01-Jan-2023

ଜଣେ ଶିକ୍ଷୟିତ୍ରୀ ଭାବରେ ନିଜର ବୃତ୍ତିଗତ ଜୀବନ ଆରମ୍ଭ କରିଥିବା ଏହି ମହିଳା ଜଣକ ପରବର୍ତ୍ତୀ ପର୍ଯ୍ୟାୟରେ ଜଣେ ନାରୀ ନେତ୍ରୀ ଭାବରେ ନିଜର ସଫଳତାକୁ ଦୋହରାଇଛନ୍ତି । ଓଡ଼ିଶାର ମୋଟ୍ ୧୧୫ଟି ମୁନିସିପାଲିଟି ଓ ଏନ୍‌ଏସି ମଧ୍ୟରେ ବଲାଙ୍ଗୀର ମୁନିସିପାଲିଟିର ଅଧ୍ୟକ୍ଷା ଆସନରେ ପ୍ରତିଦ୍ୱନ୍ଦିତା କରି ସାରା ରାଜ୍ୟରେ ଅଧିକ ମାରଜିନ୍‌ରେ ଭୋଟ୍ ପାଇ ବିଜୟ ମୁକୁଟ ପିନ୍ଧିଥିବା ଏହି ମହିଳା ଜଣକ ହେଉଛନ୍ତି ବଲାଙ୍ଗୀର ମୁନିସିପାଲିଟିର ପୌରାଧ୍ୟକ୍ଷା ଶ୍ରୀମତୀ ଲିକା ସାହୁ । ଶିକ୍ଷୟିତ୍ରୀ ଚୌକିରୁ ଦାୟିତ୍ୱ ସଂପନ୍ନ ପୌରାଧ୍ୟକ୍ଷା ଆସନ ଅଳଙ୍କୃତ କରି  ନିଜ କ୍ୟରିୟରର ଦ୍ୱିତୀୟ ଇନିଙ୍ଗସ୍ ଆରମ୍ଭ କରିଥିବା ଲିକା ସାହୁଙ୍କ କିଛି ଅଭିବ୍ୟକ୍ତି, ଅନୁଭୂତି ଓ ଅଭିଜ୍ଞତାକୁ ନେଇ ପ୍ରେରଣାର ଏକ ସ୍ୱତନ୍ତ୍ର ସାକ୍ଷାତକାର । 

////////////00000////////0000////

    ଶ୍ରେଣୀ ଗୃହରୁ ସିଧାସଳଖ ମୁନିସିପାଲିଟିର ଅଧ୍ୟକ୍ଷା ଆସନର ଯାତ୍ରା ସଂପର୍କରେ କିଛି କହିବେ ?

ଶ୍ୱଶୁର ଘରର ସମସ୍ତଙ୍କ ସହଯୋଗ ଓ ମୋ ଦଳ ମୋ ପ୍ରତି ରଖିଥିବା ଆସ୍ଥା ବଳରେ ମୁଁ ଆଜି ଅଧ୍ୟକ୍ଷା ଆସନରେ ବସି ନିଜ ଦାୟିତ୍ୱକୁ ସମ୍ଭାଳିି ପାରିଛି । 
  ବଲାଙ୍ଗୀର ମୁନିସିପାଲିଟିର କେଉଁ ପ୍ରମୁଖ ସମସ୍ୟାର ଆପଣ ପାରୁପର୍ଯ୍ୟନ୍ତ ସମାଧାନ ଚାହିଁବେ ? 
ବଲାଙ୍ଗୀର ସହରର ମୁଖ୍ୟ ସମସ୍ୟା ପରିମଳ ବ୍ୟବସ୍ଥା ଓ ଡ୍ରେନେଜ୍ ବ୍ୟବସ୍ଥାର ପରିବର୍ତ୍ତନ ଉପରେ ମୁଁ ଗୁରୁତ୍ୱ ଦେଉଛି । 
  ଆପଣ ଅଧ୍ୟକ୍ଷା ଆସନରେ ବସିବାର ଗୋଟିଏ ବର୍ଷର ଉପଲବ୍ଧିକୁ କିପରି ଦେଖନ୍ତି ?
  ଅନ୍ୟ ଅଧ୍ୟକ୍ଷଙ୍କ ତୁଳନାରେ ଆମ ସମୟରେ ବଲାଙ୍ଗୀର ମୁନିସିପାଲିଟିର ଅନେକ ଆଖିଦୃଶିଆ ଉନ୍ନତି ହୋଇଛି । ଆସନ୍ତା ଗୋଟିଏ ବର୍ଷ ଭିତରେ ବଲାଙ୍ଗୀର ମୁନିସିପାଲିଟିର ଅନେକ କିଛି ଉନ୍ନତିମୂଳକ କାମ କରିବାର ଆମେ ଲକ୍ଷ୍ୟ ରଖିଛୁ । ମୁନିସିପାଲିଟି ଅନ୍ତର୍ଗତ ୨୧ ଟି ୱାର୍ଡ ରେ ରାସ୍ତାଘାଟ ନିର୍ମାଣ, ଡ୍ରେନ୍ ନିର୍ମାଣ, ବନ୍ଧର ପଙ୍କୋଦ୍ଧାର, ବନ୍ଧ  ସୌନ୍ଦର୍ଯ୍ୟକରଣ ପରି କାମ ହାତକୁ ନିଆଯାଇଛି ।
   ସର୍ବାଧିକ ଭୋଟ ମାରିଜିନ୍‌ରେ ବିଜେଡି ଆସନରୁ ଜିତି ପୌରାଧ୍ୟକ୍ଷା ଆସନ ଗ୍ରହଣ କରିଥିବା ଜଣେ ଅଧ୍ୟକ୍ଷା ଭାବରେ ଆପଣଙ୍କ ଆଗାମୀ ପ୍ଲାନ ପ୍ରୋଜେକ୍ଟ କଣ ରହିଛି ?
ବଲାଙ୍ଗୀର ମୁନିସିପାଲିଟି ଅଧୀନରେ ଥିବା ୧୭ଟି ବନ୍ଧର ସୌନ୍ଦର୍ଯ୍ୟକରଣ ଓ ପଙ୍କୋଦ୍ଧାର କାମ କରାଯିବ । ସହରରେ ମଶାର ଉଦ୍ରବକୁ କମାଇବା ପାଇଁ ସରକାର ମୁନିସିପାଲିଟିକୁ ତିନୋଟି ଟିଫା ମେସିନ୍ ଅନୁମୋଦନ କରିଛନ୍ତି । ବିଭିନ୍ନ ୱାର୍ଡ ରେ ଓପନ୍ ଜିମ୍ ଓ ୱାଟର ଏଟିଏମ୍ ଓ ସ୍ମାର୍ଟ ପାର୍କ ନିର୍ମାଣ ହେବା ସହରର ମୁଖ୍ୟ ୫ଟି ସ୍ଥାନରେ ସିସି ଟିଭି କେମେରା ସଂଯୋଗ ହେବ । ସହରରେ ଡ୍ରେନେଜ୍ ବ୍ୟବସ୍ଥାର ସୁଧାର ପାଇଁ ମୁନିସିପାଲିଟି ତରଫରୁ ମାଷ୍ଟରପ୍ଲାନ ପ୍ରସ୍ତୁତ ହୋଇଛି । ସରକାର ଏହାକୁ ଅନୁମୋଦନ ମଧ୍ୟ କରିଛନ୍ତି । ଏତଦ୍‌ବ୍ୟତିତ ଟାଉନ୍‌ହଲ୍ ଓ ରାଜେନ୍ଦ୍ର ପାର୍କର ସୌନ୍ଦର୍ଯ୍ୟକରଣ କାମ ଖୁବ୍ ଶୀଘ୍ର ଆରମ୍ଭ ହେବ । ବିଜାଖମନ ଠାରେ ଶବଦାହ ଗୃହ କାମ ଠାରୁ ଆରମ୍ଭ କରି ସହର ବିଭିିନ୍ନ ସ୍ଥାନରେ ଭେଣ୍ଡିଂ ଜୋନ୍ ନିର୍ମାଣ କାମ ଆମ ସରକାରଙ୍କ ସଫଳତାର ଝଲକ୍ ଅଟେ । ମୁନିସିପାଲିଟିର ଲିମିଟେଡ ଫଣ୍ଡ ମଧ୍ୟରେ ସହରର ବକାଶ କାମ ଆଗେଇ ଚାଲିଛି । 
    ଆପଣଙ୍କର ଏହି ସଫଳତାର ଶ୍ରେୟ କାହାକୁ ଦେବାକୁ ଚାହିଁବେ ?
ପ୍ରଥମେ ମାଁ ସମଲେଶ୍ୱରୀଙ୍କ କୃପା ଓ ପରେ ମାନ୍ୟବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସଦିଚ୍ଛା ବଳରେ ମୁଁ ଆଜି ଅଧ୍ୟକ୍ଷା ଭାବରେ ଲୋକ ମାନଙ୍କ ସେବା କରିବାର ସୁଯୋଗ ପାଇଛି । ପୁଣି ବିଜେଡିର ପୂର୍ବତନ ମନ୍ତ୍ରୀ ଅନଙ୍ଗ ଉଦୟ ସିଂଦେଓ, କଳିକେଶ ନାରାୟଣ ସିଂଦେଓ ଓ ଅର୍କେଶ ନାରାୟଣ  ସିଂଦେଓ ଙ୍କ ସହଯୋହଗ ବଳରେ ମୁଁ ଏହି ସଫଳତା ପାଇପାରିଲି ବୋଲି କହିବି ।