18-Jul-2023

ବଲାଙ୍ଗୀର(ପ୍ରେରଣା ଖବର )/ ରାଜ୍ୟର ସର୍ବ ପୁରାତନ ସହର ମଧ୍ୟରେ ବଲାଙ୍ଗୀର ଅନ୍ୟତମ। ଚେସ୍ ବୋର୍ଡ ର ସହର ଭାବରେ ବେଶ୍ ପରିଚିତ। କିନ୍ତୁ ଅଛରାଏ ବଡ ବର୍ଷା ହେଲେ ସହରରେ ବହୁ ସ୍ଥାନରେ ଜଳମଗ୍ନ ହୋଇ ଯାଇଥାଏ। ଗତ କାଲି ଘଡିଘଡି ସହ ଲଗାଣ ବର୍ଷା ଦିନ ରାତି ହେବା ଦ୍ବାରା ଏକ କୃତ୍ରିମ ବନ୍ୟା ସଦୃଶ ସହରର ବିଭିନ୍ନ ସ୍ଥାନରେ ଦେଖା ଯାଇଥିଲା। ବହୁ ସ୍ଥାନରେ ଲୋକେ ଜଳ ବନ୍ଦି ହୋଇ ନାହିଁ ନଥିବା ଅସୁବିଧାର ସମ୍ମୁଖୀନ ହେଲେ। ବହୁ ବର୍ଷ ପୁର୍ବରୁ ପୌର ଅଞ୍ଚଳରେ ଦୋକାନୀ ମାନେ ଓ କିଛି ଅସାଧୁ ବ୍ୟକ୍ତି ଜଳ ନିଷ୍କାସନ ହେବା ସ୍ଥାନ ମାନଙ୍କରେ ମାଡି ବସିଛନ୍ତି। ଯା ଦ୍ବାରା କିଛି ସମୟ ବର୍ଷା ହେଲେ ଲୋକେ ହଇରାଣ ହେଉଛନ୍ତି। ସମୟ ସୀମା ମଧ୍ୟରେ କେତେକ ବିକାଶ କାମ ସମାପ୍ତ ନ ହେବା ଦ୍ବାରା ଆଜି ପୌରପରିଷଦ ଏକ ପ୍ରକାର ଦଣ୍ଡ ଭୋଗୁଛି। ଯେମିତି ରୁଗୁଡି ପଡା ଓ ସାଗରପଡା କୁ ସଂଯୋଗ କରୁଥିବା ପୋଲ ର ଉଦାହରଣ ନିଆଯାଇ ପାରେ। ପୋଲ ନିର୍ମାଣ ହୋଇ କାର୍ଯ୍ୟକ୍ଷମ ହେବା ବିଳମ୍ବ ହେବା ଯୋଗୁଁ ସେଠାକାର ପ୍ରାୟ ୨୦ ପରିବାରଙ୍କ ଘର ଭିତରକୁ ପାଣି ଜମା ହୋଇଗଲା। ଯା ଦ୍ବାରା ବଲାଙ୍ଗୀର ପୌରପରିଷଦ ଅଧ୍ୟକ୍ଷା ଶ୍ରୀମତୀ ଲିକା ସାହୁ ରାତ୍ରି ୨ ଟା ୨୦ ମିନିଟ୍ ରେ ସେହି ସ୍ଥାନ କୁ ଯାଇ ଜେସିଭି ଓ ଅଗ୍ନିଶମ ବାହିନୀ ସହାୟତାରେ ଜଳ ନିଷ୍କାସନ କରିବା ସହ ରାତ୍ରି ଯାକ ଉଜାଗର ରହି ସହରର ବିଭିନ୍ନ ସ୍ଥାନକୁ ଯାଇ ଯୁଦ୍ଧ କାଳିନ ଭିତରେ ଜଳ ବନ୍ଦି ଲୋକଙ୍କୁ ସହାୟତାର ହାତ ବଢାଇଥିଲେ। ଝରି ଶ୍ରାବଣ ପୁର୍ବରୁ ଯଦି ସହରରେ ରହିଥିବା ବିଭିନ୍ନ ନାଳ ନର୍ଦମା ସଫେଇ କାର୍ଯ୍ୟ ସମାପନ କରିଥାନ୍ତେ ତ ଏ ଦୁର୍ଦ୍ଦଶା ସହର ବାସି ଙ୍କୁ ଦେଖିବାକୁ ମିଳି ନ ଥାନ୍ତା। ଅଧ୍ୟକ୍ଷା ମହାସୟା ମଧ୍ୟ ରାତି ଉଜାଗର ରହି ନ ଥାନ୍ତେ।