12-May-2024

ସିନ୍ଧେକେଲା(ଦୀନେଶ ଜୈନ ): କଣ୍ଟାବାଞ୍ଜି ନିର୍ବାଚନ ମଣ୍ଡଳୀରେ ବିଜେଡି ପକ୍ଷରୁ ନିଜେ ପ୍ରାର୍ଥୀ ହୋଇଥିବା ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଜ ନିର୍ବାଚନ ମଣ୍ଡଳୀ ଅନ୍ତର୍ଗତ ସିନ୍ଧେକେଲା ଗସ୍ତରେ ଆସୁଛନ୍ତି । ସ୍ଥାନୀୟ ସାପ୍ତାହିକ ବଜାର ନିକଟ ଖାଲି ପଡିଆରେ ବିଜେଡି ସମାବେଶରେ ମୁଖ୍ୟମନ୍ତ୍ରୀ ପୂର୍ବାହ୍ନ ୧୧ଟା ରେ ଯୋଗଦେବାର କାର୍ଯ୍ୟକ୍ରମ ରହିଛି । ବଲାଙ୍ଗିର ସଂସଦୀୟ କ୍ଷେତ୍ରର ସାଂସଦ ପ୍ରାର୍ଥୀଙ୍କ ସହ କ୍ଷେତ୍ରର ନିଜ ବିଧାନସଭା ସହ ୭ ବିଧାନସଭା କ୍ଷେତ୍ରର ଦଳୀୟ ପ୍ରାର୍ଥୀଙ୍କ ସପକ୍ଷରେ ମୁଖ୍ୟମନ୍ତ୍ରୀ ଭୋଟ ଭିକ୍ଷା କରିବେ । ମୁଖ୍ୟମନ୍ତ୍ରୀଙ୍କ ଗସ୍ତ ଓ ସଭା କୁ ନେଇ ସୁରକ୍ଷା ଏଜେନ୍ସି ପକ୍ଷରୁ ତୁହାକୁ ତୁହା ସୁରକ୍ଷା ବ୍ୟବସ୍ଥା ଯାଞ୍ଚ କରାଯାଉଛି ।  ପୁଲିସ ପକ୍ଷରୁ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି । ବଲାଙ୍ଗିର ଏସ୍ପି ଖିଲାରୀ ରିଷୀକେଶ ଦ୍ୱାନଦେଓଙ୍କ ତତ୍ତ୍ୱାବଧାନରେ ତଥା ଟିଟିଲାଗଡ଼ ଏସ୍ଡିପିଓ ଅଙ୍କିତା କୁମ୍ଭାର ଙ୍କ ଦେଖରେଖ ରେ ମୁଖ୍ୟମନ୍ତ୍ରୀଙ୍କ ସୁରକ୍ଷା କୁ ସୁନିଶ୍ଚିତ କରାଯାଉଥିବା ସ୍ଥାନୀୟ ପୁଲିସ ଅଧିକାରୀ ବସନ୍ତ ଦଳାଇ ସୂଚନା ଦେଇଛନ୍ତି ।

କଣ୍ଟାବାଞ୍ଜି  ରୁ ଭବାନୀପାଟଣା କୁ ଯାଉଥିବା ମୁଖ୍ୟ ରାସ୍ତାକଡ଼ରେ ମୁଖ୍ୟମନ୍ତ୍ରୀ ଙ୍କ କାର୍ଯ୍ୟକ୍ରମ ରହିଥିବାରୁ ଟ୍ରାଫିକ ସମସ୍ୟା ପାଇଁ ପୁଲିସ ବ୍ୟବସ୍ଥା କରାଯାଇଥିବା ସହ ବାଲି ବୋଝେଇ ଗାଡି ଓ ଭାରିଯାନ ଙ୍କୁ ସମ୍ପୁର୍ଣ୍ଣ ବାରଣ କରାଯାଇଛି । ସଭା ସ୍ଥଳରେ ପ୍ରାୟ ୨୫ ପ୍ଲାଟୁନ ଫୋର୍ସ ଓ ୩୦୦ ହୋମଗାଡ଼ ଙ୍କ ସହ ବରିଷ୍ଠ ପୁଲିସ ଅଧିକାରୀ  ମଧ୍ୟ ମୃତୟନ ରହିବେ ବୋଲି ପୁଲିସ ସୂଚନା ଦେଇଛି ।  ମୁଖ୍ୟମନ୍ତ୍ରୀଙ୍କ ସଭା ସ୍ଥଳରେ ଜିଲ୍ଲା ବିଜେଡି କର୍ମକର୍ତ୍ତାଙ୍କ ସହ ସାଂସଦ ଓ ବିଧାୟକ ପ୍ରାର୍ଥୀ ଉପସ୍ଥିତ ରହିବେ ବୋଲି ସୂଚନା ମିଳିଛି ।