22-Jul-2023

ବଲାଙ୍ଗୀର (ମଳୟ ମିଶ୍ରଙ୍କ ରିପୋର୍ଟ): ଆଗର ଡିପିଇପିରୁ ଏବର ସମଗ୍ରଶିକ୍ଷା ଯାଏଁ ବଲାଙ୍ଗୀର ପ୍ରାଥମିକ ଶିକ୍ଷା ପ୍ରକଳ୍ପରେ ବର୍ଷ ବର୍ଷ ଧରି ଦୁର୍ନୀତି ପିଛା ଛାଡିନାହିଁ । କିଛିବର୍ଷ ତଳର କ୍ୟାସିଅର୍ ଓ ଆକାଉଣ୍ଟାଣ୍ଟ୍ ଜେଠୁ ସାହୁ ଓ ଡାକ୍ଟର ସାହୁ ବ୍ୟାଙ୍କରେ ଜାଲ୍ ଆକାଉଣ୍ଟ୍ ଖୋଲି ଶୁଣାଯାଇଥିବା ୧୦ କୋଟି ହଡପ କରି  ଫେରାର୍ ହୋଇଯାଇ ଫେରି ଗିରଫ ହେବାଘଟଣା ରାଜ୍ୟରେ ଚାଞ୍ଚଲ୍ଯ ସୃଷ୍ଟି କରିଥିଲା ।  ଏବେ ସେ ମାମଲାର ଆତ୍ମସାତ୍ ଅର୍ଥର ପରିମାଣ କଟାଛଟା ହେଇ ଓ ତତ୍କାଳୀନ ଛଅଜଣ ଡିପିସି ଓ ଏଫ ସିଙ୍କୁ ଖସାଇଦେଇ ସବୁ ହଜମ ହୋଇଯାଇଥିବା କୁହାଯାଉଛି । ଅଭିଯୁକ୍ତମାନେ କୋଠାବାଡି, ଦୋକାନ,ବ୍ୟବସାୟ  କରି ଖୋଲାମେଲାରେ ବୁଲୁଛନ୍ତି  !

ମଝିରେ ଆଉ କେତେକଙ୍କ ବିରୁଦ୍ଧରେ  ଅସ୍ଥାୟୀ କର୍ମଚାରୀଙ୍କର କୋଟି କୋଟି ଆୟବହିର୍ଭୂତ ସମ୍ପତ୍ତି, ଦୁର୍ନୀତି ନିବାରଣ ବିଭାଗର ନୋଟିସ୍ , ଗଣମାଧ୍ୟମରେ ପ୍ରକାଶିତ ବହୁ ଅଭିଯୋଗ, ଅଡିଟ୍ ରିପୋର୍ଟ, ଯାଞ୍ଚ୍ ଆଦି ଉଠିଥିବା ସବୁ ଫୁସ୍ ହେଇଗଲା ।

ଏବେ ଗତ ୨୧ ତାରିଖରେ କେଜିବିଭି ଜେଣ୍ଡର କୋଅର୍ଡିନେଟର ପୁଷ୍ପାଙ୍ଗିନୀ ଯୋଷୀ ସୋଲବନ୍ଧ କେଜିବିଭି ଦାୟିତ୍ୱରେ ଥିବା ପ୍ରଧାନଶିକ୍ଷକଙ୍କ ଠାରୁ ବଦଳିପରେ ୟୁସି ଦେବାକୁ ୩୧ ହଜାର ଟଙ୍କା ଲାଞ୍ଚ ନେଲାବେଳେ ଭିଜିଲାନ୍ସ ହାତରେ ଧରାପଡି ଗିରଫ ହେବା ଖବର ଆଉ ଲୋକଙ୍କ ମନରେ ଚମକ ସୃଷ୍ଟି କରିପାରୁନାହିଁ ।

ତେବେ କେବଳ ବଲାଙ୍ଗୀରଜିଲ୍ଲା ନୁହେଁ, ସୋନପୁର, ବୌଦ୍ଧ, କଳହାଣ୍ଡି, ନୂଆପଡା ସବୁଠି ସେଇ ଏକା ଧରଣର ଦୁର୍ନୀତି ଆରମ୍ଭରୁ ଚାଲିଛି । ତଳୁ ଉପରସ୍ତର ପର୍ଯ୍ୟନ୍ତ ମିଳିତ ରାକେଟ୍ ଜରିଆରେ । ଏହାର ଏକ ମୁଖ୍ୟକାରଣ ହେଲା , ଏସବୁ ପ୍ରକଳ୍ପରେ ଅସ୍ଥାୟୀ କର୍ମଚାରୀମାନେ । ସେମାନଙ୍କୁ ଧରି ଜିଲ୍ଲାସ୍ତରରୁ ଓପେପା ବା ମନ୍ତ୍ରଣାଳୟ ପର୍ଯ୍ୟନ୍ତ ସବୁଠି ମାମ୍ ମାମ୍ । ଯୋଉଠି ଡାକ୍ତର , ଜେଠୁ କୋଟିବାଟେ ଗେଁଠି ଦେଲେ,  ସେଠି ଗୋବିନ୍ଦ ଗୋପାଳ କାଳୁରାମ୍ କୁ କିଏ ଆଖିପକଉଛି  !  ଜୟ କଳା  ! 

ସୋସିଆଲ୍ ମିଡିଆରେ ଜଣେ ସାମ୍ବାଦିକ ଲେଖିଲେ:  ଆଜି ଧରା ପଡିଥିବା ମହିଳା କର୍ମଚାରୀ ଜଣକ ସୋଲୋ ସୋଲୋ କାନ୍ଦିଲେ  !  ଆଗରୁ ବହୁବାର ତାଙ୍କର ଦୁର୍ନୀତିର ପର୍ଦ୍ଦାଫାଶ୍ କରିଛି ମିଡିଆ । କାନ୍ଦିଲେ କିହେବ କରୀନ୍ଦ୍ରଗମନା , ଇନ୍ଦ୍ର କି ସହଜେ ଛାଡିବ  ?