେହି ଉତ୍ପାଦକୁ ଚାଷିଙ୍କଠାରୁ କିଣି ତାକୁ ପ୍ୟାକିଂ କରି ବଜାରକୁ ଛାଡିଥିଲା ବୋଲି ଶ୍ରୀ ମିଶ୍ର କହିଥିଲେ । ମୁଖ୍ୟଅତିଥି ଏଏଓ ଶ୍ର୍ରୀ ପାଢୀ ଫର୍ଟିଫାଏଡ ଧାନରୁ ଉତ୍ପାଦିତ ଭିଟାମିନଯୁକ୍ତ ଚାଉଳ ମଣିଷର ପ୍ରୋଟିନର ଆବଶ୍ୟକତାକୁ ପୂରଣ କରିଥାଏ । ପୂର୍ବରୁ ହେଉଥିବା ଧାନରେ କେବଳ ଶ୍ୱେତସାର ଥିବା ବେଳେ ଏବେ ବୈଜ୍ଞାନିକମାନଙ୍କ ଉଦ୍ୟମରେ ଧାନରେ ସିଧାସଲଖ ଭିଟାମିନ ମିଶାଇ ଚାଷି କରାଯାଇପାରୁଛି  ବୋଲି କହିଥିଲେ । ସେହିପରି ସମ୍ମାନୀତ ଅତିଥି ଶ୍ରୀ ପଣ୍ଡା ଧାନଚାଷରେ ରାସାୟନିକ ସାର ବଦଳରେ ଜୈବିକ ଖତର ବହୁଳ ବ୍ୟବହାର କରିବାକୁ ଚାଷିଙ୍କୁ ପରାମର୍ଶ ଦେଇଥିଲେ । ଆଗାମୀଦିନରେ ପୁଇଁତଳା ବ୍ଲକ ଲୋୟରସୁକତେଲ ପ୍ରକଲ୍ପର ଜଳରୁ ଜଳସେଚିତ ହେବାକୁ ଯାଉଛି ଓ ସରକାର ଧାନ କ୍ୱିଣ୍ଟାଲ ୩୧୦୦ କରିବାକୁ ଯାଉଛନ୍ତି । ତେଣୁ ପୁଇଁତଳା ବ୍ଲକଅଞ୍ଚଳର ଚାଷି ଉନ୍ନତକିସମର ଭିଟାମିନଯୁକ୍ତ ଧାନବିହନ ନେଇ ଚାଷକରି ଉପକୃତ ହେବାକୁ କହିଥିଲେ । ଅନ୍ୟତମ ପରିଚାଳନା ନିର୍ଦ୍ଦେଶକ ମଧୁସୂଦନ କ୍ଷେତି ଚାଷିଙ୍କୁ ସଜନାଚାଷ ବିଷୟରେ ତାଲିମ ଦେଇଥିଲେ । ଅନ୍ୟମାନଙ୍କ ମଧ୍ୟରେ ଏଫପିଓ ନିର୍ଦ୍ଦେଶକ ସୁରେନ୍ଦ୍ର ମହାକୁର,ବନମାଳୀ ଖମାରୀ, ତ୍ରୀନାଥ ମହାକୁର,ପ୍ରହଲ୍ଲାଦ ଡାଙ୍ଗ,ବିଟିଏମ ପ୍ରଦୀପ କୁମାର ବନପଲେିଇ, ର୍ମଚାରୀ ସତ୍ୟାନନ୍ଦ ମହାକୁର,ଲକ୍ଷ୍ମଣ ଡାଙ୍ଗଙ୍କ ସହ ଶତାଧିକ ଚାଷି ଉପସ୍ଥିତ ରହିଥିଲେ ।