22-Dec-2023

ବଲାଙ୍ଗୀର(ପ୍ରେରଣା ଖବର ): କୋଶଲୀ ଭାଷା ଏକ ସ୍ୱୟଂସଂପୂର୍ଣ୍ଣ ଭାଷା । କୋଶଳାଞ୍ଚଳର ପ୍ରାୟ ୧୧ଟି ଜିଲ୍ଲାରେ ଏହି ଭାଷା ପ୍ରଚଳିତ ଥିବା ବେଳେ ଦେଢ଼କୋଟି ଲୋକ ଏହି ଭାଷାକୁ  ନିଜର ମାତୃଭାଷା ରୂପେ ବ୍ୟବହାର କରନ୍ତି । କୋଶଲୀ ଭାଷାରେ ଏ ପର୍ଯ୍ୟନ୍ତ ଅନେକ କାବ୍ୟ କବିତା ପ୍ରବନ୍ଧ, ଚଳଚ୍ଚିତ୍ର ଓ ଗଳ୍ପ ଆଦି ରଚନା ହୋଇ ସାରିଛି । ତେବେ ଲୋକଙ୍କ ଭାବାବେଗ ସହିତ ଜଡିତ କୋଶଲୀ ଭାଷାକୁ ଭାରତୀୟ ସମ୍ବିଧାନର ଅଷ୍ଟମ ଅନୁଚ୍ଛେଦରେ ସାମିଲ କରିବା ପାଇଁ ବଲାଙ୍ଗୀର ନାଗରିକ କମିଟି ପକ୍ଷରୁ ଭାରତର ମାନ୍ୟବର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନିକଟରେ ଦାବି କରାଯାଇଛି । ଜାତୀୟ ଶିକ୍ଷା ନୀତି ଅନୁସାରେ ଛାତ୍ରଛାତ୍ରୀ ମାନଙ୍କୁ ପ୍ରାଥମିକ ସ୍ତର ପର୍ଯ୍ଯନ୍ତ ନିଜ ମାତୃଭାଷା /ସ୍ଥାନୀୟ ଭାଷାରେ ଶିକ୍ଷା ପ୍ରଦାନ କରିବା ପାଇଁ କୁହା ଯାଉଥିବା ବେଳେ ଭାଷା କ୍ଷେତ୍ରରେ ମଧ୍ଯ କୋଶଲୀ ଭାଷା ଚରମ ଅବହେଳାର ଶିକାର ହୋଇଛି ବୋଲି ନାଗରିକ କମିଟି କହିଛି l ନାଗରିକ କମିଟିର ସଭାପତି ଇଂ. ବେଲାରସିଂ ଭୋଇ ଓ ସଂପାଦକ ମନୋରଂଜନ ସାହୁ ଏକ ଚିଠି ମାଧ୍ୟମରେ ନିଜର ଦାବି ଉପସ୍ଥାପନ କରି ଓଡ଼ିଆ ଭାଷା ଠାରୁ ବି ପ୍ରାଚୀନ ତଥା ସମୃଦ୍ଧ କୋଶଲୀ ଭାଷାର ସାମ୍ବିଧାନିକ ମାନ୍ୟତା ସପକ୍ଷରେ ନିଜର ଯୁକ୍ତି ବାଢ଼ିଛନ୍ତି । କୋଶଲାଞ୍ଚଳକୁ ସବୁ କ୍ଷେତ୍ରରେ ଅବହେଳା କରଯାଇ ଥିବା ବେଳେ କୋଶଲୀ ଭାଷାର ମାନ୍ୟତା କ୍ଷେତ୍ରରେ ମଧ୍ଯ ଏହା ସରକାରଙ୍କ ହୀନମନ୍ୟତାର ଶିକାର ହୋଇଛି ବୋଲି ବଲାଙ୍ଗୀର ନାଗରିକ କମିଟି ଏହି ଚିଠି ରେ ଉଲ୍ଲେଖ କରିଛି l