29-Aug-2022

ବିନିକା(ହିମାଂଶୁ ଶେଖର ପୁଟେଲ) ହାତୀ ପଳଙ୍କ ଆକ୍ରମଣରେ ଜିବର୍ଦ୍ଧନ କର୍ଣ୍ଣର ମୃତ୍ୟୁକୁ ୪ବର୍ଷ ୯ ମାସ ପୁରିଥିବା ବେଳେ ଆଦର୍ଶ ବିଦ୍ୟାଳୟ ଖୋଲିବାର ଇତି ମଧ୍ୟରେ ୩ବର୍ଷ ବିିତି ଯାଇଥିଲେ ମଧ୍ୟ ଜିଲ୍ଲା ପ୍ରଶାସନର ଲିଖିତ ପ୍ରତିଶୃତି  ଜିବର୍ଦ୍ଧନର ପତ୍ନୀ ଜୟନ୍ତୀ କର୍ଣ୍ଣକୁ ଅଦ୍ୟାବଧି ସରକାରୀ ଚାକିରୀ ମିଳି ପାରିନାହିଁ ଯାହା ଫଳରେ ୪ପ୍ରାଣୀ କୁଟୁମ୍ବ ବହୁ ଦୁଃଖ କଷ୍ଟରେ ଜୀବନ ବିତାଉଥିବା ଜଣାପଡିଛି ।ଘଟଣାଟି ହେଉଛି ସୁବର୍ଣ୍ଣପୁର ଜିଲ୍ଲା ବିନିକା ବ୍ଳକ ଅନ୍ତର୍ଗତ ଚରଦା ପଞ୍ଚାୟତ ଫୁଲମୁଠି ଗ୍ରାମର ।ପ୍ରକାଶ ଥାଉ କି ଏହି ପରିବାରର ଏକ ମାତ୍ର ରୋଜଗାର କ୍ଷମବ୍ୟକ୍ତି ଜିବର୍ଧନ ବସରେ କଣ୍ଡକ୍ଟର କାମ କରି ସବୁଦିନ ପରି ରାତି ୯ ଟା ମଧ୍ୟରେ ଘରକୁ ଫେରୁଥିଲା ହେଲେ ସେହି ଅଭିଶପ୍ତ (ତାରିଖ ୨୬/୧୧/୨୦୧୭) ରାତି ତା ପାଇଁ ଶେଷ ରାତି ବୋଲି କେହିବି ଜାଣି ନଥିଲେ। ବାଇକ ଯୋଗେ ଜିବର୍ଦ୍ଧନ ଆସୁଥିବା ବେଳେ ଗାଁ ସ୍କୁଲ ନିକଟରେ ହାତୀପଲ ରାସ୍ତା ପାରି ହେଉଥିବା ସମୟରେ ହାତୀ ହାବୁଡ଼ରେ ପଡ଼ି ଜୀବନ ଯାଇଥିଲା ।ଘଟଣା ପ୍ରଘଟ ହେବାପରେ ଅଞ୍ଚଳରେ ଶୋକର ଛାୟା ଖେଳିଯାଇଥିଲା ।ସକାଳେ ଗ୍ରାମବାସୀ ଜିବର୍ଦ୍ଧନର ଶବକୁ ଧରି ସ୍ଥାନୀୟ ବସଷ୍ଟାଣ୍ଡ ଛକ ଠାରେ ସୁବର୍ଣ୍ଣପୁର ବିନିକା ରାଜପଥରେ ବସି ରହି କ୍ଷତିପୂରଣ ବାବଦରେ ଆନ୍ଦୋଳନ କରିଥିଲେ ।ଦୀର୍ଘ ସମୟ ଧରି ରାସ୍ତାରୋକ ଚାଳିବା ପରେ ଜିଲ୍ଲା ପ୍ରଶାସନ ଘଟଣା ସ୍ଥଳରେ ପହଞ୍ଚି ଆନ୍ଦୋଳନକାରୀଙ୍କ ସହିତ ଆଲୋଚନା କରିଥିଲା ।ଜିବର୍ଧନ ପରିବାରକୁ ଆର୍ଥିକ ସହାୟତା,ରେଡକ୍ରସ ଫଣ୍ଡରୁ ୧୦ହଜାର ଟଙ୍କା,ଆବାସଘର ଯୋଗାଇଦେବା ସହ ପରିବାର ପରିପୋଷଣ ପାଇଁ ପତ୍ନୀକୁ ସରକାରୀ ଚାକିରୀରେ ଥଇଥାନ କରିବା ନେଇ ଦାବି ହୋଇଥିଲା ।ଉପସ୍ଥିତ ପ୍ରଶାସନ ଅଧିକାରୀ ସମସ୍ତ ଦାବି ପୁରଣ ହେବ ବୋଲି କହିବା ସହ ବିନିକାରେ ଆଦର୍ଶ ବିଦ୍ୟାଳୟ ଖୋଲିଲେ ପତ୍ନୀକୁ ଚାକିରି ମିଳିବ ବୋଲି ଉପଜିଲ୍ଲାପାଳ ଲେଖି ଦେଇଥିଲେ ।ହେଲେ ଅତ୍ୟନ୍ତ ଦୁଃଖର ବିଷୟ ବିନିକାରେ ଗତ ୩ବର୍ଷ ହେଲା ଆଦର୍ଶ ବିଦ୍ୟାଳୟ ଖୋଲିଥିଲେ ହେଁ ଅଦ୍ୟାବଧି ଜୟନ୍ତୀକୁ ମିଳିନାହିଁ ଚାକିରି ।ଯାହା ଫଳରେ କି ବହୁ ଦୁଃଖକଷ୍ଟରେ ୩ଝିଅ ଗାୟତ୍ରୀ କର୍ଣ୍ଣ(୧୫),ଧରିତ୍ରୀ କର୍ଣ୍ଣ(୧୨),ଅନନ୍ୟା କର୍ଣ୍ଣ(୭)ଙ୍କ ସହ ସ୍ବାମୀ ପରିତକ୍ତା ଜୟନ୍ତୀ ଅଭାବ ଅସୁବିଧାକୁ ସହ୍ୟ କରି ଏବଂ ୩ଝିଅଙ୍କ ଭବିଷ୍ୟତ ଚିନ୍ତାରେ ଭାଙ୍ଗି ପଡିଛନ୍ତି। ଉକ୍ତ ସମସ୍ୟା ନେଇ ଜୟନ୍ତୀ ଗତ ୨୦୨୧ମସିହା ମାର୍ଚ୍ଚ ମାସରେ ପୂର୍ବତନ ମନ୍ତ୍ରୀ ତଥା ବୀରମହାରାଜପୁର ବିଧାୟକ ପଦ୍ମନାଭ ବେହେରାଙ୍କୁ ଭେଟିବାରୁ ଶ୍ରୀ ବେହେରା ତୁରନ୍ତ ଏହାର ସମାଧାନ ନେଇ ଜିଲ୍ଲାପାଳଙ୍କୁ ପତ୍ର ମାଧ୍ୟମରେ ଜଣାଇଛନ୍ତି ।ହେଲେ ତାହା ପ୍ରଶାସନିକ ସ୍ତରରେ ବର୍ତମାନ ପର୍ଯ୍ୟନ୍ତ କାର୍ଯ୍ୟକାରୀ ହୋଇପାରି ନାହିଁ । ସେହିପରି ଜୟନ୍ତୀ ଅନେକ ଥର ସ୍ଥାନୀୟ ବିନିକା ଗୋଷ୍ଟି ଶିକ୍ଷା ଅଧିକାରୀଙ୍କ କାର୍ଯ୍ୟାଳୟକୁ ଆସି ନିରାଶ ହେବା ପରେ ଜିଲ୍ଲା ଶିକ୍ଷା ଅଧିକାରୀ,ଉପ ଜିଲ୍ଲାପାଳ ଓ ପରେ ଜିଲ୍ଲାପାଳ ଅବୋଲି ସୁନୀଲ ନରୱନେଙ୍କୁ ଭେଟି ସମସ୍ୟା ବାବଦରେ ଗୁହାରି କରି ଆସୁଥିଲେ ମଧ୍ୟ ସୁଫଳ ପାଇପାରି ନାହାନ୍ତି ।ସୂଚନା ଯୋଗ୍ୟ ଯେ ଚାକିରି ବାବଦରେ  ତତ୍କାଳୀନ ଉପ ଜିଲ୍ଲାପାଳ ବଳରାମ ମଲ୍ଲିକ ଆଦର୍ଶ ବିଦ୍ୟାଳୟ ଖୋଲିବା ପରେ ଜୟନ୍ତୀକୁ ଅଗ୍ରାଧିକାର ଭିତ୍ତିରେ ଚାକିରି ମିଳିବ ବୋଲି କହିଥିବା ପ୍ରତିଶ୍ରୁତି କେବେ ପ୍ରତିଦଳିତ ହେବ ନା ପ୍ରତିଶ୍ରୁତିରେ ରହିଯିବ ତାହା ସମୟ ହିଁ କହିବ ।ଅନ୍ୟ ପକ୍ଷରେ ନିଜ ମୁଣ୍ଡରୁ ଚାପ ଦୂର କରିବା ପାଇଁ ବିନିକା ଏବିଇଓ ବସନ୍ତ ଭୋଇ ବିଧିବଦ୍ଧ ଭାବେ ଷଡ଼ଯନ୍ତ୍ର କରି ସ୍କୁଲରେ ଅଧ୍ୟୟନରତ ପ୍ରାୟ ୨୩୦ରୁ ଉର୍ଦ୍ଧ ଛାତ୍ରଛାତ୍ରୀଙ୍କ ମଧ୍ୟାହ୍ନ ଭୋଜନ ରାନ୍ଧିବା ପାଇଁ  ଶନିବାର ସ୍କୁଲକୁ ଡକାଇଥିଲେ ।ସ୍କୁଲର ଅଧ୍ୟକ୍ଷ ଦସ୍ତଖତ ଦେବା ପାଇଁ ଅନୁରୋଧ କରିଥିଲେ । ମାତ୍ର ଏତେ କମ ଟଙ୍କାରେ ପରିବାର ଚଲାଇବା ମସ୍କିଲ ଏବଂ ଗ୍ରାମ ଠାରୁ ଦୈନନ୍ଦିନ ୧୬କିମି ଯିବା ଆସିବା କରିବା ପରିବାର ପରିପୋଷଣ ବୋଝ ଉପରେ ନଳିତା ବିଡା ସଦୃଶ ହେବ ବୋଲି ଜୟନ୍ତୀ ପ୍ରକାଶ କରିଛନ୍ତି । ଅଧ୍ୟକ୍ଷ ସୌମ୍ୟ ରଂଜନ କ୍ଷେତିଙ୍କ ଠାରୁ ମିଳିଥିବା ସୂଚନା ଅନୁସାରେ ଉକ୍ତ ବିଦ୍ୟାଳୟରେ ନୂତନ ଭାବେ ୨ଜଣ ଡି ଗ୍ରେଡ କର୍ମଚାରୀ ପୋଷ୍ଟିଂ ପାଇ କାର୍ଯ୍ୟରେ ଯୋଗଦାନ କରିସାରି ଥିବା ବେଳେ ରାତ୍ର ଜଗୁଆଳି ପଦବୀ ପୂରଣ ହୋଇନଥିବା ପ୍ରକାଶ କରିଥିଲେ। ବିଶ୍ଵସ୍ଥ ସୂତ୍ରରୁ ଜଣାଯାଏ ଯେ କୁଆଡେ ବର୍ତମାନ ପାଇଁ ଉକ୍ତ ବିଦ୍ୟାଳୟରେ ଆବଶ୍ୟକ ଅନୁଯାଇ ଡି ଗ୍ରେଡ ପୋଷ୍ଟ ପୂରଣ ହୋଇଥିବା ବେଳେ ସ୍ବାମୀ ପରିତକ୍ତା ଜୟନ୍ତୀ ଓ ତା ପରିବାରର ଭବିଷ୍ୟତ ଜୀବନ ଅନିଶ୍ଚିତତା ଆଡ଼କୁ ଚାଲି ଯାଇଥିବା ସନ୍ଦେହ ସୃଷ୍ଟି କରିଛି । ତେବେ ଅସହାୟ ଜୟନ୍ତୀ ପରିବାର ଉପରେ ଜିଲ୍ଲା ପ୍ରଶାସନ ଓ ବ୍ଲକ ଶିକ୍ଷା ବିଭାଗ କର୍ତ୍ତୁପକ୍ଷଙ୍କ ଆଶୀର୍ବାଦ କେବେ ପଡ଼ିବ,ତତ୍କାଳୀନ ଉପ ଜିଲ୍ଲାପାଳଙ୍କ ଲେଖା କେବେ କାର୍ଯ୍ୟକାରୀ ହେବ ନା ଜୟନ୍ତୀକୁ ପୁଣି ବର୍ଷ ବର୍ଷ ଧରି ଅପେକ୍ଷା କରିବାକୁ ପଡ଼ିବ ତାହା ଦେଖିବାକୁ ବାକି ରହିଲା ।