21-May-2024

ରାୟଗଡା/ମୁନିଗୁଡ଼ା (ଲଷ୍ମୀକାନ୍ତ ବେହେରା): କୁକୁର କାମୁଡିବା ପରେ ଯୁବକ ଦେଖାଉଛନ୍ତି କୁକୁରଭଳି ଆଚରଣ l ଏଭଳି ଏକ ଘଟଣା ଦେଖିବାକୁ ମିଳିଛି ରାୟଗଡ଼ା ଜିଲ୍ଲା ଚନ୍ଦ୍ରପୁର ଅଞ୍ଚଳରେ । ପିସ୍କାପଙ୍ଗା ପଞ୍ଚାୟତ ରତନଗୁଡା ଗ୍ରାମର ହରିପୁର ବ୍ରେଡେକାଙ୍କୁ ଗତ ୩ଦିନ ତଳେ ଏକ ବୁଲାକୁକୁର କାମୁଡିଦେବା ପରେ ତାଙ୍କୁ ମୁନିଗୁଡା ଡାକ୍ତରଖାନାକୁ ଆଣି କୁକୁର କାମୁଡା ଇଞ୍ଜେକସନ ଦେବା ସହ ଚିକିତ୍ସା କରି ଘରକୁ ନେଇଥିଲେ ପରିବାର ଲୋକେ । ହେଲେ ଆଜି ସେହି ଯୁବକ ଜଣକ କୁକୁର ଭଳି ଆଚରଣ ଦେଖାଉଥିବା ଦେଖିବାକୁ ମିଳିଛି । ତେଣୁ ପରିବାର ଲୋକେ ପୁଣି ତାଙ୍କୁ ମୁନିଗୁଡା ଗୋଷ୍ଠୀ ସ୍ଵାସ୍ଥ୍ୟ କେନ୍ଦ୍ରକୁ ଆଣିବା ପରେ ଡାକ୍ତରଙ୍କ ପରାମର୍ଶ ଅନୁଯାଇ ଯୁବକକୁ ରାୟଗଡା ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇବା ପାଇଁ ପରାମର୍ଶ ଦେଇଥିବା ବେଳେ ପରିବାର ଲୋକେ ଦେଶୀ ପଦ୍ଧତିରେ ଚିକିତ୍ସା କରାଇବା ପାଇଁ ଆଗ୍ରହ ଥିବା ପରିଲକ୍ଷିତ ହୋଇଛି । ତେବେ ଆଦିବାସୀ ଅଧ୍ୟୁଷିତ ଅଞ୍ଚଳରେ ଆଦିବାସୀ ଲୋକଙ୍କ ମଧ୍ୟରେ ସଚେତନତା ଅଭାବରୁ ଆଜିବି ଚେରମୁଳି ଓ ଗୁଣି ଗାରେଡି କୁ ଅଧିକ ବିଶ୍ବାସ କରି ଅଧିକାଂଶ ସମୟରେ ଜୀବନକୁ ବାଜି ଲଗାଉଛନ୍ତି । ଅନ୍ୟପଟେ ଡାକ୍ତରଙ୍କ କହିବା ଅନୁସାରେ ଏଭଳି ଲକ୍ଷଣ ଦିର୍ଘଦିନ ତଳୁ କୁକୁରକାମୁଡା ରୋଗିଙ୍କ ପାଖରେ ଏଭଳି ଦେଖା ଦେଇଥାଏ ।