08-Feb-2023

ବଡ଼ମ୍ବା ବନ ବିଭାଗ ହେପାଜତରେ ଅଟକ ଥିବା ଧନେଶ୍ୱର ବେହେରାଙ୍କ ମୃତ୍ୟୁ ଅଘଟଣ ସାରା ଆଠଗଡ଼ ଉପଖଣ୍ଡରେ ହଇଚଇ ସୃଷ୍ଟି କରିଥିବା ବେଳେ ଆଜି ଏହି ମାମଲା ପୁଣି ନୂଆ ମୋଡ଼ ନେଇଛି। ଧନେଶ୍ୱରଙ୍କ ମୃତ୍ୟୁ ପରେ ଗତକାଲି ବିଭାଗ ପକ୍ଷରୁ ଛାଡ଼ି ଦିଆଯାଇଥିବା ଅନ୍ୟ ୩ ଅଟକ ଅଭିଯୁକ୍ତଙ୍କ ମଧ୍ୟରୁ ଦୁଇ ଜଣଙ୍କ ଅବସ୍ଥା ଗୁରୁତର ହୋଇପଡିଛି ।

ଉଭୟଙ୍କୁ ଆଜି ବଡ଼ମ୍ବା ଡାକ୍ତରଖାନାରେ ଭର୍ତ୍ତି କରାଯାଇଛି । ଅପରପକ୍ଷରେ, ଉଭୟ ପରିବାର ପକ୍ଷରୁ ବନ ବିଭାଗ ବିରୋଧରେ ଥାନାରେ ପୃଥକ୍‌ ଏତଲା ମଧ୍ୟ ଦିଆଯାଇଛି । ଯେଉଁଥିରେ ବିଭାଗର ଅଧିକାରୀ, କର୍ମଚାରୀମାନେ ମିଶି ଉଭୟଙ୍କୁ ଅଟକ ରଖି ପଶୁ ଭଳି ନିର୍ମମ ନିର୍ଯାତନା ଦେଇଥିବା ଦର୍ଶାଯାଇଛି ।

ହାତୀ ଶିକାର ଓ ଦାନ୍ତ କାଟିନେବା ସନ୍ଦେହରେ ବନ ବିଭାଗ ୪ ଜଣଙ୍କୁ ଅଟକ ରଖିଥିଲେ । ବିଭାଗ ହେପାଜତରେ ଥିବା ଧନେଶ୍ୱର ବେହେରାଙ୍କ ମୃତ୍ୟୁ ପରେ ପରେ ତିନି ଜଣଙ୍କୁ କାଲି ଛାଡ଼ି ଦିଆଯାଇଥିଲା । ତିନି ଜଣ ହେଲେ ବଡ଼ମ୍ବା ବ୍ଲକ ବଡ଼ବାରସିଂହ ପଞ୍ଚାୟତ ଶ୍ୟାମସୁନ୍ଦରପୁର ଗ୍ରାମର ରାଜକିଶୋର ପ୍ରଧାନ(୬୧), ସାନବାରସିଂହ ପଞ୍ଚାୟତ ସୋରୁଆଁ ଗ୍ରାମର ବିରଞ୍ଚି ଜାନି ଏବଂ ଗୋପପୁର ଗ୍ରାମର ରାଜୀବ ସ୍ୱାଇଁ । ଏମାନଙ୍କୁ ବନ ବିଭାଗ କର୍ମଚାରୀ ମାଡ଼ ମାରିଥିବା ଅଭିଯୋଗ ହୋଇଥିଲା । ତିନି ଜଣଙ୍କ ମଧ୍ୟରୁ ରାଜୀବ ଏବେ ଘରେ ଶଯ୍ୟାଶାୟୀ ଥିବା ତାଙ୍କ ପରିବାର ଲୋକେ କହିଛନ୍ତି । ତେବେ ରାଜକିଶୋର ଏବଂ ବିରଞ୍ଚିଙ୍କ ଅବସ୍ଥା ଆଜି ଗୁରୁତର ହେବାରୁ ସେମାନଙ୍କୁ ଚିକିତ୍ସା ଲାଗି ବଡ଼ମ୍ବା ଡାକ୍ତରଖାନରେ ଭର୍ତ୍ତି କରାଯାଇଛି ।

ବିରଞ୍ଚିଙ୍କଠାରେ ଅକ୍ସିଜେନ୍‌ ଲାଗିଥିବା ବେଳେ ରାଜକିଶୋରଙ୍କ ପଞ୍ଜରା ହାଡ଼ରେ ଗଭୀର ଆଘାତ ଲାଗିଛି । ଅବସ୍ଥା ଗୁରୁତର ଥିବାରୁ ଉଭୟଙ୍କୁ ଅଧିକ ଚିକିତ୍ସା ଲାଗି କଟକ ଯିବାକୁ ଡାକ୍ତର ପରାମର୍ଶ ଦେଇଥିବା ଜଣାପଡିଛି । ଉଭୟ ବନ କର୍ମଚାରୀଙ୍କ ପ୍ରବଳ ମାଡ଼ରେ ଲହୁଲୁହାଣ ହୋଇଥିବା ସେମାନଙ୍କ ପରିବାର ଲୋକେ କହିଛନ୍ତି । ସେମାନଙ୍କ ଛାତି, ଗୋଡ଼, ହାତ, ପିଠି, ପେଟ ଆଦି ଶରୀରର ଅନେକ ସ୍ଥାନରେ ମାଡ଼ ଦାଗ ରହିଛି । ସେମାନଙ୍କୁ ପଶୁ ଭଳି ଅତ୍ୟାଚାର କରାଯାଇଥିଲା ବୋଲି ଉଭୟଙ୍କ ପରିବାର ଲୋକେ ପୁଲିସ ଓ ଗଣମାଧ୍ୟମକୁ କହିଛନ୍ତି । ଆଜି ଉଭୟ ରାଜକିଶୋର ଏବଂ ବିରଞ୍ଚିଙ୍କ ପରିବାର ପକ୍ଷରୁ ଦୁଇଟି ପୃଥକ୍‌ ଅଭିଯୋଗ ବଡ଼ମ୍ବା ଥାନାରେ କରାଯାଇଛି । ରାଜକିଶୋରଙ୍କ ପକ୍ଷରୁ ତାଙ୍କ ପୁଅ କୃଷ୍ଣ ଓ ବିରଂଚି ନିଜେ ଏତଲା ଦାଏର୍‌ କରିଛନ୍ତି । 

ପଚରାଉଚରା ଆଳରେ ବନ ବିଭାଗ କର୍ମଚାରୀମାନେ ସେମାନଙ୍କୁ ଡାକିନେଇ ଅଟକ ରଖିଥିଲେ । ମଦ୍ୟ ପାନ କରିଥିବା ଅବସ୍ଥାରେ ସେମାନଙ୍କ ଉପରେ ଠେଙ୍ଗା ଓ ଲୁହା ରଡ଼ରେ ଆକ୍ରମଣ କରିଥିଲେ, ଜୋତାରେ ଗୋଇଠା ମାରିବା ସହ ସେମାନଙ୍କ ଉପରେ ଚଢ଼ି ଯାଇଥିଲେ ବୋଲି ଏତଲାରେ ଦର୍ଶାଯାଇଛି । ଧନେଶ୍ୱରଙ୍କୁ ଅମାନୁଷିକ ମାଡ଼ ମରାଯାଇ ଜୀବନରେ ମାରି ଦିଆଯାଇଥିବା ତାଙ୍କ ପରିବାର ପକ୍ଷରୁ ଅଭିଯୋଗ କରାଯାଇଥିବା ବେଳେ ଚିକିତ୍ସିତ ହେଉଥିବା ରାଜକିଶୋର ଓ ବିରଞ୍ଚିଙ୍କ ଶରୀରକୁ ଦେଖିଲେ ଧନେଶ୍ୱରଙ୍କ ପରିବାରର ଅଭିଯୋଗ ଯେ ସତ ତାହା ସ୍ପଷ୍ଟ ଜଣାପଡୁଛି । ତେବେ ଧନେଶ୍ୱରଙ୍କ ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ସ୍ପଷ୍ଟ ହେବ ବୋଲି କୁହାଯାଉଛି । ଅପରପକ୍ଷରେ, ଆଠଗଡ଼ ଡାକ୍ତରଖାନାରେ ଧନେଶ୍ୱରଙ୍କ ଶବ ବ୍ୟବଚ୍ଛେଦ ହେବା ପରେ କଡ଼ା ପୁଲିସ ସୁରକ୍ଷା ବଳୟରେ ସୋମବାର ସନ୍ଧ୍ୟାରେ ତାଙ୍କ ଗ୍ରାମ ସାତଗୋଛିଆରେ ଅନ୍ତିମ ସଂସ୍କାର କରାଯାଇଛି । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଆଜି ବି ଉତ୍ତେଜନା ଲାଗି ରହିଛି ।