19-Feb-2024

ବଲାଙ୍ଗୀର : ବଲାଙ୍ଗୀରରୁ ପ୍ରକାଶ ପାଉଥିବା ରଙ୍ଗୀନ୍ ସମ୍ଭ୍ରାନ୍ତ ପାକ୍ଷିକ ସମ୍ବାଦପତ୍ର ' ତକ୍ଷକ ' ର ୧୮ ତମ ସ୍ୱନକ୍ଷତ୍ର ଉତ୍ସବ ମହାସମାରୋହରେ ପାଳିତ ହୋଇଯାଇଛି । ସ୍ଥାନୀୟ ରୁଗୁଡିପଡା ଶେରସୁଆଁଗୁଡିଠାରେ ଆଡମ୍ବରରେ ଆୟୋଜିତ ଏହି ବାର୍ଷିକ ଉତ୍ସବରେ ବହୁଭାଷୀ କବିତା ଆସର , ଉଦ୍ଘାଟନୀ ସଭା , ସମ୍ବର୍ଦ୍ଧନା ପର୍ବ , ହାସ୍ୟକବି ସମ୍ମିଳନୀ ଓ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏହି ଅବସରରେ ପତ୍ରିକାର ବାର୍ଷିକସଂଖ୍ୟା ସହ ଚଳିତ ସଂଖ୍ୟା ଉନ୍ମୋଚିତ ହୋଇଥିଲା ।

ପ୍ରଥମେ ଆବହସଂଗୀତ ଓ ଭଜନ ଗାନ ହୋଇଥିଲା ଓ ଏହାକୁ ସୁମି ମହାନ୍ତି ଓ ଅମିତ ମହାନ୍ତି , ହାସ୍ୟକବି ଅର୍ଜୁନ ସାହୁ ଓ ପୂଜାରୀ ଗ୍ରୁପ୍ ପରିବେଷଣ କରିଥିଲେ । ଏହାପରେ କବି କଳାକାର କପିଳେଶ୍ୱର ଖମାରୀ , ବ୍ୟଙ୍ଗକବି ରସରାଜ ଅଚ୍ୟୁତ ପୁରୋହିତ ଓ ବରଗଡର ବ୍ୟଙ୍ଗକବି ନୀତିଶ୍ ଆଚାର୍ଯ୍ୟ ମଂଚାସୀନ ଥିବାବେଳେ କବୟତ୍ରୀ ଚୁମ୍ କୀ ଦାଶ ( ମିଶ୍ର ) ଏବଂ କବି ରତ୍ନମୟ ତ୍ରିପାଠୀ ସଂଯୋଜନାରେ ବଲାଙ୍ଗୀର , ସୋନପୁର , ବରଗଡର ଶତାଧିକ କବି / କବୟତ୍ରୀ ସ୍ୱରଚିତ କବିତା ପାଠ କରିଥିଲେ ।

 ପତ୍ରିକାର ମୁଖ୍ୟ- ସମ୍ପାଦକ ମ ଳ ୟ ମି ଶ୍ରଙ୍କ ସଭାପତିତ୍ୱରେ ଅନୁଷ୍ଠିତ ଉଦ୍ ଘାଟନୀ ସଭାରେ ମୁଖ୍ୟଅତିଥି ଭାବେ ଗୀତିକାର ଓ ସୁସାହିତ୍ୟିକ ପଦ୍ମଶ୍ରୀ ନରସିଂହ ପ୍ରସାଦ ଗୁରୁ , ମୁଖ୍ୟବକ୍ତା ଭାବେ ଭୁବନେଶ୍ୱରର ସ୍ୱଦେଶୀ ଜାଗରଣ ମଞ୍ଚର ସଦସ୍ୟ ଅନ୍ନଦା ପ୍ରସାଦ ପାଣିଗ୍ରାହୀ , ସମ୍ମାନିତ ଅତିଥି ଭାବେ ସୁବର୍ଣ୍ଣପୁର ଜିଲ୍ଲାର ବରିଷ୍ଠ ଲେଖକ ଶଶିଭୂଷଣ ମିଶ୍ର ଅଭିଭାଷଣ ଦେଇଥିଲେ । 'ତକ୍ଷକ ' ର ସମ୍ପାଦକ ବିଶ୍ୱମୟ ପୂଜାରୀ ସମ୍ପାଦକୀୟ ବିବରଣୀ ପଠନ କରିଥିଲେ । ଅଭିନେତା ହିମାଂଶୁ ଖମାରୀ ପ୍ରାରମ୍ଭିକ ଭାଷଣ ଦେଇଥିବାବେଳେ କବି - ଅଭିନେତା - ପ୍ରଶାସକ ଗୋବର୍ଦ୍ଧନ ଭୋଇ ସଭା ପରିଚାଳନା କରିଥିଲେ । ଅତିଥିମାନଙ୍କ ଦ୍ୱାରା ମାଆ ସରସ୍ୱତୀଙ୍କ ଫଟୋଚିତ୍ରରେ ପୁଷ୍ପାର୍ପଣ ଓ ଦୀପ ପ୍ରଜ୍ଜ୍ୱଳନ କରାଯାଇଥିଲା ।

ମୁଖ୍ୟବକ୍ତା କହିଥିଲେ ଯେ , ପୂର୍ବଠାରୁ ସମ୍ବାଦପତ୍ରଗୁଡିକର ଖବର ପରିବେଷଣର ଶୈଳୀ ଅଧିକନ୍ତୁ ବ୍ୟବସାୟିକ ହୋଇପଡିଥିଲବେଳେ ଗୁଣାତ୍ମକମାନ ହ୍ରାସ ପାଇଛି । ଅଧୁନାତନ ସୋସିଆଲ୍ ମିଡିଆ ଅସାମାଜିକତାର ପ୍ରଚାର ପ୍ରସାର କରୁଛି । ଖବର ବା ନିଉଜ୍ ରେ ଟଣାଓଟରା , ବିବରଣୀ ଓ ଅନ୍ୟାନ୍ୟ ବିବାଦୀୟ ପ୍ରସଙ୍ଗକୁ ଗୁରୁତ୍ୱ ଦିଆଯିବାରୁ ସମାଜରେ ଖରାପ ପ୍ରଭାବ ପଡୁଛି । ଏଣୁ ଏବେ ନିଉଜ୍ ଭିତରେ ଗଠନମୂଳକ ଭିଉଜ୍ ର ଆବଶ୍ୟକତା ରହିଛି । ଏବଂ କେବଳ ପ୍ରିଂଟ୍ ମିଡିଆରେ ହିଁ ଏହା ସମ୍ଭବ । ଏହା ଏକ ଉତ୍ତମ ରାଷ୍ଟ୍ରଗଠନରେ ସହାୟକ ହୋଇପାରିବ ।

ମୁଖ୍ୟଅତିଥି ଶ୍ରୀ ଗୁରୁ ତାଙ୍କର ସ୍ୱଳ୍ପ ଅଭିଭାଷଣରେ 'ତକ୍ଷକ' ର ଭୂମିକାକୁ ପ୍ରଶଂସା କରିବା ସହିତ ଏହା ଏକ ଉଚ୍ଚମାନର ସମାଲୋଚନାର ସମ୍ବାଦପତ୍ର ବୋଲି ଅଭିହିତ କରିଥିଲେ । ସମ୍ମାନିତ ଅତିଥି ଶ୍ରୀ ମିଶ୍ର ' ତକ୍ଷକ ' ନାମକରଣର ପୌରାଣିକ ଅର୍ଥ ବ୍ୟାଖ୍ୟା କରିଥିଲେ । ମୁଖ୍ୟ-ସମ୍ପାଦକ ଶ୍ରୀ ମିଶ୍ର ତାଙ୍କର ସଭାପତୀୟ ଅଭିଭାଷଣରେ ପତ୍ରିକାର ଉଦ୍ଦେଶ୍ୟ , ତର୍ଜମାତ୍ମକ ସାମ୍ବାଦିକତା ଓ ଗଣମାଧ୍ୟମର ସାମୂହିକ ପ୍ରଭାବ ସମ୍ପର୍କରେ ସାରଗର୍ଭକ ଉପସ୍ଥାପନା କରିଥିଲେ ।

ଏହି ଅବସରରେ ସମାଜର ବିଭିନ୍ନ କ୍ଷେତ୍ରରେ କୃତୀତ୍ୱ ଅର୍ଜନ କରିଥିବା ବଲାଙ୍ଗୀର ଜିଲ୍ଲାର ୧୧ ଜଣ ବ୍ୟକ୍ତିବିଶେଷଙ୍କୁ ସମ୍ବର୍ଦ୍ଧିତ କରାଯାଇଥିଲା । ଏମାନଙ୍କ ମଧ୍ୟରେ ଅସ୍ଥିଶଲ୍ୟ ବିଶେଷଜ୍ଞ ଡା ଅନନ୍ତରାମ ମେହେର , ବୁର୍ଲା ଭୀମସାରର ପ୍ରଫେସର ଡା ବେଣୁଧର ପାଣ୍ଡେ , କ୍ରୀଡାବିତ୍ ସୁକାନ୍ତ ପାଣିଗ୍ରାହୀ , ସମାଜସେବୀ ରଞ୍ଜୁ ରାୟମନ୍ , ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁ , ଅବସରପ୍ରାପ୍ତ ସୈନିକ ପ୍ରତାପ ଚନ୍ଦ୍ର ରଥ , କବୟତ୍ରୀ ଚୁମ୍‌କୀ ଦାଶ (ମିଶ୍ର ) , ସାମ୍ବାଦିକ ପୂର୍ଣ୍ଣଚନ୍ଦ୍ର ପଣ୍ଡା, ସୁଶ୍ରୀ ଅନ୍ୱେଷା ଷଡଙ୍ଗୀ , ଶ୍ରୀ ମୋଦୀ ତଥା ଅନ୍ୟମାନଙ୍କୁ ମାନପତ୍ର ପ୍ରଦାନ କରାଯାଇଥିଲା । 

ଏହାସହିତ ବ୍ୟଙ୍ଗକବି / କବୟତ୍ରୀ ନୀତିଶ୍ ଆଚାର୍ଯ୍ୟ , ଅଚ୍ୟୁତ ପୁରୋହିତ , ସୋନାଲୀ ପାଢୀ ଓ ଅନ୍ୟମାନଙ୍କୁ ମୋମେଣ୍ଟୋ ପ୍ରଦାନ ପରେ ସେମାନଙ୍କର ହାସ୍ୟକବିତା ପାଠ କରି ଉପସ୍ଥିତ ଦର୍ଶକମଣ୍ଡଳୀଙ୍କର ମନୋରଞ୍ଜନ କରିଥିଲେ । ଶେଷରେ 'ପ୍ରେରଣା ' ର ସମ୍ପାଦକ ରଘୁନନ୍ଦନ ସିଂ ଧନ୍ୟବାଦ ଅର୍ପଣ କରିଥିଲେ । ଏହି ସମାରୋହରେ ବଲାଙ୍ଗୀର ସହର ଓ ଜିଲ୍ଲା ସମେତ ସୁବର୍ଣ୍ଣପୁର , ବରଗଡ ଓ ଭୁବନେଶ୍ୱରରୁ କବି , କଳାକାର , ସାମ୍ବାଦିକଙ୍କ ସମେତ ସହଶ୍ରାଧିକ ବୁଦ୍ଧିଜୀବୀଙ୍କର ସମାବେଶ ହୋଇଥିଲା ।