29-Aug-2023

ବୀରମହାରାଜପୁର, (ବିନୋଦ ପାଣ୍ଡେ ): ସୁବର୍ଣ୍ଣପ୍ମର ଜିଲ୍ଲା ବୀରମହାରାଜପୁର ବ୍ଲକ  ହିଲୁଙ୍ଗ ପଞ୍ଚାୟତ ଅନ୍ତର୍ଗତ ମେଣ୍ଡାମାଳ ଗ୍ରାମ‌ ସ୍ଥିତ ଶୈବପୀଠ ଠାରେ ପବିତ୍ର ଶ୍ରାବଣ ଶେଷ ସୋମବାର ଅବସରରେ ଗୁପ୍ତେଶ୍ୱର ମହାଦେବ ଙ୍କ ଠାରେ ଆଖୁ ପଣାରେ ଶାୟୀ ଅନୁଷ୍ଠିତ ହୋଇଯାଇଛି । ଏହି ଅବସରରେ ଏକ ବିଶାଳ ସାଂସ୍କୃତିକ ଶୋଭାଯାତ୍ରା ବୀରମହାରାଜପୁର ସ୍ଥିତ ଜଗନ୍ନାଥ ମନ୍ଦିର ଠାରୁ ମେଣ୍ଡାମାଳ ଗ୍ରାମଯାଏ ପରିକ୍ରମା କରିଥିଲା । ଶୋଭାଯାତ୍ରା ସମୟରେ ଢୋଲ, ନିଶାନ, ଘଣ୍ଟ ବାଦ୍ୟ ଓ ମହିଳା ସଙ୍କୀର୍ତ୍ତନ ସହ ଏକ ଆଧ୍ୟାତ୍ମିକ ପରିବେଶରେ ଶୋଭାଯାତ୍ରା ବାହାରି ନିକଟସ୍ଥ ଶୈବପୀଠ ପରିସରରେ ପହଞ୍ଚି ଥିଲେ। ଏବଂ ଶାନ୍ତ ଶୃଙ୍ଖଳା ସହ ମହା ଆଖୁ ପଣାଶାୟି ଉତ୍ସବ ଅନୁଷ୍ଠିତ ହୋଇଥିଲା। ସମସ୍ତ ଶ୍ରଦ୍ଧାଳୁ ମାନେ ଶାନ୍ତି ଶୃଙ୍ଖଳା ସହ ଧାଡ଼ିରେ ଯାଇ ମହାଦେବ ଙ୍କ ଦର୍ଶନ ଲାଭ କରିଥିଲେ। ସମ୍ପୁର୍ଣ୍ଣ ହେବା ପରେ ସାମୁହିକ ପ୍ରସାଦ ସେବନ ହୋଇଥିଲା। କାର୍ଯ୍ୟକ୍ରମରେ ଅନେକ ଜନପ୍ରତିନିଧି ଓ ରାଜନେତା ସାମିଲ ହୋଇଥିଲେ । ଶାନ୍ତି ଶୃଙ୍ଖଳା ପାଇଁ ବୀରମହାରାଜପୁର ପୁଲିସ ମୃତୟନ ହୋଇଥିଲେ।ସେହିଭଳି କେଶଲଗା ସ୍ଥିତ ବାବା ଧବଳେଶ୍ବରଙ୍କ ଶୈବପୀଠରେ  ଗଙ୍ଗା ଜଳଶାୟୀ ଅନୁଷ୍ଠିତ ହୋଇଯାଇଛି । ସୁଦୂର ପ୍ରୟାଗରାଜରୁ ଏଥିପାଇଁ ଗଙ୍ଗା ଜଳ ଅଣାଯାଇଥିଲା । ଶତାଧିକ କାଉଡିଆଙ୍କ ବୋଲବମ୍ ଧ୍ବନି ସହ ସଙ୍କୀର୍ତ୍ତନ, ଦୁଲଦୁଲି, ଘଣ୍ଟ ବାଦ୍ୟ ଓ ଭକ୍ତମାନଙ୍କ ହରିବୋଲ ହୁଳହୁଳି ନାଦରେ ସ୍ଥାନୀୟ ପରିବେଶ ମୁଖରିତ ହୋଇଥିଲା । ଏହି ଅବସରରେ ବିଶାଳ ଶୋଭାଯାତ୍ରା ସହକାରେ ଗଙ୍ଗା ଜଳକୁ ପାହାଡର ପାଦଦେଶକୁ ନିଆଯାଇଥିଲା । ମଧ୍ୟାନ୍ନ ୧୨ଟା'ରେ ଜଳଶାୟୀ ସମ୍ପନ୍ନ ହୋଇଥିଲା । ହଜାର ହଜାର ସଂଖ୍ୟାରେ ଶ୍ରଦ୍ଧାଳୁ ଓ ଭକ୍ତ ଧାଡିରେ ଛିଡ଼ା ହୋଇ ମହାଦେବଙ୍କ ଜଳଶାୟୀ ଦର୍ଶନ କରିଥିଲେ । ଶେଷରେ ସମସ୍ତେ ଅନ୍ନପ୍ରସାଦ ସେବନ କରିଥିଲେ ।