01-Feb-2023

ବିନିକା(ହିମାଂଶୁ ଶେଖର ପୁଟେଲ)ପଶ୍ଚିମ ଓଡ଼ିଶାର ପ୍ରଥମ ତଥା ବିନିକା ମାଟିର ବିପ୍ଳବୀ ନେତ୍ରୀ ଗୁରୁବାରୀ ମେହେରଙ୍କ ସହିଦ ଦିବସ ପାଳିତ ହୋଇଯାଇଛି । ପ୍ରଜାମଣ୍ଡଳ ଆନ୍ଦୋଳନର ନେତୃତ୍ଵ ନେଇ ପୋଲିସର ବ୍ୟାନେଟ ମାଡ଼ରେ ସେ ସହିଦ ହୋଇଥିଲେ ।ଅଞ୍ଚଳର ପ୍ରଜାଙ୍କ ପାଇଁ ବଳିଦାନ ଦେଇଥିବା ଏହି ନିର୍ଭୀକ ଦକ୍ଷତା ସମ୍ପନ୍ନ ନାରୀ ନେତ୍ରୀଙ୍କୁ ମନେ ପକାଇବା ଉଦ୍ଦେଶ୍ୟ ନେଇ ବିଗତ ୫ବର୍ଷ ହେଲା ସହିଦ ଦିବସ

ପାଳିତ ହୋଇଆସୁଛି। ଏହି ପରିପ୍ରେକ୍ଷୀରେ ସ୍ଥାନୀୟ ସିଦ୍ଧାର୍ଥ ଡିଗ୍ରୀ କଲେଜ ଠାରେ ଆୟୋଜିତ ଦିବସରେ କଲେଜ ଅଧ୍ୟକ୍ଷ ଡ଼ ଧୀରେନ୍ଦ୍ର ନାୟକ,ଅଧ୍ୟାପକ ଗୋପାଳ କୃଷ୍ଣ ଦାଶ,ମନୋରଞ୍ଜନ ପ୍ରଧାନ,ସାମାଜିକ କର୍ମୀ ସୃଜନ କୁମାର ପଣ୍ଡା ପ୍ରମୁଖ ଯୋଗଦେଇ ସ୍ବାଧିନତା ପାଇଁ ବଳିଦାନ ଦେଇଥିବା ସଂଗ୍ରାମୀ ନେତ୍ରୀଙ୍କୁ ମନେ ପକାଇବା ସହିତ ଆମ ଅଞ୍ଚଳର ସହିଦ ଗୁରୁବାରୀ ଆଗାମୀ ଦିନରେ ଅଞ୍ଚଳବାସୀଙ୍କ ଅବଗତ ହେବେ ସେଥିପାଇଁ ପଦକ୍ଷେପ ନେବା ଜରୁରୀ ବୋଲି ମତ ପ୍ରକାଶ ପାଇଥିଲା ।ଏହି ଅବସରରେ ପାଟଣାଗଡ଼ର ଚିତ୍ରଶିଳ୍ପୀ ଅନ୍ତର୍ୟାମୀ ମେହେର ଆଙ୍କିଥିବା ଗୁରୁବାରୀଙ୍କ କାଳ୍ପନିକ ଫଟୋଚିତ୍ର କୁ ପ୍ରଦର୍ଶିତ କରାଯାଇଥିଲା ।ସେହିପରି ସ୍ଥାନୀୟ ବିନିକା ସ୍ପୋର୍ଟସ କ୍ଲବ ଠାରେ ସାମାଜିକ କର୍ମୀ ସୃଜନ ପଣ୍ଡାଙ୍କ ଅଧ୍ୟକ୍ଷତାରେ ଅନୁଷ୍ଟିତ ସହିଦ ଦିବସରେ ଏନଏସି ଅଧ୍ୟକ୍ଷ ସୁବାଷ ଚନ୍ଦ୍ର ଭୋଇ,ବିଜେଡ଼ି ନଗର ସଭାପତି ସୋମନାଥ ମିଶ୍ର,ବ୍ଲକ ସଭାପତି ଦ୍ବାରିକାନାଥ ସାହୁ,ଶିକ୍ଷକ ହିମାଂଶୁ ଭୂଷଣ ପଣ୍ଡା,ଦୀନବନ୍ଧୁ ମେହେର ପ୍ରମୁଖଙ୍କ ସମେତ ଅଞ୍ଚଳର ସଚେତନ ନାଗରିକ ଯୋଗଦେଇ ଲୋକ ମୁଖରୁ  ଶୁଣିଥିବା ଗୁରୁବାରୀଙ୍କ ଅବଦାନ ଉପରେ କହିଥିଲେ । ପ୍ରକାଶ ଥାଉକି

ଯେ ବ୍ରିଟିଶ ଅମଳରେ ରାଜା ରାଜୁଡ଼ା ଶାସନ ଚାଲିଥିଲା ।ମନମୁଖୀ ଭାବରେ ସାଧାରଣ ଲୋକଙ୍କ ଠୁଁ କର ଆଦାୟ କରାଯାଉଥିଲା ଯାହା ଫଳରେ ଲୋକେ କର ପୈଠ କରି ଶୋଷଣର ଶିକାର ହେଉଥିଲେ ।ପ୍ରତିବାଦ ପାଇଁ ପ୍ରଜା ମେଳି ଗଠନ ହେଲା ।ପ୍ରଜାମଣ୍ଡଳର ନେତୃତ୍ୱ ନେଲେ ଗୁରୁବାରୀ ମେହେର ।୧୯୪୭ମସିହାରେ ଆନ୍ଦୋଳନ ଜୋର ଧରିଲା ଶେଷରେ ବ୍ରିଟିଶ ପୋଲିସର ବ୍ୟାନେଟ ମାଡ଼ରେ ସେହି ବର୍ଷ ଜାନୁଆରୀ ୩୦ତାରିଖରେ ଗୁରୁବାରୀ ସହିଦ ହୋଇଥିଲେ ।