21-May-2024

ବଲାଙ୍ଗିର: ଜାତିପ୍ରଥାର ଶିକାର ହୋଇଥିବା ଗୋଟିଏ ଶବ ଏବଂ ଦୁଇଟି ଅପରିଚିତ ଶବ ମିଶି ତିନୋଟି ଶବକୁ ଏକାସାଙ୍ଗରେ ସସମ୍ମାନେ ସତ୍କାର କରିଛି ବଲାଙ୍ଗିର ସ୍ବେଚ୍ଛାସେବୀ ସଂଗଠନ। ବଲାଙ୍ଗିର ଜିଲ୍ଲା ଦେଓଗାଁ ବ୍ଲକ ଭାଲୁମୁକୁନ୍ଦ ଗ୍ରାମର ବଶିଷ୍ଠ ଧରୁଆ ଅନ୍ୟ ଜାତିର ଝିଅକୁ ପ୍ରେମବିବାହ କରି ନିଜ ଗ୍ରାମରେ ରହିଆସୁଥିଲେ। ପାରିବାରିକ କାରଣରୁ ଗତକାଲି ନିଜ ଘରେ ସେ ଆତ୍ମହତ୍ୟା କରିଦେଇଥିଲେ। ତାଙ୍କ ସ୍ତ୍ରୀ ଝୁମି ଧରୁଆଙ୍କ କହିବାନୁଯାୟୀ ସେ ନିଜେ କେଉଁଟ ଜାତିର ଝିଅ ହୋଇଥିବା ବେଳେ ଗଣ୍ଡ ଜାତିର ପୁଅକୁ ପ୍ରେମବିବାହ କରିଥିବାରୁ ମୃତ୍ୟୁ ପରେ ଜାତି ସମାଜ ତାଙ୍କ ସ୍ବାମୀଙ୍କ ଶବକୁ ବାସନ୍ଦ କରିଦେଇଥିଲେ। ସ୍ୱାମୀଙ୍କ ଅସ୍ୱାଭାବିକ ମୃତ୍ୟୁ ପରେ ଅନେକ ଅନୁରୋଧ କରିବା ସତ୍ତ୍ୱେ ମଧ୍ୟ ଗାଁରେ ଜାତି ଭାଇମାନେ ଶବକୁ ଛୁଇଁବେ ନାହିଁ କି ଦାହ କରିବେ ନାହିଁ ବୋଲି ରୋକଠୋକ ମନା କରିଦେଇଥିଲେ। ଫଳରେ ହତଭାଗା ସ୍ତ୍ରୀ ଜଣକ ବଲାଙ୍ଗିର ସ୍ବେଚ୍ଛାସେବୀ ସଂଗଠନକୁ ଯୋଗାଯୋଗ କରିବା ସହିତ ନିଜ ଛୋଟ ଛୋଟ ଦୁଇ ପୁଅଝିଅଙ୍କୁ ଧରି ବଲାଙ୍ଗିର ଭୀମ ଭୋଇ ମେଡିକାଲ କଲେଜ ହସ୍ପିଟାଲରେ ପହଞ୍ଚିଥିଲେ। ସ୍ଥାନୀୟ ପୋଲିସକୁ ଖବର କରି ଏକ ଅପମୃତ୍ୟୁ ମାମଲା ରୁଜୁ କରାଯିବା ପରେ ପୋଲିସ ଉପସ୍ଥିତିରେ ଶବ ବ୍ୟବଚ୍ଛେଦ କରାଯାଇ ସ୍ତ୍ରୀଙ୍କୁ ହସ୍ତାନ୍ତର କରଯାଇଥିଲା। ପରେ ଶବ ସତ୍କାର ପାଇଁ ମୃତକଙ୍କ ସ୍ତ୍ରୀ ଝୁମି ଧରୁଆ ନିଜକୁ ଅସହାୟ ମଣିବାରୁ ସ୍ୱାମୀଙ୍କ ଶବକୁ ସ୍ଥାନୀୟ ପୋଲିସ ଉପସ୍ଥିତିରେ ବଲାଙ୍ଗିର ସ୍ବେଚ୍ଛାସେବୀ ସଂଗଠନକୁ ଲିଖିତ ହସ୍ତାନ୍ତର କରିଦେଇଥିଲେ। ବଲାଙ୍ଗିର ସ୍ବେଚ୍ଛାସେବୀ ସଂଗଠନର ସଦସ୍ୟମାନେ ମହାପ୍ରୟାଣ ଗାଡିରେ ଶବକୁ ସ୍ଥାନୀୟ ବିଭୁତିପଡା ଶ୍ମଶାନକୁ ନେଇ ସସମ୍ମାନେ ସତ୍କାର କରି ଫେରିଥିଲେ। ଏହାସହ ଟିଟିଲାଗଡରୁ ଭିନ୍ନ ଭିନ୍ନ ସମୟରେ ସ୍ଥାନୀୟ ସ୍ବେଚ୍ଛାସେବୀ ମାନେ ଦୁଇଜଣ ବ୍ୟକ୍ତିଙ୍କୁ ଆଣି ଭୀମ ଭୋଇ ମେଡିକାଲ କଲେଜ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରି ଚାଲି ଯାଇଥିଲେ। କିଛିଦିନ ପରେ ଚିକିତ୍ସାଧିନ ଅବସ୍ଥାରେ ଭିନ୍ନ ଭିନ୍ନ ସମୟରେ ଉଭୟଙ୍କର ମୃତ୍ୟୁବରଣ ଘଟିଯାଇଥିଲା। ସ୍ଥାନୀୟ ପୋଲିସ ଶବ ଦ୍ୱୟକୁ ଜବତ କରି ବ୍ୟବଚ୍ଛେଦ କରିବା ପରେ ଔପଚାରିକତା ଦୃଷ୍ଟିରୁ ଶବ ଚିହ୍ନଟ ପାଇଁ ଶବ ସଂରକ୍ଷଣ କେନ୍ଦ୍ରରେ ସଂରକ୍ଷିତ ରଖିଥିଲା। କୌଣସି ପରିଚୟ ନ ମିଳିବାରୁ ବଲାଙ୍ଗିର ସ୍ବେଚ୍ଛାସେବୀ ସଂଗଠନକୁ ଯୋଗାଯୋଗ

ପରେ ସଦସ୍ୟମାନେ ଶବ ଦ୍ୱୟକୁ ମହାପ୍ରୟାଣ ଗାଡିରେ ସ୍ଥାନୀୟ ବିଭୁତିପଡା ଶ୍ମଶାନକୁ ନେଇ ସମ୍ମାନର ସହ ସତ୍କାର କରି ଫେରିଥିଲେ। ଏହିପରି ଭାବରେ ବଲାଙ୍ଗିର ସ୍ବେଚ୍ଛାସେବୀ ସଂଗଠନ ଦ୍ୱାରା ଏକାସାଙ୍ଗରେ ତିନିଗୋଟି ଅସହାୟ ଶବ ସତ୍କାର ସମ୍ପନ୍ନ କରାଯାଇଥିଲା। ଏହି ଶବ ସତ୍କାରରେ ବଲାଙ୍ଗିର ସ୍ବେଚ୍ଛାସେବୀ ସଂଗଠନର ଗୋବିନ୍ଦ ଚନ୍ଦ୍ର ଶତପଥୀ, ରବୀନ୍ଦ୍ର ପ୍ରଧାନ, ଲିଙ୍କନ ସେଠ, ସୀମାଞ୍ଚଲ ସୁନା, ପ୍ରଦୀପ ଜୁଏଡ, ସୁବାଷ ବାଗ ଓ ତନ୍ମୟ ପୁଟେଲ ସାମିଲ ରହିଥିଲେ।