23-Jan-2023

ବଲାଙ୍ଗୀର(ପ୍ରେରଣା ଖବର)- ସାରା ଦେଶରେ କଂଗ୍ରେସ ନେତା ରାହୁଲ ଗାନ୍ଧୀଙ୍କର ଭାରତ ଯୋଡୋଯାତ୍ରାର ପ୍ରଭାବ ଦେଖାଦେଉଛି । ତେବେ ୧୩୭ବର୍ଷର ଦଳରେ ଅର୍ନ୍ତଦ୍ୱନ୍ଦ ଯୋଗୁଁ ଦଳକୁ ଜିଣିବାରେ ଅସୁବିଧା ହେଉଛି । ଦୀର୍ଘ ୨୩ବର୍ଷ ହେଲା ଓଡିଶାରେ ନବୀନ ସରକାର ଚାଲିଛି । ରାହୁଲଙ୍କ ଭାରତ ଯୋଡୋଯାତ୍ରା ଅବସରରେ ପିସିସି ସଭାପତି ଶରତ ପଟ୍ଟନାୟକ ଭାରତ ଯୋଡୋ ଓଡିଶା କାର୍ଯ୍ୟକ୍ରମ ଚଳାଇଛନ୍ତି । ରାଜ୍ୟର ବିଭିନ୍ନ ଜିଲ୍ଲାରେ ପଦଯାତ୍ରା ପରେ ବୁଧବାର ଦିନ ବଲାଙ୍ଗୀର ଜିଲ୍ଲାରେ ପଦଯାତ୍ରା କରାଯିବାର କାର୍ଯ୍ୟକ୍ରମ ରହିଛି । ଶରତ ପଟ୍ଟନାୟକ ଦିନେ କେବିକେ ପଟ୍ଟନାୟକ ଭାବରେ ଜଣାଯାଉଥିଲେ । ଅବହେଳିତ ଓଡିଶାର ୮ଟି ଜିଲ୍ଲାର ଲୋକଙ୍କୁ ନେଇ ଆନ୍ଦୋଳନ କରି କେବିକେ ଭଳି ଦୀର୍ଘ ମିଆଦି କେନ୍ଦ୍ରୀୟ ଯୋଜନା ଆଣିବାରେ ସହାୟକ ହୋଇଥିଲେ । ଶରତ ବଲାଙ୍ଗୀର ଲୋକସଭା କ୍ଷେତ୍ରରୁ ୨ଥର ସାଂସଦ ହୋଇଥିଲେ । ବଲାଙ୍ଗୀର ଜିଲ୍ଲାର ସଇଁତଳାରେ ତାଙ୍କର ନିଜସ୍ୱ ପୈତୃକ ଘର । ଏଇଠୁ ତାଙ୍କର ସଂଗଠନ ଆରମ୍ଭ ହୋଇ ରାଜ୍ୟର ଜଣେ ପ୍ରମୁଖ ନେତୃତ୍ୱ ହେବାରେ ସଫଳ ହୋଇଛନ୍ତି । କିନ୍ତୁ ରାଜ୍ୟରେ କଂଗ୍ରେସର ଅବସ୍ଥା ସଂଗୀନ ଥିବା ବେଳେ ବିଧାସଭାରେ ୯ସିଟରୁ ୯୦ସିଟକୁ ବଢାଇବାର ସ୍ୱପ୍ନ ଦେଖିଛନ୍ତି । ସେହିକ୍ରମରେ ପଦଯାତ୍ରା କରି ଭାରତ ଯୋଡୋ ଓଡିଶା କାର୍ଯ୍ୟକ୍ରମ କରୁଛନ୍ତି । ବଲାଙ୍ଗୀର ଲୋକସଭା କ୍ଷେତ୍ରରେ କଂଗ୍ରେସ ଦୀର୍ଘ ୨୫ବର୍ଷ ହେଲା ଶାସନକୁ ଫେରି ପାରୁନି । ବର୍ତ୍ତମାନ ବଲାଙ୍ଗୀର ଜିଲ୍ଲାର ୫ଟି ବିଧାନସଭା କ୍ଷେତ୍ରରୁ ୨ଟି ବଲାଙ୍ଗୀର ସଦର ଓ କଣ୍ଟାବାଞ୍ଜି ନିର୍ବାଚନମଣ୍ଡଳିରେ କଂଗ୍ରେସର ବିଧାୟକ ରହିଛନ୍ତି । ମୋଟ ସଂସଦୀୟ କ୍ଷେତ୍ରର ୭ଟି ବିଧାନସଭା ଆସନରୁ କଂଗ୍ରେସ ଦୁଇଟି ଆସନ ଜିଣିଛି । କିନ୍ତୁ ସେପଟେ ବଲାଙ୍ଗୀର ଜିଲ୍ଲାରେ କଂଗ୍ରେସର ବରିଷ୍ଠନେତାଗଣ ରହିଥିଲେ ହେଁ ଦଳ ଦୁର୍ବଳ ହୋଇପଡିଛି । ଜିଲ୍ଲାପରିଷଦ ନିର୍ବାଚନରେ ଭଲ କରିନାହିଁ । କେବଳ କଣ୍ଟାବାଞ୍ଜି ନିର୍ବାଚନ ମଣ୍ଡଳିକୁ ଛାଡିଦେଲେ ଭୋଟରମାନେ କଂଗ୍ରେସଠାରୁ ମୁହଁ ଫେରାଇ ନେଇଛନ୍ତି । ଯଦିଓ ବଲାଙ୍ଗୀର ବିଧାନସଭା କ୍ଷେତ୍ରରେ କଂଗ୍ରେସର ବରିଷ୍ଠନେତା ନରସିଂହ ମିଶ୍ର ରହିଛନ୍ତି ତଥାପି ଏହି ନିର୍ବାଚନମଣ୍ଡଳିରେ ତଳସ୍ତରରେ ସଂଗଠନ ସଂପୂର୍ଣ୍ଣ ଭୁଷୁଡି ପଡିଛି । ନରସିଂହ ମିଶ୍ରଙ୍କ ସମର୍ଥକମାନେ ଜିଲ୍ଲା କଂଗ୍ରେସକମିଟିର ପ୍ରମୁଖ ଦାୟୀତ୍ୱରେ ରହିଛନ୍ତି । ପୁରୁଣା କଂଗ୍ରେସ ଓ ନୂତନ କଂଗ୍ରେସ କର୍ମକର୍ତ୍ତାଙ୍କ ମଧ୍ୟରେ ମନର ମିଳନ ନାହିଁ । ଅନେକ ପୁରୁଖା ନେତା ଦଳଛାଡି ଚାଲିଯାଇଛନ୍ତି ଓ ଆଉ ଯେତିକି ରହିଛନ୍ତି ମୁହଁମାରି ବସିରହିଛନ୍ତି । ଶରତ ଗୋଷ୍ଠୀ ଓ ନରସିଂହ ଗୋଷ୍ଠୀ ମଧ୍ୟରେ ତିକ୍ତତା ରହିଛି । କେହି କାହାକୁ ଗ୍ରହଣ କରିବା ଅବସ୍ଥାରେ ନାହାଁନ୍ତି ।  ଶରତ ପଟ୍ଟନାୟକ ପିସିସି ସଭାପତି ହେବାପରେ ଦଳର ସଂଗଠନରେ ଉତ୍ସାହ ବଢିଛି । କିନ୍ତୁ ଉଭୟ ଗୋଷ୍ଠୀ ମଧ୍ୟରେ ମନର ମିଳନ କରାଇବାରେ ଏପର୍ଯ୍ୟନ୍ତ ଶରତ କିମ୍ବା ନରସିଂହ କାର୍ଯ୍ୟକରିନାହାଁନ୍ତି । ପୁରୁଣା କଂଗ୍ରେସକର୍ମି ଅବହେଳିତ ହୋଇ ପଡିରହିଛନ୍ତି । ନରସିଂହଙ୍କ ସାଙ୍ଗରେ ରହିଥିବା କର୍ମକର୍ତ୍ତାମାନେ ଦଳୀୟ ସଂଗଠନ ଅପେକ୍ଷା ନେତାଙ୍କ ନିଜସ୍ୱ ସଂଗଠନ ବଢାଇବାରେ ବ୍ୟସ୍ତ ଥିବା କୁହାଯାଉଛି । ତେଣୁ  ଏବେ ଭାରତ ଯୋଡୋ ଓଡିଶା କାର୍ଯ୍ୟକ୍ରମ ମାଧ୍ୟମରେ କିଛି ପରିବର୍ତ୍ତନ ଆଶା କରାଯାଉଛି । କାହିଁକି ନା ଉଭୟ ଗୋଷ୍ଟୀ ଏହି କାର୍ଯ୍ୟକ୍ରମ ପାଇଁ ଉତ୍ସାହିତ ଥିବା ଦେଖାଯାଉଛି । ବଲାଙ୍ଗୀର ଜିଲ୍ଲାରେ ଭାରତ ଯୋଡୋ ସାଙ୍ଗକୁ କଂଗ୍ରେସିଆଙ୍କ ଦିଲ ଓ ମନ୍ ଯୋଡୋ କାର୍ଯ୍ୟକ୍ରମର ଆବଶ୍ୟକତା ରହିଛି ।