13-Jul-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ)  ଇତିମଧ୍ୟରେ ରାଜ୍ୟ ମନ୍ତ୍ରୀମଣ୍ଡଳର ପରିବର୍ତ୍ତନ ହୋଇ ବୌଦ୍ଧର ବରିଷ୍ଠ ବିଧାୟକ ପ୍ରଦୀପ ଅମାତ ଜଙ୍ଗଲମନ୍ତ୍ରୀ ହେବା ପରେ ଆଶା କରାଯାଉଥିଲା ଯେ ପଡୋଶୀ ଅତିକମ୍ ରେ ପଡୋଶୀ ସୁବର୍ଣ୍ଣପୁର ଓ ବଲାଙ୍ଗୀର ଜିଲ୍ଲାର ବନବିଭାଗ ଉପରେ ଉଠୁଥିବା ଜନଅସନ୍ତୋଷ ଓ ଅଭିଯୋଗର ତଦନ୍ତ ହୋଇ ସରକାରଙ୍କ  ପକ୍ଷରୁ ଉପଯୁକ୍ତ ପଦକ୍ଷେପ ନିଆଯିବ । କିନ୍ତୁ ଅଦ୍ୟାବଧି ତାହାର ସଂକେତ ମିଳିନାହିଁ  !

ବଲାଙ୍ଗୀର ଡିଭିଜନ ଓ ସୋନପୁର ଡିଭିଜନର ଦାୟିତ୍ୱରେ ରହିଛନ୍ତି ଜଣେ ଆଇ ଏଫ ଏସ୍ ନୀତିଶ କୁମାର । ଜଣେ ସର୍ବଭାରତୀୟ ସ୍ତରୀୟ ଅଧିକାରୀଙ୍କ ଠାରୁ ପୂର୍ବାପେକ୍ଷା ଅଧିକ ସ୍ବଚ୍ଛତା , ସୁପରିଚାଳନା ଓ ଦକ୍ଷତା ଆଶା କରାଯାଉଥିବା ବେଳେ ଏଠାରେ ବହୁ ଅଭିଯୋଗ ଓ ଚର୍ଚ୍ଚା ଏହି ଦୁଇ ଡିଭିଜନରେ ଉଠିଛି ।
 ବନୀକରଣ, କାମ୍ପା, ଏଭେନ୍ୟୁ ପ୍ଲାଣ୍ଟେସନ , ମନରେଗା , ଆମ ଜଙ୍ଗଲ ଯୋଜନା, ବନ୍ୟ ପ୍ରାଣୀ ସୁରକ୍ଷାଠାରୁ ଜଙ୍ଗଲଧ୍ବଂସର କାରଣ ଗଛକଟା ଇତ୍ୟାଦି ସହ ଜଙ୍ଗଲ ବିଭାଗ ଅଧୀନରେ ଥିବା ଖଣିଜଦ୍ରବ୍ୟର ଚୋରାଚାଲାଣ ଇତ୍ୟାଦି ବିଭିନ୍ନ ସମୟରେ ଗଣମାଧ୍ୟମରେ ପ୍ରକାଶ ପାଇ ସରକାର ତଥା ଲୋକଲୋଚନକୁ ଆସିଛି । ଲୋଇସିଂହା ଅଞ୍ଚଳରେ ଖଣିଜପଦାର୍ଥ ଉପରେ ମାଫିଆଙ୍କର ଲୋଲୁପଦୃଷ୍ଟି ପଡିଥିବା ଘଟଣା ସହିତ ପୂର୍ବ ମାମଲାର ତଦନ୍ତରେ ଅଗ୍ରଗତିରେ ଅହେତୁକ କାଳକ୍ଷେପଣ ହେଉ ବା ହାତୀମୃତ୍ୟୁ ଘଟଣା , ଗୁଲମୀ ନିକଟସ୍ଥ ପାହାଡରେ  ମାଫିଆଙ୍କ ସହ ବିଭାଗୀୟ କର୍ମଚାରୀଙ୍କ ସଲାସୁତୁରାରେ ରତ୍ନପଥର ଚୋରାଖୋଳା ବେଳେ ଆଦିବାସୀ ମଜୁରିଆଙ୍କ ମୃତ୍ୟୁଘଟଣା ହେଉ ବା  ଲାଠୋର ରେଞ୍ଜ୍ ର ଭାଲୁକନା ଏବଂ କଣ୍ଟାବାଞ୍ଜି ରେଞ୍ଜ୍ ର ତୁଲଣ୍ଡି ଚାରାରୋପଣ କାମର ଶ୍ରମିକଙ୍କ ମଜୁରୀ ହଡପ ଅଭିଯୋଗ ହେବାରୁ ରେଞ୍ଜରଙ୍କ ସାମ୍ବାଦିକଙ୍କୁ ଟଙ୍କା ଯାଚୁଥିବା ଭାଇରାଲ୍ ଭିଡିଓ ଘଟଣା ହେଉ , ପାଟଣାଗଡ ରେଞ୍ଜ ର ଲରମ୍ଭା ସେକ୍ ସନ୍ ର ଦୁଇଜଣ ଫରେଷ୍ଟର ଓ ଫରେଷ୍ଟଗାର୍ଡ ଟ୍ରାକ୍ଟର ଛାଡିବାକୁ ଲାଞ୍ଚ ନେଇ ନିଲମ୍ବିତ ଘଟଣା ହେଉ ବା ବଲାଙ୍ଗୀର ସହରରେ ଜିଲ୍ଲାପାଲଙ୍କ ବାସଭବନ ସଂଲଗ୍ନ ଆର୍ ଡି  ଅଧୀକ୍ଷଣ ଯନ୍ତ୍ରୀଙ୍କ ଅଫିସ୍ ର କାର୍ଯ୍ୟାଳୟ ପରିସରରେ ସଦ୍ୟ ମୂଲ୍ୟବାନ ଗଛ ସମେତ ବହୁଗଛର ବେଆଇନ ଗଛକଟା ଘଟଣାକୁ ଚପାଇଦେବାର ଅପଚେଷ୍ଟା ହେଉ ; ସବୁଠି କେଳେଙ୍କାରୀର ଅଭିଯୋଗ ପ୍ରକାଶ ପାଇ ଆସୁଛି । ଖୋଦ୍ ଡିଏଫ ଓ ' ଗଛ କାଟିବାରେ କୌଣସି ଅନୁମତିର ଆବଶ୍ୟକତା ନାହିଁ । ଗଛ ଉଠାଇବାକୁ ସେମାନେ ଅନୁମତି ଆବେଦନ କରିଛନ୍ତି ' ବୋଲି ସଫେଇ ଦେଇଥିବା ଗଣମାଧ୍ୟମରେ ପ୍ରକାଶ ପାଇଥିଲା । ଏଣୁ ଏଭଳି ହାସ୍ୟାସ୍ପଦ ଯୁକ୍ତିର  ନୀତିକୁ ସରକାର ଆଉଥରେ ତର୍ଜମା କରିବା ଆବଶ୍ୟକ ।

ସଂପ୍ରତି ଫରେଷ୍ଟଗାର୍ଡଙ୍କ ବଦଳିରେ ଦୁର୍ନୀତିର ଗନ୍ଧ । ପ୍ରଥମ ଦଫାରେ ୪୦ ଜଣଙ୍କର ବଦଳି ତାଲିକା ବାହାରିଥିଲା । ପୁଣି ବ୍ୟାକ୍ ଡେଟ୍ ରେ    ଜୁନ୍ ୧୫ ତାରିଖ ପରେ ଡିଏଫ ଓ ଦିଲ୍ଲୀ ଯାଇଥିବା ବେଳେ ସମ୍ଭବତଃ ତାଙ୍କ ସହମମତିରେ ପୁଣି ଏକ ୨୦ ଜଣିଆ ବଦଳିତାଲିକାରେ କିଛିଲୋକଙ୍କ ବଦଳି ବାତିଲ କରାଯାଇ ପୂର୍ବସ୍ଥାନରେ ରଖାଗଲା ଓ ପୁଣି ଏଭଳି ଏପଟସେପଟ କରାଯାଇଥିବା ଜଣାଯାଇଛି । ଏଥିରେ ଜଣପିଛା ୩୦ ହଜାର ଟଙ୍କା ଲେଖାଏଁ ଉତ୍କୋଚ ନିଆ ଯାଇଥିବା ବିଭାଗୀୟ ଚର୍ଚ୍ଚା ହେଉଛି । 

ଏଣୁ ବଲାଙ୍ଗୀର ଓ ସୋନପୁର ବନବିଭାଗର ଦୁଇଟି ଡିଭିଜନର କାର୍ଯ୍ୟକଳାପ ପ୍ରତି ବିଭାଗୀୟ ମନ୍ତ୍ରୀ ଦୃଷ୍ଟିଦେବାକୁ ଲୋକେ ଦାବି କରିଛନ୍ତି ।