23-Jan-2023

ବଲାଙ୍ଗୀର(ସନ୍ତୋଷ କୁମାର ଠାକୁର) --ଆଜି କଦମପଡାସ୍ଥିତ ସରସ୍ବତୀ ଶିଶୁ-ବିଦ୍ୟା-ଜ୍ଞାନ ମନ୍ଦିରରେ ନେତାଜୀ ସୁଭାଷ ଚନ୍ଦ୍ରବୋଷ ଓ ବୀର ସୁରେନ୍ଦ୍ର ସାଏଙ୍କ ଜନ୍ମ ଜୟନ୍ତୀ ପାଳିତ ହୋଇ ଯାଇଛି । ଏଥିରେ ମୁଖ୍ୟଅତିଥି ରୂପେ ଶିକ୍ଷାବିକାଶ ସମିତିର ପୂର୍ବତନ ଛାତ୍ର ପରିଷଦର ସଂପାଦକ ତଥା ବଲାଙ୍ଗୀର ବଜରଙ୍ଗଦଳର ଜିଲ୍ଲା ସଂଯୋଜକ ଶ୍ରୀମାନ ସୌମ୍ୟରଞ୍ଜନ ମିଶ୍ର ଦୀପ ପ୍ରଜ୍ବଳନ ପୂର୍ବକ କାର୍ଯ୍ୟକ୍ରମର ଶୁଭ ଉଦଘାଟନ କରିଥିଲେ । ବିଦ୍ୟାଳୟର ପ୍ରଧାନାଚାର୍ଯ୍ୟ ଶ୍ରୀଯୁକ୍ତ ସୁବ୍ରତ କୁମାର ବେହେରା ଅତିଥି ପରିଚୟ ପ୍ରଦାନ କରିଥିଲେ । ମୁଖ୍ୟଅତିଥି ମହୋଦୟ ନିଜ ବକ୍ତବ୍ୟ ଦେଇ କହିଥିଲେ ଯେ,ନେତାଜୀ ବିବେକାନନ୍ଦଙ୍କ ଜୀବନ ଚରିତ୍ରରେ ଅନୁପ୍ରାଣିତ ହୋଇ ପୂର୍ଣ୍ଣ ସ୍ବରାଜକୁ ଏକାନ୍ତ କାମ୍ୟ କରି ଆମରଣ ଲଢେଇ କରିଥିଲେ । ବିଦ୍ୟାଳୟର ସଂପାଦକ ଶ୍ରୀଯୁକ୍ତ ସୁରେନ୍ଦ୍ର ତ୍ରିପାଠୀ ଶିଶୂଙ୍କ ଉଦ୍ଦେଶ୍ୟରେ କହିଥିଲେ ଯେ ବୀର ସୁରେନ୍ଦ୍ର ସାଏଙ୍କ  ଆମ ଅଞ୍ଚଳର ଗୌରବ ତଥା ନିଜ ଦେଶର ମୁକ୍ତି ପାଇଁ କରିଥିବା ଲଢେଇରୁ ଆମେ ରାଷ୍ଟ୍ରୀୟ କର୍ତ୍ତବ୍ୟ ଶିକ୍ଷା କରିବା ଉଚିତ । ଛାତ୍ରୀ ସ୍ନେହାଞ୍ଜଳୀ ପଣ୍ଡା,ସ୍ବାତୀ ଦାଶ,ପ୍ରତୀକ୍ଷା ନିଆଲ,ଅରୋସ୍ମିତା ଦେବୀ ବେହେରା,ଭାଗ୍ୟଶ୍ରୀ ମହାପାତ୍ର, ପୁଷ୍ପିତା ବେହେରା ସ୍ବାଗତ ସଙ୍ଗୀତ ଗାନ କରିଥିଲେ । ଶିଶୁବକ୍ତା ରୂପେ ରାଜନନ୍ଦିନୀବେହେରା, ସ୍ମରଣିକା ଦାଶ, ସୌମ୍ୟଶ୍ରୀ ସୁବୁଦ୍ଧି, ଅଂଶୁମାନ ପଣ୍ଡା ନେତାଜୀ ଓ ସୁରେନ୍ଦ୍ର ସାଏଙ୍କ ଜୀବନି

ଉପରେ ଆଲୋକପାତ କରିଥିଲେ । ଗୁରୂଜୀ ବକ୍ତା ସଂଜୟ ପୁରୋହିତ ଶିଶୁଙ୍କୁ ନେତାଜୀଙ୍କ ପରି ସୁଦୃଢ ଓ ରାଷ୍ଟ୍ରପ୍ରେମୀ ହେବା ପାଇଁ ଆହ୍ବାନ କରିଥିଲେ ।ଉକ୍ତ କାର୍ଯ୍ୟକ୍ରମକୁ ଶିଶୁ ଭଉଣୀ ପ୍ରିୟଙ୍କା ସାହୁ ଓ ରେଶ୍ମା ମେହେର ସଂଯୋଜନା କରିଥିବା ବେଳେ ଗୁରୁମା ନିରୁପମା ପାଣିଗ୍ରାହୀ ଧନ୍ୟବାଦ ଅର୍ପଣ କରିଥିଲେ । ବିଦ୍ୟାଳୟର ଗୁରୁମା କଲ୍ୟାଣୀ ପଣ୍ଡାଙ୍କ

ନିର୍ଦ୍ଦେଶନା ତଥା ସମସ୍ତ ଗୁରୁଜୀ/ଗୁରୁମାଙ୍କ ସହଯୋଗରେ କାର୍ଯ୍ୟକ୍ରମଟି ସଫଳତା ସହ ସଂପର୍ଣ୍ଣ ହୋଇଥିଲା ।ଆଜି ଅପରାହ୍ନ 3 ଘଟିକା ସମୟରେ ବିଦ୍ୟାଳୟର "ପୂର୍ବଛାତ୍ର ଏକତ୍ରୀକରଣ" ଅନୁଷ୍ଠିତ ହୋଇଥିଲା । ସ୍ବାଗତ ସଙ୍ଗୀତ ପରେ ପ୍ରଧାନାଚାର୍ଯ୍ୟ ଅତିଥି ପରିଚୟ କରିଥିଲେ । ବ୍ୟକ୍ତିଗତ ଗୀତ ପୂର୍ବଛାତ୍ରୀ ଅଂଶିକା ପତିଙ୍କ ଦ୍ବାରା ଗାନ ପରେ , ଅତିଥି ରୁପେ ଶିକ୍ଷାବିକାଶ ସମିତିର ଦକ୍ଷିଣ-ପଶ୍ଚିମ ସମ୍ଭାଗର କୋଷାଧ୍ୟକ୍ଷ ଶ୍ରୀଯୁକ୍ତ ଦତ୍ତାନନ୍ଦ ପଣ୍ଡା ଯୋଗଦେଇ ପୁରାତନ ଛାତ୍ରଛାତ୍ରୀଙ୍କ ଉଦ୍ଦେଶ୍ୟରେ କହିଥିଲେ ଯେ ବିଦ୍ୟାଳୟର ବହୁବିଧ ଉନ୍ନତି ତଥା ସମାଜ ସହ ସଶକ୍ତ ଯୋଗାଯୋଗ ଦାୟିତ୍ବ ସେମାନେ ନେବା ଉଚିତ ।ଏହି କର୍ଯ୍ୟକ୍ରମରେ 55 ଜଣ ପୂର୍ବ ଛାତ୍ରଛାତ୍ରୀ ଯୋଗଦାନ କରିଥିଲେ । ଉକ୍ତ କାର୍ଯ୍ୟକ୍ରମରେ ଦକ୍ଷିଣ-ପଶ୍ଚିମ ସଂଭାଗର ପୂର୍ବ ଛାତ୍ରଛାତ୍ରୀ ପରିଷଦର ସଂପାଦକ ଶ୍ରୀମାନ ସୌମ୍ୟରଞ୍ଜନ ମିଶ୍ର, ବିଦ୍ୟାଳୟର ଉପସଭାପତି ବୀରେନ୍ଦ୍ର ଧରୁଆ,ସଂପାଦକ ଶ୍ରୀଯୁକ୍ତ ସୁରେନ୍ଦ୍ର ତ୍ରିପାଠୀ ସଭାମଣ୍ଡନ କରିଥିଲେ । ଶେଷରେ ବିଦ୍ୟାଳୟର ପୂର୍ବଛାତ୍ର ସଂଯୋଜକ ଗୁରୁଜୀ ଜୟନାରାୟଣ ଚାନ୍ଦ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ ।