22-Apr-2024

ବୀରମହାରାଜପୁର, (ବିନୋଦ ପାଣ୍ଡେ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ଉପଖଣ୍ଡର ସୁବଳୟା ଥାନା ଅଞ୍ଚଳରେ ଖୁଲମଖୁଲା ଭାବେ ଚାଲିଛି ବେଆଇନ ଦେଶୀ ମଦ କରାବାର। ଉକ୍ତ ଥାନା ଅନ୍ତର୍ଗତ ଏକ ନିର୍ଦ୍ଦିଷ୍ଟ ସ୍ଥାନରେ ମଦ ମାଫିଆମାନେ ମଦ ପ୍ରସ୍ତୁତି କରିବା ସହ ମଦକୁ ଅଧିକ ନିଶାଯୁକ୍ତ କରିବା ପାଇଁ ମଦ ମାଫିଆମାନେ  ପୋଚରେ ମହୁଲ ସହ ନିର୍ଗୁଣ୍ଡି ଗଛର ଛାଲି,ଅମରି ପତ୍ର,ସାହାଜ ପତ୍ର, ୟୁରିଆ ସାର ଓ ସବୁଠାରୁ ବିପଜ୍ଜନକ ଗାଡ଼ି ପଙ୍କଚର ସଜାଡିରେ ବ୍ୟବହୃତ ସାଲ୍ୟୁସନ ଓ ଭଲିଓନ ଟେନ ଆଦି ବିଷାକ୍ତ ଜିନିଷ ପକାଇ ମଦ ପ୍ରସ୍ତୁତି କରୁଥିବା ଜଣେ ମଦ ଚୋରାଚାଲାଣ କରୁଥିବା  ବ୍ୟକ୍ତି ଗୁପ୍ତ ନାମରେ ପ୍ରକାଶ କରିଛନ୍ତି। ଉକ୍ତ ମଦ ବେପାରୀ  ବିଭିନ୍ନ ଗାଁ' ର ଥିବା କୁଚିଆ ବିକ୍ରେତା ମଦ ବେପାରୀ ମାନଙ୍କୁ ଘରକୁ ଘର ହୋମଡେଲିଭରି ଭାବେ କମ୍ ମୂଲ୍ୟରେ ଯୋଗାଇ ଦେଉଥିବା ଉକ୍ତ ବ୍ୟକ୍ତି ଜଣକ ପ୍ରକାଶ କରିଛନ୍ତି।  ଅତି ନିକଟରେ ଓ ସହଜରେ ମଦ ମିଳୁଥିବାରୁ ଅଞ୍ଚଳରେ ମଦୁଆଙ୍କ ସଂଖ୍ୟା କ୍ରମଶଃ ବଢ଼ିବାରେ ଲାଗିଛି। ତେବେ ଏଭଳି ବିଷାକ୍ତ ସାମଗ୍ରୀ ଶରୀର ମଧ୍ୟକୁ ପ୍ରବେଶ କରେ କ'ଣ ହେଉଥିବ ତାହା ସହଜେ ଅନୁମେୟ। କିନ୍ତୁ ନିଶା ପାଇଁ ପାଗଳ ସାଜିଥିବା ଲୋକେ ଏ ସବୁକୁ ଆଖି ବୁଜି ଦେଇଥିବା ଜଣାପଡିଛି।  ଅପମିଶ୍ରିତ ମଦପିଇ ସୁବଳୟା ଅଞ୍ଚଳର ବିଭିନ୍ନ ଗ୍ରାମର ଅନେକ ଲୋକ ରୋଗଗ୍ରସ୍ତ ହେଲେଣି।  ମଦ ବେପାରୀ ମାନେ ଲୋକଙ୍କ ସହ ଏହି ବିପଜ୍ଜନକ ଖେଳ ଖେଳୁଥିବା ବେଳେ ଅବକାରୀ ଓ ପୁଲିସ ବିଭାଗ ନିଦାବିଷ୍ଣୁ ସାଜିଛନ୍ତି। ବୋଧହୁଏ କୈାଣସି ବଡ଼ ଧରଣର ଦୁର୍ଘଟଣା ଘଟିବା ପରେ ଏମାନଙ୍କ ନିଦ ଭାଙ୍ଗିବ ବୋଲି ଅଞ୍ଚଳର ସଚେତନତା ନାଗରିକ ମାନେ ଟିପ୍ପଣୀ ଦେଇଛନ୍ତି। ସେହିପରି ପିତାମହୁଲ, ଟେଭାପଦର, ଖଣ୍ଡହତା, ସଂଗ୍ରାମପୁର, ଟିକରାପଡା, ମେଟାକାନୀ ଛକ, କୁଶାଦାଦର, ତେନ୍ତୁଲିମହଦା,  ଡୁଲେଶ୍ଵର,  ଚୁପକାଦାଦାର, ସାହଜଲଥା ,ଓ ଅନ୍ୟାନ୍ୟ ସ୍ଥାନରେ ବିକ୍ରି ହେଉଥିବା ଜଣାଯାଇଛି। ତୁରନ୍ତ ଜିଲ୍ଲା ପ୍ରଶାସନ ଓ ବିଭାଗୀୟ ଅଧିକାରୀ ଏଥିପ୍ରତି ଦୃଷ୍ଟି ଦେବା ସହ ଉକ୍ତ ସ୍ଥାନରେ ବିକ୍ରି ହେଉଥିବା ଅପମିଶ୍ରିତ ମଦ ବନ୍ଦ କରିବା ପାଇଁ ଦାବି ହେଉଛି।