05-Feb-2024

ବଲାଙ୍ଗୀର (ପ୍ରେରଣା ଖବର ): ଲକ୍ଷ୍ମୀବସରେ ନିଯୁକ୍ତି କରଇବାକୁ କହି ଠକଗୋଷ୍ଠି ଅର୍ଥ ଆଦାୟ କରୁଥିଲେ । ପରିବହନ ବିଭାଗର ଏଟିଏମଙ୍କ ଅଭିଯୋଗକ୍ରମେ ଟିଟିଲାଗଡ ପୋଲିସ ଦୁଇଜଣ ଦଲାଲକୁ ଧରି କୋର୍ଟଚାଲାଣ କରିଛି । କିନ୍ତୁ ପରିବହନ ବିଭାଗ ବଲାଙ୍ଗୀର ଥାନାରେ ଏତଲା ନଦେଇ ଟିଟିଲାଗଡ ଥାନାରେ ଏତଲା ଦେବାକୁ ନେଇ ଲୋକଙ୍କ ମଧ୍ୟରେ ସନ୍ଦେହ ପ୍ରକାଶ ପାଉଛି । ପରିବହନ ବିଭାଗ ନିଜ ମୁଣ୍ଡରୁ ଦୋଷ ଛଡାଇବାକୁ ଉଦ୍ୟମ କରୁଥିବା ଅଭିଯୋଗ ଉଠୁଛି । ଏପରିକି ଉପରମହଲର ନିର୍ଦ୍ଦେଶରେ ବଲାଙ୍ଗୀର ଥାନା ବଦଳରେ ଟିଟିଲାଗଡ ଥାନାରେ ଏତଲା କରାଯାଇଥିବା ଖୋଦ ଏଟିଏମ ଅମିତ ମିଶ୍ର କହୁଛନ୍ତି । ତେଣୁ ଘଟଣା ଆହୁରି ସନ୍ଦେହ ଘେରକୁ ଆସୁଛି ଓ ଏହାର ଏକ ଉଚ୍ଚସ୍ତରୀୟତଦନ୍ତ ଦାବି ହେଉଛି । 
          ସାରାରାଜ୍ୟରେ ଲକ୍ଷ୍ମୀବସଯୋଜନାରେ ବସଚଳାଇ ସରକାର ଲୋକଙ୍କ ପ୍ରିୟଭାଜନ ହେବାକୁ ଚେଷ୍ଟା କରୁଛନ୍ତି । କିନ୍ତୁ ଏହି ଲକ୍ଷ୍ମୀବସରେ କଣ୍ଡକ୍ଟର,ସୁପରଭାଇଜର ଓ ଡ୍ରାଇଭର ନିଯୁକ୍ତି କରିବାକୁ ଏକ ର‌୍ୟାକେଟ କାମକରୁଛି । ଗତ ୪ଦିନ ତଳେ ବଲାଙ୍ଗୀର ସହରର ଜଗର୍ସପାର୍କ ଠାରେ ନିଯୁକ୍ତିଡିଲ କରି ଅର୍ଥ ଆଦାୟ କରୁଥିବା ବେଳେ ରାୟଗଡା ଗୁଣପୁରର ସରୋଜ ଲିମା ନାମକ ଜଣେ ଦଲାଲକୁ ସ୍ଥାନୀୟ ଲୋକେ ଧରି ପୋଲିସକୁ ଜିମା ଦେଇଥିଲେ । ସେହି ଦଲାଲଠାରୁ ଜବତ ହୋଇଥିବା ୨ଟି ଖାତାରେ ବିଭିନ୍ନ ଅଞ୍ଚଳର ଆଶାୟୀ ଯୁବକଙ୍କ ତାଲିକା ତଥା ତାଙ୍କ ପାଖରୁ ଆଦାୟ ହୋଇଥିବା ଅର୍ଥର ବିବରଣୀ ରହିଥିଲା । କିନ୍ତୁ ବଲାଙ୍ଗୀର ପୋଲିସ କେହି ଅଭିଯୋଗକାରୀ ନଥିବା କହି ସରୋଜ ଲିମାକୁ ସେହିଦିନ ଛାଡିଦେଇଥିଲା । କିନ୍ତୁ ଆଶ୍ଚର୍ଯ୍ୟର କଥାହେଲା ଏହି ଘଟଣାରେ ରାଜ୍ୟପରିବହନ ବିଭାଗର ଏଟିଏମ ଅମିତ ମିଶ୍ର ନିଯୁକ୍ତି ନାଁରେ ଅର୍ଥ ଆଦାୟ କରୁଥିବା ଦଲାଲଙ୍କୁ ଧରିବାକୁ ଟିଟିଲାଗଡ ଥାନାରେ ଏତଲା ଦେଇଥିଲେ । ଏହି ଏତଲାକୁ ନେଇ ପରିବହନ ବିଭାଗ ସନ୍ଦେହ ଘେରକୁ ଆସିଛି । ବଲାଙ୍ଗୀର ଥାନା ଅଞ୍ଚଳରେ ଧରାପଡିଥିବା ଦଲାଲକୁ ଟିଟିଲାଗଡ ପୋଲିସ ପରେ ରାୟଗଡା ଗୁଣପୁରରୁ ଗିରଫ କରିଛି । ପରିବହନ ବିଭାଗ କେଉଁ କାରଣରୁ ଟିଟିଲାଗଡ ଥାନାରେ ଏତଲା କଲେ ତାହାକୁ ନେଇ ସନ୍ଦେହ ପ୍ରକାଶ ପାଉଛି ଓ ଏହାର ଏକ ଉଚ୍ଚସ୍ତରୀୟ ତଦନ୍ତ କରାଯିବାକୁ ଜନସାଧାରଣରେ ଦାବି ହେଉଛି । ଟିଟିଲାଗଡ ବିଧାୟିକା ଟୁକୁନି ସାହୁ ହେଉଛନ୍ତି ରାଜ୍ୟ ସରକାରଙ୍କ ପରିବହନ ବିଭାଗର ମନ୍ତ୍ରୀ । ଟିଟିଲାଗଡର ସଂଜୀବ ନାମକ ଜଣେ ବ୍ୟକ୍ତି ଏହି ନିଯୁକ୍ତି ଡିଲରେ ଅର୍ଥ ଆଦାୟ କରୁଥିବା ଚର୍ଚ୍ଚାକୁ ଆସିଥିଲା । ଏକ ନିର୍ଦ୍ଦିଷ୍ଟ ବୈଦ୍ୟୁତିକ ଗଣମାଧ୍ୟମରେ ଏହି ଅଭିଯୋଗର ଅଡିଓ ଭାଇରାଲ ହୋଇଥିଲା । ସେହି ସଂଜୀବ କିଏ ଓ କାହାର ଲୋକ ତାହାର ତଦନ୍ତ କରାଯାଉନାହିଁ । ସ୍ଥାନୀୟ ନେତାଙ୍କ ଏଥିରେ ସମ୍ପୃକ୍ତି ନାହିଁ ତ? ଏଭଳି ପ୍ରଶ୍ନକୁ ନେଇ ଯୋରଦାର ଚର୍ଚ୍ଚା ହେଉଛି । ଯାହାକି ଜନସାଧାରଣରେ ଆହୁରି ସନ୍ଦେହ ଘନିଭୁତ ହେଉଛି ।  ଗିରଫ ଅଭିଯୁକ୍ତ ସରୋଜ ହିଁ ଆଶାୟୀ ଯୁବକମାନଙ୍କୁ ସଂଜୀବ ନାମରେ ଫୋନ କରୁଥିବା ଟିଟିଲାଗଡ ଥାନା ଅଧିକାରୀ ଅବନୀ ସାହୁ କହିଛନ୍ତି । କିନ୍ତୁ ଏହାକୁ ସ୍ଥାନୀୟ ଲୋକେ ସହଜରେ ଗ୍ରହଣ କରିପାରୁନାହାଁନ୍ତି । ସରୋଜର କଲରେକର୍ଡ ଯାଞ୍ଚ କରିବା ସହିତ ଆଶାୟୀଙ୍କ ଫୋନକୁ ଆସିଥିବା କଲଗୁଡିକୁ ଯାଞ୍ଚ କଲେ ଅନେକ ରହସ୍ୟ ଫିଟିବ ବୋଲି ଦାବି ହେଉଛି । ବଲାଙ୍ଗୀର ଜିଲ୍ଲାରେ ନିଯୁକ୍ତି କେଳେଙ୍କାରୀ ନୂଆ ନୁହେଁ । ପୂର୍ବରୁ ନକଲି ସାଟିଫିକେଟ ଦେଇ ଚାକିରି କରିବା ଓ ପରେ ଧରାପଡି ଜେଲ ଯିବା ଭଳି ଅନେକ ଘଟଣା ଘଟିସାରିଛି । ସେହିପରି ଜାଲ ସାର୍ଟିଫିକେଟ କାରବାରରେ ଏବେ ଅନେକଲୋକ ଜେଲରେ ରହିଛନ୍ତି । କେବଳ ଏତକି ନୁହେଁ ବିଦ୍ୟୁତ ବିଭାଗର ଗ୍ରୀଡରେ,ବଲାଙ୍ଗୀର ବୋଟଲିଂପ୍ଲାଣ୍ଟରେ ନିଯୁକ୍ତି କରାଇବାକୁ ମଧ୍ୟ ଗତ ଦୁଇବର୍ଷ ତଳେ ଆଶାୟୀ ଯୁବକମାନଙ୍କଠାରୁ ଅର୍ଥ ଆଦାୟ ହେଉଥିଲା । ସେହି ଘଟଣାରେ ମଧ୍ୟ ଜଣେ ଦଲାଲ ଗିରଫ ହୋଇ ଜେଲ ଯାଇଥିଲେ ।