02-Nov-2022

ବଲାଙ୍ଗୀର(ପ୍ରେରଣା ଖବର) ନଟରାଜ କଳା ପରିଷଦର ସଭାପତି ହରିନାରାୟଣ ପୂଜାରୀଙ୍କ ନିର୍ଦ୍ଦେଶ କ୍ରମେ ନଭେମ୍ବର ୧ ତାରିଖ ବଲାଙ୍ଗିର ଦିନ୍ ଦିବସରେ କୋସଲ କଳା ମଣ୍ଡଳ ର ପୂରୁଣା ମଂଚ ଠାରେ ୱିଙ୍ଗ-୬ ର  ପୋଷ୍ଟର ଉନ୍ମୋଚନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ନଟରାଜ କଳା ପରିଷଦ ଆଗାମୀ ୧୮,୧୯ ଓ ୨୦ ତାରିଖରେ ତାର ରଜତ ଜୟନ୍ତି ଉତ୍ସବ ପାଳନ କରିବାକୁ ଯାଉଛି । ଏ ଅବସରରେ ଅଧ୍ୟାପକ ପ୍ରଶାନ୍ତ ଖମାରୀଙ୍କ ନିର୍ଦ୍ଦେଶନା ତଥା ମଧୁସୁଦନ ନାୟକଙ୍କ ସହ ନିର୍ଦ୍ଦେଶନାରେ ଆଶାପୁର ନୁ ଆମେରିକା, ଅ-ଆ-ଇ, ଘା, ଯଯାତି, ପୃଥ୍ୱୀରାଜ ଓ ନାବକେଲି ଏପରି ୫ଟି ନାଟକ ଓ ଗୋଟିଏ ନୃତ୍ୟ ନାଟିକା ପ୍ରଦର୍ଶିତ ହେବ । ବଲାଙ୍ଗିର ଦିନ୍ ସମୟକୁ ଶୁଭ ଲଗ୍ନ

ମନେ କରି ନାଟକ ର ପୋଷ୍ଟର ଗୁଡିକୁ  କଳାମଣ୍ଡଳ ପଡିଆର ପୁରୁଣା ମଂଚ ଠାରେ ଏକ କାର୍ଯ୍ୟକ୍ରମ ମାଧ୍ୟମରେ ଉନ୍ମୋଚିତ କରାଯାଇଥିଲା । ବିଶିଷ୍ଟ କଳାକାର ଉଗ୍ରସେନ ଷଡଙ୍ଗି ଏହାକୁ ଉନ୍ମୋଚନ କରିଥିଲେ । ପରେ ପରେ  ପୋଷ୍ଟର ଗୁଡିକୁ କଳାମଣ୍ଡଳ ପଡିଆରେ ପ୍ରଦର୍ଶନ ଉଦ୍ଦେଶ୍ୟରେ ସଜ୍ଜିତ କରାଯାଇଥିଲା । ବଲାଙ୍ଗିର ଦିନ୍ ଉତ୍ସବ କୁ ଆସୁଥିବା ସମସ୍ତ ଦର୍ଶକ ଓ କଳାକାର ଏହାକୁ ଉପଭୋଗ କରିଥିଲେ । ଅନୁଷ୍ଠାନ ର ସଂପାଦକ ପ୍ରହଲ୍ଲାଦ ଦର୍ଜୀ, କାର୍ଯ୍ୟକାରୀ ସଭାପତି ସତ୍ୟବ୍ରତ ଆଚାର୍ଯ୍ୟ ଓ ଆଶିଷ ସମସ୍ତ କାର୍ଯ୍ୟକ୍ରମ ପରିଚାଳନା କରିଥିଲେ । ଇତ୍ୟବସରରେ ନଟରାଜ କଳାପରିଷଦର ମୁଖପତ୍ର ତାଣ୍ଡବର ସଂପାଦକ ଶମ୍ଭୁ ପ୍ରସାଦ ଦାଶ ତାଣ୍ଡବର ପ୍ରକାଶନ କାର୍ଯ୍ୟ ଆଗେଇ ଚାଲିଥିବା କଥା ସୂଚିତ କରାଇଥିଲେ ।