08-Jan-2023

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ)  ଆଗାମୀ ବର୍ଷ ସାଧାରଣ ନିର୍ବାଚନ ବର୍ଷ ହୋଇଥିବାରୁ ଉଭୟ କେନ୍ଦ୍ର ଓ ରାଜ୍ୟରେ ଶାସନକ୍ଷମତାରେ ଥିବା ରାଜନୈତିକ ଦଳମାନେ ନିଜ ନିଜର ଦଳୀୟ ପତିଆରାବୃଦ୍ଧି  ଲକ୍ଷ୍ୟରେ ସରକାରୀ ଅର୍ଥଅନୁଦାନର ବିପୁଳବ୍ୟୟ କରିବା ଆରମ୍ଭ କରିଦେଲେଣି । ଏହିକ୍ରମରେ ବଲାଙ୍ଗୀର ପୌରାଞ୍ଚଳର ମହାରାଣୀସାଗରର ଉନ୍ନତି ପାଇଁ ୨୨ କୋଟି ଟଙ୍କା ଆସିଛି । ଏହା ସହିତ  ମଇଳାପାଣି ନିଷ୍କାସନ ପାଇଁ ୨୫ ଲକ୍ଷ ଓ ସହରର  ଏହି ପୋଖରୀ ସହିତ ଅନ୍ୟାନ୍ୟ ୧୬ ଟି ପୋଖରୀ ବା ବନ୍ଧକଟାର ଉନ୍ନତି ପାଇଁ ଆହୁରି ଅର୍ଥବରାଦ ହୋଇଥିବା ଶୁଣାଯାଉଛି । ତେବେ ଏହି ପ୍ରକଳ୍ପ ପାଇଁ ସ୍ଥାନାଭାବ ଯୋଗୁଁ ଏହାସହିତ କିଛିଦିନ ଧରି ସହରର ସରକାରୀ ଜମିରୁ ଜବରଦଖଲ ଉଚ୍ଛେଦକୁ ବିକାଶ ଆଳରେ ମିଶାଇ ଦିଆଯାଇଛି । ତେବେ କିଛିଦିନ ପୂର୍ବର  ରାସ୍ତା ପ୍ରଶସ୍ତିକରଣ ବା ସୌନ୍ଦର୍ଯ୍ୟକରଣ ନିମନ୍ତେ ସହରର ସୂର୍ଯ୍ୟନଗର , ଗାନ୍ଧୀନଗର ପଡା, ବ୍ରାହ୍ମଣପଡାର କରଙ୍ଗାକଟା ଆଡି, ରୁଗୁଡିପଡା, ଫଲସାପଦରି ଓ ଅନ୍ୟାନ୍ୟ ପଡାରେ ରାସ୍ତାକଡ ଦୋକାନ ବା ଘରଭଙ୍ଗା ପ୍ରକ୍ରିୟାବେଳେ  ଜନପ୍ରତିକ୍ରିୟା ସତ୍ତ୍ୱେ ସେତେଟା ଜନ ଆନ୍ଦୋଳନ ପ୍ରକାଶ ପାଇ ନଥିଲାବେଳେ, ସଂପ୍ରତି ଇନ୍ଦିରାନଗର, ଇଚ୍ଛାପଡାର ଉଚ୍ଛେଦ ନୋଟିସ୍ କୁ ନେଇ ବ୍ୟାପକ ବିରୋଧ ସ୍ବରୂପ ଆନ୍ଦୋଳନ, ରାସ୍ତାରୋକ, ଶୋଭାଯାତ୍ରା, ଗଣଧାରଣା ଓ  ଆକ୍ସନ କମିଟି ବା ବିଭିନ୍ନ ସଂଗଠନକୁ ଲଗାଯାଇ 'ବଲାଙ୍ଗୀର ବନ୍ଦ' ଡାକରା ତଥା ବନ୍ଦ ପ୍ରତ୍ୟାହାର  ଇତ୍ୟାଦି କରାଯାଇଆସୁଛି । ଏହାକୁ ନେଇ ରାଜନୀତି ବି ଆରମ୍ଭ ହୋଇଯାଇଛି । ଗତ ପୌରନିର୍ବାଚନ ପୂର୍ବରୁ ଏହିପଡାର ବାସିନ୍ଦାମାନେ ପୌରଉପାଧ୍ୟକ୍ଷାଙ୍କୁ ମନ୍ଦିରରେ ଶପଥ କରାଇ ବହୁସଂଖ୍ୟକ ଭୋଟରେ ଜିତାଇଥିବାରୁ ଉପାଧ୍ୟକ୍ଷା ଗାୟତ୍ରୀ ଭୋଇ ଆରମ୍ଭରୁ ଉଚ୍ଛେଦ ହେବାକୁ ଥିବା ଆନ୍ଦୋଳନକାରୀଙ୍କ ସପକ୍ଷରେ ରହିଆସିଛନ୍ତି । ଏବେ ସେ ପ୍ରଶାସନ ଓ ପୌର ଅଧିକାରୀଙ୍କ ଉଚ୍ଛେଦ ପ୍ରକ୍ରିୟାକୁ ବିରୋଧ କରି ସେ ତାଙ୍କ ପଦ ଓ ଏପରିକି ତାଙ୍କୁ ସମର୍ଥନ କରିଥିବା ଶାସକ ବିଜେଡିଦଳରୁ ଇସ୍ତଫା ଦେବାକୁ ଘୋଷଣା କରିଛନ୍ତି । ଏଣେ ଜିଲ୍ଲାପ୍ରଶାସନ ବନାମ ଜିଲ୍ଲାପାଳ ଓ ବିଧାନସଭା ଗୃହର ପରିବେଶ ଓ ପ୍ରଦୂଷଣ  ସବ୍ କମିଟିର ଅଧ୍ୟକ୍ଷ ଥିବା ବଲାଙ୍ଗୀର ବିଧାୟକ ତଥା  ନରସିଂହ ମିଶ୍ର ଜଳାଶୟଗୁଡିକର ପୁନରୁଦ୍ଧାର ଆଳରେ ପ୍ରକଳ୍ପ ପାଇଁ ଜବରଦଖଲ ଉଚ୍ଛେଦକୁ ଜୋର୍ ଦେଉଛନ୍ତି । ମହାରାଣୀ ସାଗର ପ୍ରସଙ୍ଗରେ ଶ୍ରୀ ମିଶ୍ର ତାଙ୍କୁ ଆକ୍ଷେପ କରାଯାଉଥିବାର ପ୍ରତ୍ୟୁତ୍ତରରେ ଗଣମାଧ୍ୟମକୁ ସେ ନୁହଁନ୍ତି, ଗରିବଙ୍କ ଶତ୍ରୁ ରାଜପରିବାର ବୋଲି ବିବୃତି ଦେଇଥିବା ପ୍ରକାଶ । ତେଣୁ ଏହି ଉଚ୍ଛେଦ ଓ ଆନ୍ଦୋଳନର ପଛରେ ବଲାଙ୍ଗୀରର ଏହି ଦୁଇ ପ୍ରଭାବଶାଳୀ ରାଜନେତା ନରସିଂହ ମିଶ୍ର ଓ ସଂପ୍ରତି ରାଜ୍ୟ ଗୃହ ନିର୍ମାଣ ବୋର୍ଡ଼ର ଅଧ୍ୟକ୍ଷ ପୂର୍ବତନ ସାଂସଦ କଳିକେଶ ନାରାୟଣ ସିଂଦେଓ, ପୂର୍ବମନ୍ତ୍ରୀ ଅନଙ୍ଗ ଉଦୟ ସିଂଦେଓ ପ୍ରମୁଖ ବିଜେଡିର ଟଣାଓଟରା ପଦାକୁ ଆସିଛି । ଏହି କମିଟି ମଧ୍ୟ ପୂର୍ବରୁ ବହୁ ଅନୁଦାନର ବାଟମାରଣା ଅଭିଯୋଗ କରି ତଦନ୍ତ ନିର୍ଦ୍ଦେଶ ଦେଇଛି ଏହି କମିଟି । ତେଣୁ କହିବା ବାହୁଲ୍ୟ , ଏଥିରେ ରାଜନୀତି ପଶି ଯାଇଛି ।

ଅନ୍ୟପକ୍ଷରେ ମହାରାଣୀ ସାଗର ବା ଇନ୍ଦିରାନଗର ଆଦି ଅଞ୍ଚଳରେ ବହୁ ସରକାରୀ କର୍ମଚାରୀ ଓ ସହରବାସୀ ଘରଦ୍ବାର ଥିବା ସ୍ବଚ୍ଛଳବର୍ଗର ବ୍ୟକ୍ତି ସରକାରୀ ଜମି ଜବରଦଖଲ କରି ଘର ବନେଇଥିବା ଓ ଏହାକୁ କଦାପି ଛଡାଯିବ ନାହିଁ ବୋଲି ଜିଲ୍ଲାପାଳ ଚଞ୍ଚଳ ରାଣା ପ୍ରକାଶ କରିଛନ୍ତି । ତେଣୁ ଉଚ୍ଛେଦ ହେବାକୁ ଆତଙ୍କିତ ଏହି ପଡାବାସୀ ବିକାଶ ବା ପ୍ରକଳ୍ପ ଆଳରେ ଷଣ୍ଢୁଆସି ଆକ୍ରମଣରେ ଫସି ଯାଇଛନ୍ତି । ସେମାନେ ମଧ୍ୟ ରାଜନୈତିକ ଆକ୍ରୋଶର ଶିକାର ହେଉଥିବା କ୍ଷୋଭପ୍ରକାଶ କରିଛନ୍ତି ।

ତେବେ ଏଠାରେ ପ୍ରଶ୍ନ ଉଠେ ଯେ, ସହରରେ ଯେଉଁମାନେ ଦୀର୍ଘ ପଚାଶ / ଶହେ ବର୍ଷଧରି ରାଜସ୍ୱ ବିଭାଗ, ପୌର ସଂସ୍ଥା ଓ ପ୍ରଶାସନର ସମ୍ପୂର୍ଣ୍ଣ ଜ୍ଞାତସାରରେ ତଥା ଅନୁମତି ହାସଲ କରି ପାନୀୟଜଳ, ବିଦ୍ୟୁତ୍ ସଂଯୋଗ, ଋଣ ଆଦି ନେଇ ସେହିସବୁ ପଡାରେ ଅଙ୍ଗନବାଡି ସ୍କୁଲ୍, ସ୍କୁଲ୍ ଓ ଅନ୍ୟାନ୍ୟ ସରକାରୀ ସୁବିଧାସୁଯୋଗ ଉପଭୋଗ କରି ସପରିବାର ବସବାସ କରି ସରକାରଙ୍କୁ ନାଗରିକ ଭାବେ ଭୋଟଦେଇ ଆସୁଛନ୍ତି , ସେମାନେ ଏବେ ହଠାତ୍ ବିନା ପ୍ରାକ୍ ଥଇଥାନରେ ଅନାଥ ବାସଚ୍ୟୁତ ହୋଇପଡିବେ କାହା ସ୍ବାର୍ଥରେ  ? କେଉଁଟା ସରକାରଙ୍କର ପ୍ରାଥମିକତା ?  ନାଗରିକ, ଗରିବଲୋକେ , ଗୃହହୀନମାନେ ନା ସୌନ୍ଦର୍ଯ୍ୟକରଣ ବା ବିକାଶମୂଳକ ପ୍ରକଳ୍ପ ?  କୁହାଯାଉଛି, ଏହାର ବିଚାର ଲୋକେ ଆଗାମୀ ନିର୍ବାଚନବେଳେ ଦେବେ  !