07-Dec-2023

ବଲାଙ୍ଗିର/ତୁଷୁରା,(ପଂଚାନନ ନାଏକ): ରାଜ୍ୟର ବିଭିନ୍ନ ସ୍ଥାନରେ ବିମାନସେବା ଯୋଗାଇବାକୁ ଭିତ୍ତିଭୂମୀ ନିର୍ମାଣ ଚାଲିଛି । ସେହି କ୍ରମରେ ବିଳମ୍ବରେ ହେଲେ ମଧ୍ୟ ତୁଷୁରା ଏୟାରଷ୍ଟ୍ରିପର ଉନ୍ନତିିକରଣ ପାଇଁ ମଙ୍ଗଳବାର ମୁଖ୍ୟମନ୍ତ୍ରୀ ୬୫କୋଟି ଟଙ୍କାର ଅନୁଦାନ ମଞ୍ଜୁର କରିଛନ୍ତି । ଗତ ଅଗଷ୍ଟ ମାସରେ ୫ଟି ସଚିବ ତଥା ବର୍ତ୍ତମାନର ୫ଟି ଅଧ୍ୟକ୍ଷ-ନବୀନ ଓଡିଶାର ଅଧ୍ୟକ୍ଷ ଭିକେ ପାଣ୍ଡିଆନଙ୍କ ଗସ୍ତ ସମୟରେ ଜନସାଧାରଣ ଏହା ଦାବି କରିଥିଲେ । ଲୋକଙ୍କ ଦାବିକୁ ଗ୍ରହଣ କରି ମଙ୍ଗଳବାର ରାଜ୍ୟ କ୍ୟାବିନେଟ ବୈଠକରେ ୬୫କୋଟି ଟଙ୍କା ମଞ୍ଜୁର କରି ବଲାଙ୍ଗୀର ଜିଲ୍ଲାପାଳ ତୁରନ୍ତ ଏହାର ଡିପିଆର ପ୍ରସ୍ତୁତ କରିବାକୁ ନିର୍ଦ୍ଦେଶ ଦିଆଯାଇଛି । ବଲାଙ୍ଗୀର ଜିଲ୍ଲାକୁ ବିମାନସେବା ଯୋଗାଇବେ ବୋଲି ୨୦୧୬ ମସିହାରେ ପ୍ରସ୍ତାବ କରାଯାଇଥିଲା । ବଲାଙ୍ଗୀର ଜିଲ୍ଲାର ତୁଷୁରା ନିକଟସ୍ଥ ବଙ୍ଗୋମୁଣ୍ଡା ଠାରେ ଦୀର୍ଘ ୫୫ବର୍ଷ ହେଲା ଏକ ଉଡାଜାହାଜ ପଡିଆ ରହିଛି । ଗତ ୨୦୧୯ରେ ୩କୋଟି ଟଙ୍କା ଖର୍ଚ୍ଚକରି ଏହାର ଉନ୍ନତିକରଣ ମଧ୍ୟ କରାଯାଇଥିଲା । ଏବେ ଆଉ ୬୫କୋଟି ଟଙ୍କାରେ ଏହାର ଭିତ୍ତିଭୂମିର ଉନ୍ନତିକରଣ କରାଯିବ । ଏହାକୁ ନେଇ ବିଭିନ୍ନ ମହଲରେ ଏହାକୁ ସ୍ୱାଗତ କରାଯାଇଛି । ଟିଟିଲାଗଡ ବିଧାୟିକା ତଥା ଜଳସମ୍ପଦ ଓ ପରିବହନ ମନ୍ତ୍ରୀ ଟୁକୁନୀ ସାହୁ, ପୂର୍ବତନ ସାଂସଦ ତଥା ରାଜ୍ୟ ହାଉସିଂବୋର୍ଡ ନୀଗମର ଅଧ୍ୟକ୍ଷ କଳିକେଶ ନାରାୟଣ ସିଂଦେଓ ଏହାକୁ ସ୍ୱାଗତ ଜଣାଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଜଣାଇଛନ୍ତି ।  
    ସୂଚନାରୁ ଜଣାଯାଏ ଯେ, ମହାରାଜା ରାଜେନ୍ଦ୍ର ନାରାୟଣ ସିଂଦେଓ ମୁଖ୍ୟମନ୍ତ୍ରୀ ଥିବା ବେଳେ ବଲାଙ୍ଗୀରରୁ ୩୦କିମି ଦୂରରେ ତୁଷୁରା ନିକଟସ୍ଥ ବଡଙ୍ଗୋମୁଣ୍ଡା ମୌଜାରେ ବଲାଙ୍ଗୀର ଜିଲ୍ଲାର ଉଡାଜାହାଜ ପଡିଆ ନିର୍ମାଣ କରାଇଥିଲେ । ୨ ଅକ୍ଟୋବର ୧୯୬୭ରେ ଏହାକୁ ମୁଖ୍ୟମନ୍ତ୍ରୀ ଆର.ଏନ.ସିଂଦେଓ ଉଦଘାଟନ କରିଥିଲେ । ପ୍ରାୟ ୫୦ଏକର ବିଶିଷ୍ଟ ଜମିରେ ୧୨୦୦ମିଟର ରନୱେ ଥିବା ଏହି ଉଡାଜାହାଜ ପଡିଆ ଅନେକ ସମୟରେ ରାଜ୍ୟସରକାର ଓ କେନ୍ଦ୍ର ସରକାରଙ୍କ କାମରେ ଲାଗିଛି । ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀ ତଥା ଅନ୍ୟାନ୍ୟ ଭିଭିଆଇପିଙ୍କ ଉଡାଜାହାଜଗୁଡିକ ଏହି ପଡିଆରେ ଉହ୍ଲାଉଛି । କଳିକେଶ ନାରାୟଣ ସିଂଦେଓ ବଲାଙ୍ଗୀର ସାଂସଦ ଥିବା

ସମୟରେ କେନ୍ଦ୍ରସରକାର ଏହି ଉଡାଜାହାଜ ପଡିଆକୁ ଉଡାନ ଯୋଜନାରେ ସାମିଲ କରିବାକୁ ୨୦୧୬ରେ ପ୍ରସ୍ତାବ ଦେଇଥିଲେ । ଏୟାର ଓଡିଶା ପକ୍ଷରୁ ବଲାଙ୍ଗୀରର ତୁଷୁରା ଓ କଳାହାଣ୍ଡି ଜିଲ୍ଲାର ଉତକେଲା ଏରୋଡ୍ରାମର ଅନୁଧ୍ୟାନ କରି  ଅଧିକ ଭିତ୍ତିଭୂମି ସଜଡାଯାଇ ପାରିଲେ ଏହାକୁ ବିମାନସେବା ସଂଯୋଗ ହୋଇପାରିବ ବୋଲି କହିଥିଲେ । ଏହାପରେ ଏଠାରେ ୨୦୧୯ ମସିହାରେ ପୂର୍ତ୍ତବିଭାଗ ପକ୍ଷରୁ ୨କୋଟି ୯୦ଲକ୍ଷ ଟଙ୍କାର ଅନୁଦାନ ଆସି ରନୱେ ଓ ଅନ୍ୟାନ୍ୟ ନିର୍ମାଣ କରାଯାଇଛି । ସିଗନାଲ ସେଣ୍ଟର କଣ୍ଟ୍ରୋଲରୁମ, ଭିଭିଆଇପିଙ୍କ ପାଇଁ ଅପେକ୍ଷାଗୃହ ଇତ୍ୟାଦି କରାଯାଇଛି । ଏହି ଯୋଜନାରେ ରାଜ୍ୟସରକାର ଉଡାଜାହାଜ ପଡିଆଗୁଡିକର ଭିତ୍ତିଭୂମୀର ଉନ୍ନତି କରାଉଛନ୍ତି ଓ କେନ୍ଦ୍ର ସରକାର ବିମାନ ସେବା ଯୋଗାଉଛନ୍ତି । ତୁଷୁରାଠାରେ  ପାଇଲଟମାନଙ୍କୁ ତାଲିମ ଦେବାକୁ ମଧ୍ୟ ଏକ ତାଲିମ ସେଣ୍ଟର କରାଯିବ ବୋଲି ମଧ୍ୟ ଘୋଷଣା କରାଯାଇଥିଲା । କିନ୍ତୁ ଦୀର୍ଘ ୭ ବର୍ଷ ପରେ ମଧ୍ୟ କୌଣସି ପଦକ୍ଷେପ ନିଆଯାଇନାହିଁ । ଯେଉଁ ଅଞ୍ଚଳକୁ ବିମାନ ସେବାର ସୁବିଧା ରହୁଛି ସେହି ଅଞ୍ଚଳକୁ ବିଭିନ୍ନ କମ୍ପାନୀ ଆସି ବ୍ୟବସାୟ ବଢାଉଛନ୍ତି । କେବିକେ ଅନ୍ତର୍ଗତ ବଲାଙ୍ଗୀର ଭଳି ଏକ ଅନୁନ୍ନତ ଅଞ୍ଚଳକୁ ପୁଞ୍ଜିନିବେଶ ପାଇଁ କମ୍ପାନୀମାନଙ୍କୁ ଆକର୍ଷିତ କରିବାକୁ ହେଲେ ବିମାନସେବାର ଯଥେଷ୍ଟ ଆବଶ୍ୟକତା ରହିଛି । ଏଠାରୁ ବିମାନସେବା ଆରମ୍ଭ ହେଲେ ଏହି ଅଞ୍ଚଳର ଲୋକଙ୍କୁ ଅନେକ ସୁବିଧା ହୋଇପାରିବ । ସୁବିଧାରେ ଦେଶର ଅନ୍ୟାନ୍ୟ ସହରକୁ ସହଜରେ କମସମୟରେ ଯାତାୟାତ ତଥା ଗୁରୁତର ରୋଗୀଙ୍କୁ ଏୟାରଲିଫ୍ଟ କରାଯାଇ ପାରିବ । ବଲାଙ୍ଗୀରର ବଡମାଳ ଗୋଲାବାରୁଦ କାରଖାନା,ଭୀମଭୋଇ ମେଡିକାଲକଲେଜ ଓ ଅନ୍ୟାନ୍ୟ ଅନୁଷ୍ଠାନଗୁଡିକୁ ଲୋକେ ସୁବିଧାରେ ଆସି ପାରନ୍ତେ । ତୁଷୁରା ଅଞ୍ଚଳ ବର୍ତ୍ତମାନର ରାଜ୍ୟ ବାଣିଜ୍ୟ ଓ ପରିବହନ ବିଭାଗର ମନ୍ତ୍ରୀ ଟୁକୁନୀ ସାହୁଙ୍କ ଟିଟିଲାଗଡ ନିର୍ବାଚନ ମଣ୍ଡଳୀ ଅଧିନରେ ଆସୁଛି । ତେଣୁ ପରିବହନ ମନ୍ତ୍ରୀଙ୍କ ଉତ୍ତରଦାୟୀତ୍ୱରେ ଆଗାମୀ ଦିନରେ ଏହି ଉଡାଜାହାଜ ପଡିଆକୁ ଉଡାନ ଯୋଜନାରେ ସାମିଲ କରାଇବା ସହିତ ପୂର୍ବରୁ ପ୍ରସ୍ତାବିତ ଥିବା ପାଇଲଟ ଟ୍ରେନିଂସେଣ୍ଟର ହେବାର ଆଶା ଉଜ୍ଲଳ ହୋଇଛି ।