30-Oct-2023

ବଲାଙ୍ଗୀର(ପ୍ରେରଣା ଖବର)-ରବିବାର ଦିନ ୪ଟା ବେଳେ ଟିଟିଲାଗଡ ରୋଡରେ ରେଡିଓ ଷ୍ଟେସନ ସମ୍ମୁଖରେ ଶାସ୍ତ୍ରୀ ନଗରର ରାଜା ଥାଟି ନାମକ ଜଣେ ଯୁବକକୁ ୧୦ ରୁ ୧୨ଜଣ ଦୁବୃତ୍ତ ଆକ୍ରମଣ କରିଥିଲେ । ଘଟଣା ପରେ ଅଭିଯୁକ୍ତମାନେ ଫେରାର ଥିଲେ । ଟାଉନ ଥାନା ପୋଲିସ ଏହି ଘଟଣାରେ ତଦନ୍ତ କରି ଅଭିଯୁକ୍ତଙ୍କ ମଧ୍ୟରୁ ୫ଜଣଙ୍କୁ ଆଜି ଗିରଫ କରି କୋର୍ଟ ଚାଲାଣ କରିଛି । ଗିରଫ ଅଭିଯୁକ୍ତମାନେ ଜଣେ ଜଣେ ଅଭ୍ୟାସଗତ ଅପରାଧି ଅଟନ୍ତି ବୋଲି ଜଣାପଡିଛି । ସେମାନଙ୍କ ନାମରେ ପୂର୍ବରୁ ଅନେକ ମାମଲା ରହିଛି । ତେବେ ଆକ୍ରମଣର ଶୀକାର ହୋଇଥିବା ରାଜା ମଧ୍ୟ କିଛି ଅସାମାଜିକ ଯୁବକମାନଙ୍କ ସହିତ ଗୋଷ୍ଠିକରି କିଛି ଦିନ ପୂର୍ବରୁ ଏହି ଗୋଷ୍ଠୀ ସାଙ୍ଗରେ ଗଣ୍ଡଗୋଳ କରିଥିଲା । ସେହି ଘଟଣାର ପ୍ରତିଶୋଧ ନେବାକୁ ଯାଇ ରବିବାର ରାଜାକୁ ଆକ୍ରମଣ ହୋଇଥିବା ପୋଲିସ ଜାଣିବାକୁ ପାଇଛି । ଗିରଫ ଅଭିଯୁକ୍ତଙ୍କ ମଧ୍ୟରେ ଲର୍କିପାଲିର ଭାରତ କୁମ୍ଭାର, ସରୋଜ ନାଗ, କନ୍ଧପାଲିପଡାର ଚିଣ୍ଟୁ ସାହୁ, ରାକେଶ ପଧାନ ଓ ବ୍ରାହ୍ମଣପଡାର ରାଜକିଶୋର ସ୍ୱାଇଁ ବୋଲି ଜଣାପଡିଛି । ବଲାଙ୍ଗୀର ଟାଉନ ପୋଲିସ ମାମଲା ନମ୍ବର-୫୯୨/୨୩  ତା ୨୯.୧୦.୨୦୨୩ ଦଫା ୩୪୧/୨୯୪/୩୨୩/୩୦୭/୧୨୦(ବି)/୫୦୬/୩୪ ଆଇପିସିରେ ରୁଜୁ କରି ଏମାନଙ୍କୁ କୋର୍ଟ ଚାଲାଣ କରିଛି । ଅନ୍ୟ ଅଭିଯୁକ୍ତମାନଙ୍କୁ ଖୋଜା ଚାଲିଛି ବୋଲି ଟାଉନଥାନା ଆଇଆଇସି ବିଶ୍ୱଜିତ ମନବୋଧ କହିଛନ୍ତି ।