19-Jul-2023

ବଲାଙ୍ଗୀର  :  ( ମଳୟ ମିଶ୍ରଙ୍କ ରିପୋର୍ଟ  )
କଣ୍ଟାବାଞ୍ଜିରେ ଘଟିଥିବା ନାବାଳକର ସନ୍ଦେହଜନକ ଅପମୃତ୍ଯୁ ବନାମ ହତ୍ୟାଅଭିଯୋଗର କାରଣ ସହପାଠିନୀ ଛାତ୍ରୀର ତାକୁ ୧୧ ଲକ୍ଷ ଟଙ୍କା ଇନ୍ ଷ୍ଟାଗ୍ରାମ୍ ଫଲୋଅର୍ ବୃଦ୍ଧି ପାଇଁ ଦେଇଥିବା ଓ ମୃତ ପିଲାର ବାପାର କହିବାନୁଯାୟୀ ଝିଅରବାପା ପିଲାଟିକୁ ଡକାଇନେଇ ବାପା ସାମ୍ନାରେ ମାଡମାରି ହୋଟେଲର କୋଠରୀରେ ଦିନସାରା ଅବରୁଦ୍ଧ କରି ୩ ଲକ୍ଷଟଙ୍କା ଦେବାକୁ ଚୁକ୍ତି ଲେଖାଇ ତାର ମୋବାଇଲ୍ ଛଡାଇ ରଖି 
ରାତି ୧୧ଟାରେ ଛାଡିଥିବା ଇ ଉକ୍ତ ନାବାଳକଟିର ମୃତ୍ୟୁପଛର କାରଣ ବୋଲି ଚର୍ଚ୍ଚା ଜୋର୍ ଧରିଛି । 
କଣ୍ଟାବାଞ୍ଜି ସହରର ଜଣେ ବ୍ୟବସାୟୀ ବିଶାଲ୍ ଖେମକା ବନାମ ଅଗ୍ରବାଲଙ୍କ ଝିଅ ଓ ଜଣେ ବ୍ୟବସାୟୀଙ୍କ ପାଖରେ କାମ କରୁଥିବା ସେହି କଣ୍ଟାବାଞ୍ଜି ସହରର ପ୍ରମୋଦ ଜୈନଙ୍କ ପୁଅ ସ୍ଥାନୀୟ ଲାୟନ୍ସ ପବ୍ଲିକ୍ ସ୍କୁଲ୍ ରେ ମାଟ୍ରିକ ବା 
ଦଶମ ଶ୍ରେଣୀର ଛାତ୍ରୀଛାତ୍ର । ସହପାଠିନୀ ଛାତ୍ରୀଟି କୁଆଡେ ମୃତ ନାବାଳକଟି କୁ ପର୍ଯ୍ୟାୟକ୍ରମେ ୧୧ ଲକ୍ଷ ଟଙ୍କା ଘରଲୋକଙ୍କୁ ଲୁଚାଇ ଇନ୍ ଷ୍ଟାଗ୍ରାମରେ ଫଲୋଅର୍ ବୃଦ୍ଧି ପାଇଁ ଦେଇଥିଲା । ଏହା ଜାଣିବାପରେ ଝିଅର ବାପା ବିଶାଲ୍ ଅଗ୍ରବାଲ ଅନ୍ୟକେତେକ ରାଜନେତା ଓ ନିଜଲୋକଙ୍କ ସହିତ ଉକ୍ତ ନାବାଳକ ଲଳିତ ଜୈନ ( ୧୫ ) ଓ ତା' ବାପ ପ୍ରମୋଦ ଜୈନଙ୍କୁ କୁ ସ୍ଥାନୀୟ ଏକ ଅଭିଜାତ ହୋଟେଲ ଆଲିଶାନ୍ ରେସିଡେନ୍ସିକୁ ଡକାଇନେଇ ବାପସାମ୍ନାରେ ମାଡପିଟ କରିବା ସହ ତା'ଠାରୁ ମୋବାଇଲ୍ ଛଡାଇରଖି ସେମାନଙ୍କଠାରୁ ଗତ ୧୨ ତାରିଖଦିନ ୪୦ ହଜାରଟଙ୍କା ଅସୁଲ କରିବା ସହ ଗୋଟିଏ ଦିନରେ ୩ ଲକ୍ଷ ଟଙ୍କା ଦେବାକୁ ଏକ ଚୁକ୍ତିପତ୍ର ଲେଖାଇ ନେଇଥିଲେ ।  ପରଦିନ ସେ ପୁଣି ପିଲାଟିକୁ ଡକାଇ ୩ ଲକ୍ଷ ଟଙ୍କା ଦେବାକୁ ଚାପ ବା ଧମକଚମକ ସହ ଆହୁରି ମାଡ ମାରିଥିଲେ କି ନାହିଁ , ଜଣାପଡିପାରିନାହିଁ । ତେବେ ୧୩ ତାରିଖରେ କୁକୁଡାହାଡ ନିକଟସ୍ଥ ରେଳଲାଇନରୁ ଲଳିତର ମୃତଦେହ ମିଳିବା ପରେ ଜିଆରପି ତାହାକୁ ଡାକ୍ତରଖାନା ଆମ୍ବୁଲାନ୍ସରେ ଆଣିଥିବା ସତ୍ତ୍ୱେ ପୋଷ୍ଟମର୍ଟମ୍ କରି ନଥିବା , ଥାନାରେ ନିଖୋଜ ଏତଲା ସତ୍ତ୍ୱେ ପୁଲିସ୍ କଣ୍ଟାବାଞ୍ଜି ପରି ଏକ ଛୋଟ ସହରରେ ଉପଯୁକ୍ତ ତଲାଶ୍ ନ କରିବା , କଥାଟି ପ୍ରଘଟ ହେବାରୁ ମାଟିଖୋଳି ଶବ ଉଦ୍ଧାର କଲାବେଳେ ମୃତଦେହରେ ପୋଷାକ ରହିଥିବା ଓ ପୋଷ୍ଟମର୍ଟମ୍ ନ କରି ପୋଡିବାକୁ କହିବା ଇତ୍ୟାଦି ଅଭିଯୋଗ ଉଠିବାପରେ ନିଖୋଜଏତଲାରେ ପିଲାର ବାପ ହୋଟେଲରେ  ଉକ୍ତ ଘଟଣା ଘଟିଥିବା ଇତ୍ୟାଦି ବିଷୟକୁ ଲୁଚାଇ ଏବେ ତାଙ୍କ ପୁଅକୁ ହତ୍ୟା କରାଯାଇଥିବା କହୁଥିବା ସମ୍ପର୍କରେ ମଧ୍ୟ ଚର୍ଚ୍ଚା ହେଉଛି ।
ସର୍ବୋପରି ନାବାଳକଟିର ମୃତଦେହ ଦେଖିଥିବା ଗଣମାଧ୍ୟମର ପ୍ରତିନିଧି ଓ ପ୍ରତ୍ୟେକ୍ଷଦର୍ଶୀଙ୍କ ଅନୁଯାୟୀ , ଶବଟି ରେଳଲାଇନ ଉପରେ ଶୁଆଇଲା ପରି ଥିବା , ଦେହରେ କୌଣସି ଖଣ୍ଡିଆଖାବରା ଥିଲା ପରି ଜଣାପଡୁ ନଥିବା ସହିତ ଜିଆରପି ଓ ପୁଲିସ୍ ର ଶବବ୍ୟବଚ୍ଛେଦ କରାଯାଇ ନଥିବା ବିବାଦ ସନ୍ଦେହ ସୃଷ୍ଟି କରିଛି ।
ମୁଖ୍ୟ ଓ ଗୁରୁତର ବିଷୟ ଏହା ଯେ , ସ୍କୁଲ୍ ଛାତ୍ରଛାତ୍ରୀଙ୍କ ମଧ୍ୟରେ ଏଭଳି ଟଙ୍କା ଦେଇ ଇନ  ଷ୍ଟାଗ୍ରାମ୍ ର ଫଲୋଅର୍ ବଢାଇବା ଜୁଆର ସଂକ୍ରମଣ ଆଗାମୀ ସମାଜ ପାଇଁ ଚିନ୍ତାଜନକ ବିଷୟ । ମୁଖ୍ୟତଃ କଣ୍ଟାବାଞ୍ଜି ପରି ଧନୀକ ବ୍ୟବସାୟୀ ଅଧ୍ୟୁଷିତ ସହରରେ ଏହା ଚାଲିଥିବା ବୁଦ୍ଧିଜିବୀମାନେ ଚିନ୍ତା ପ୍ରକଟ କରିଛନ୍ତି । ତେଣୁ ଉକ୍ତ ସ୍କୁଲ୍ ରେ ଆଉ କେଉଁ ଛାତ୍ରଛାତ୍ରୀ ଏଭଳି ମାରାତ୍ମକ କାରବାରରେ ଜଡିତ ଜିଲ୍ଲା ପୁଲିସ ର ସାଇବର ସେଲ୍ ଛାନ୍ ବିନ୍ କରିବାକୁ ଲୋକେ ଏସ୍ ପି ଙ୍କର ଦୃଷ୍ଟି ଆକର୍ଷଣ କରିଛନ୍ତି ।
ସେହିପରି ଏକ ନରହତ୍ୟା ଅଭିଯୋଗକୁ ଚପାଇଦେବାକୁ ଉକ୍ତ ମାମଲାର ତଦନ୍ତକାରୀ ପୁଲିସ୍ , ଜିଆରପି ଅଧିକାରୀଙ୍କ ସମେତ ଜାଲ୍ ବ୍ୟବଚ୍ଛେଦକାରୀ ଡାକ୍ତର ତ୍ରିପାଠୀ ଓ ଡା କୁମ୍ଭାରଙ୍କ ବିରୁଦ୍ଧରେ ଯାଞ୍ଚ ପୂର୍ବକ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ କର୍ତ୍ତୃପକ୍ଷଙ୍କ ଠାରେ ଦାବି କରାଯାଇଛି । ସଦ୍ୟତମ ମିଳିଥିବା ଖବର ଅନୁଯାୟୀ , ଆଜି ଏଇ ମାମଲାରେ କଣ୍ଟାବାଞ୍ଜି ପୁଲିସ୍  ଅଭିଯୁକ୍ତ ବିଶାଲ ଅଗ୍ରବାଲ ଓ ତାଙ୍କ ଭାଇ ବିକାଶ ଅଗ୍ରବାଲଙ୍କୁ ଆଣି ଥାନାରେ ଅଟକ ରଖିଥିବା ପ୍ରକାଶ ।