10-Dec-2023

କଣ୍ଟାମାଳ (ପ୍ରେରଣା ଖବର):କଣ୍ଟାମାଳ ବ୍ଲକ୍ ମନମୁଣ୍ଡା ଥାନା ବିଳାସପୁର  ପଞ୍ଚାୟତ କାର୍ଯ୍ୟାଳୟରୁ ଜଣେ ଯୁବକଙ୍କୁ କିଛି ଦୁର୍ବୃତ୍ତ ଅପହରଣ କରି ନେଇ ତାକୁ ମରଣାନ୍ତକ ଆକ୍ରମଣ କରିଥିବା ଅଭିଯୋଗ ହୋଇଛି ।ସୂଚନା ଅନୁସାରେ, ବଡ଼ରାହାଯୋର୍ ଗ୍ରାମର ଋଷି ପ୍ରଧାନ  ବିଲାସପୁର ପଞ୍ଚାୟତ କାର୍ଯ୍ୟାଳୟରେ ଥିବା ସମୟରେ ସଞ୍ଜୟ ମେହେର, ସତ୍ୟ ଖଣ୍ଡଗିରି, ଚକା ମେହେର ଓ ବିମଳ ଭୋଇ ଆସି ତାଙ୍କୁ ଅସଭ୍ୟ ଭାଷାରେ ଗାଳିଗୁଲଜ କରିବା ସହ ସେଠାରୁ ଅପହରଣ କରି ନିଜ ଘରକୁ ନେଇ ଯାଇଥିଲେ ।ସେଠାରେ ଋଷିକୁ ମରଣାନ୍ତକ ଆକ୍ରମଣ କରିବା ପରେ ନାକ ଓ ପାଟିରୁ ରକ୍ତସ୍ରାବ ହେବା ପରେ ତାକୁ ପାଣିରେ ଗାଧୋଇ ଦେଇଥିଲେ । ପରେ ଖବର ପାଇ ପୋଲିସର ୧୧୨ ଗାଡ଼ି ପହଞ୍ଚି ଆହତ ଅବସ୍ଥାରେ ରୁଷିକୁ ଉଦ୍ଧାର କରିଥିଲା । ଅପହରଣ ସହ ମରଣାନ୍ତକ ଆକ୍ରମଣ ହୋଇଥିବା ନେଇ ଋଷି ଗତକାଲି ମନମୁଣ୍ଡା ଥାନାରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗ ଆଧାରରେ ପୋଲିସ ୨୯୭/୨୩ରେ ଏକ ମାମଲା ରୁଜୁ କରି ୩ଜଣ ଅଭିଯୁକ୍ତଙ୍କୁ ଅଟକ ରଖି ପଚରାଉଚୁରା ଜାରି ରଖିଛି ।ଏସଂପର୍କରେ ମନମୁଣ୍ଡା ଥାନା ଅଧିକାରୀ ଭାବାନନ୍ଦ ପ୍ରଧାନଙ୍କୁ ପଚାରିବାରୁ ଆରକ୍ଷୀ ଅଧିକ୍ଷକଙ୍କ ନିର୍ଦ୍ଦେଶ ଅନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ।ତାପରେ ଜିଲ୍ଲା ଆରକ୍ଷୀ ଅଧିକ୍ଷକ ରାଜ ପ୍ରସାଦଙ୍କ ସହ ଯୋଗାଯୋଗ କରିଥିଲେ ମଧ୍ୟ ଯୋଗାଯୋଗ ସମ୍ଭବ ହୋଇ ନ ଥିବାରୁ କୌଣସି ପ୍ରତିକ୍ରିୟା ମିଳିପାରିନାହିଁ ।ଏଭଳି ସ୍ପର୍ଶକାତର ଘଟଣାରେ ଜିଲ୍ଲା ଆରକ୍ଷୀ ଅଧିକ୍ଷକ କିଭଳି ପଦକ୍ଷେପ ନେଉଛନ୍ତି ତାହା ଦେଖିବାକୁ ବାକି ରହିଲା ।