04-Dec-2020

(ପ୍ରେରଣା ଖବର) ଶ୍ରୀନଗର : କେନ୍ଦ୍ରଶାସିତ ଅଞ୍ଚଳ ଜମ୍ମୁ-କାଶ୍ମୀରରେ ଶୁକ୍ରବାର ତୃତୀୟ ପର୍ଯ୍ୟାୟ ଜିଲ୍ଲା ବିକାଶ ପରିଷଦ(ଡିଡିସି) ନିର୍ବାଚନ ଏବଂ ପଞ୍ଚାୟତ ଉପନିର୍ବାଚନ ଅନୁଷ୍ଠିତ ହେଉଛି। ସକାଳ ୭ଟାରୁ ଆରମ୍ଭ ହୋଇଥିବା ମତଦାନ ଅପରାହ୍ଣ ୨ଟା ପର୍ଯ୍ୟନ୍ତ ଚାଲିବ। ରାଜ୍ୟ ମୁଖ୍ୟ ନିର୍ବାଚନ କମିଶନର କେ.କେ. ଶର୍ମା ଏ ସମ୍ପର୍କରେ ସୂଚନା ଦେଇ କହିଛନ୍ତି, ଶାନ୍ତିଶୃଙ୍ଖଳାର ସହ ମତଦାନପାଇଁ ସମସ୍ତ ପ୍ରକାର ବ୍ୟବସ୍ଥା ଗ୍ରହଣ କରାଯାଇଛି।ଏହି ପର୍ଯ୍ୟାୟରେ ୩୩ଟି ଡିଡିସି ମଣ୍ଡଳୀ ପାଇଁ ପର୍ଯ୍ୟାୟରେ ଭୋଟ୍‍ଗ୍ରହଣ କରାଯାଉଛି। ୩୦୫ ଜଣ ପ୍ରାର୍ଥୀ ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହୋଇଛନ୍ତି। ସେମାନଙ୍କ ମଧ୍ୟରେ ୨୫୨ ପୁରୁଷ ଏବଂ ୫୩ ଜଣ ମହିଳା ଅନ୍ତର୍ଭୁକ୍ତ। ସେହିଭଳି ସରପଞ୍ଚ ପଦବୀ ପାଇଁ ୬୬ଟି ମଣ୍ଡଳୀରେ ଆଜି ମତଗ୍ରହଣ କରାଯାଉଛି। ଏଥିରେ ୧୮୪ ଜଣ ପ୍ରାର୍ଥୀ ନିର୍ବାଚନ ଲଢ଼ୁଛନ୍ତି। ମୋଟ୍‍ ୧୨୬ଟି ସରପଞ୍ଚ ପଦବୀ ମଧ୍ୟରୁ ୪୦ ଜଣ ବିନା ପ୍ରତିଦ୍ୱନ୍ଦ୍ୱିତାରେ ବିଜୟୀ ହୋଇଛନ୍ତି। ଏହି ପର୍ଯ୍ୟାୟ ନିମନ୍ତେ ମୋଟ ୨ ହଜାର ୪୬ଟି ବୁଥ୍‍ ସ୍ଥାପନ କରାଯାଇଛି। ସେଥିମଧ୍ୟରୁ ଜମ୍ମୁରେ ୭୯୨ ଓ କାଶ୍ମୀରରେ ୧ ହଜାର ୨୫୪ଟି ରହିଛି।