30-Jun-2022

ବରଗଡ:-ଆଜି ପୂର୍ବାହ୍ନ ସମୟରେ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥା ସମ୍ମିଳନୀ କକ୍ଷରେ ଦିଶା ର ବୈଠକ ମାନ୍ୟବର ଲୋକସଭା ସଦସ୍ୟ ଶ୍ରୀମାନ ସୁରେଶ ପୂଜାରୀ ଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି। ଉକ୍ତ ବୈଠକରେ ଜିଲ୍ଲାପାଳ ବରଗଡ ଶ୍ରୀମତୀ ମୋନିଷା ବାନାର୍ଜୀ , ମାନ୍ୟବର ହସ୍ତତନ୍ତ ଓ ବୟନ ଶିଳ୍ପ ମନ୍ତ୍ରୀ ଶ୍ରୀମତୀ ରିତା ସାହୁ, ଜିଲ୍ଲା ପରିଷଦ ଅଧ୍ୟକ୍ଷା ଶ୍ରୀମତୀ ମାନିନୀ ଭୋଇ, ଚେୟାରମେନ ମ୍ୟୁନିସିପାଲଟି ବରଗଡ ଶ୍ରୀମତୀ କଳ୍ପନା ମାଝୀ, ଶ୍ରୀଯୁକ୍ତ ସୁନିଲ କୁମାର କେରକେଟା ଅତିରିକ୍ତ ଇ.ଓ ବରଗଡ଼, ବିଭିନ୍ନ ବିଭାଗ ର ଅଧିକାରୀ ଏବଂ ଗଣମାଧ୍ୟମ ପ୍ରତିନିଧି ମାନେ ଯୋଗଦାନ କରିଥିଲେ। ବୈଠକ ପ୍ରାରମ୍ଭରେ ପ୍ରକଳ୍ପ ନିର୍ଦ୍ଦେଶକ ଶ୍ରୀମାନ କୃତିବାସ ରାଉତ ଉପସ୍ଥିତ ସମସ୍ତ ଅଧିକାରୀ ମାନଙ୍କୁ ସ୍ୱାଗତ କରିଥିଲେ। ଜିଲ୍ଲାରେ ପ୍ରଧାନମନ୍ତ୍ରୀ ଆବାସ ଯୋଜନା, ଦିନଦୟାଲ ଯୋଜନା ଓ ଏନଆରଜିଏ କାର୍ଯ୍ୟର ଅଗ୍ରଗତି ସମ୍ପର୍କରେ ମାନ୍ୟବର ଲୋକସଭା ସଦସ୍ୟ ଶ୍ରୀମାନ ସୁରେଶ ପୂଜାରୀ ଉପସ୍ଥିତ ଅଧିକାରୀ ମାନଙ୍କ ସହିତ ଆଲୋଚନା କରିଥିଲେ। ଜିଲ୍ଲାରେ ଏକ ଖେଳ ପଡିଆ ଓ ପ୍ରତ୍ୟକ ଗ୍ରାମପଞ୍ଚାୟତ ରେ ଚିର୍ଲେନ ପାର୍କ ନିର୍ମାଣ କରାଯିବା ସମ୍ପର୍କରେ ଆଲୋଚନା କରାଯାଇଥିଲା । ମୃତ୍ତିକା ସଂରକ୍ଷଣ ବିଭାଗ ର କାର୍ଯ୍ୟ ସମିକ୍ଷା ବେଳେ ଜିଲ୍ଲାରେ ୭୩୦୩ ଟି କ୍ଷେତ ପୋଖରୀ ଖୋଳାଯିବା ନିମନ୍ତେ ଲକ୍ଷ୍ୟଧାର୍ଯ୍ୟ ରଖାଯାଇ ଥିବାବେଳେ ୩୮୮୪ ଟି ଚାଷୀ ଙ୍କୁ ଚିହ୍ନଟ କରାଯାଇଛି ଓ ଅବଶିଷ୍ଟ ୩୩୯୮ ଟି ଚାଷୀଙ୍କର କାର୍ଯ୍ୟ ଆରମ୍ଭ କରାଯାଇଛି। ଗ୍ରାମ୍ୟ ଉନ୍ନୟନ ବିଭାଗର କାର୍ଯ୍ୟା ସମିକ୍ଷାବେଳେ ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନାରେ ୩ୟ ପର୍ଯ୍ୟାୟରେ ବରଗଡ଼ ନିମନ୍ତେ ୨୮ଟି ଓ ପଦ୍ମପୁର ନିମନ୍ତେ ୨୦ଟି ରାସ୍ତା ନିର୍ମାଣ କରାଯିବା ପାଇଁ ଅନୁମୋଦନ ହୋଇଅଛି । ପରବର୍ତ୍ତୀ ସମୟରେ ଆରଡବ୍ୟୁଏସଏସ ବିଭାଗ ର କାର୍ଯ୍ୟ ସମିକ୍ଷା କରାଯାଇଥିଲା ।ଉଠା ଜଳସେଚନ ବିଭାଗର କାର୍ଯ୍ୟ ସମିକ୍ଷା ବେଳେ ଜିଲ୍ଲାରେ ୮୪୨୪ ଟି ପ୍ରୋଜେକ୍ଟରେ ବିଦ୍ୟୁତ ସଂଯୋଗ କରାଯିବା ନିମନ୍ତେ ଲକ୍ଷ୍ୟଧାର୍ଯ୍ୟ ରଖାଯାଇଥିବାବେଳେ,୬୭୮୨ଟି ପ୍ରୋଜେକ୍ଟରେ ବିଦ୍ୟୁତ ସଂଯୋଗ କରାଯାଇଛି ଓ ଅବଶିଷ୍ଟ ୬୨୪ଟି ପ୍ରୋଜେକ୍ଟରେ ଅଗଷ୍ଟ ୨୦୨୨ ସୁଦ୍ଧା ବିଦ୍ୟୁତ ସଂଯୋଗ କରାଯିବା ସମ୍ପର୍କରେ ଅଧିକାରୀ ମାନେ ମତପ୍ରକାଶ କରିଥିଲେ । ସ୍ୱାସ୍ଥ୍ୟ ବିଭାଗ ର କାର୍ଯ୍ୟ ସମିକ୍ଷାବେଳେ ଖାଲିଥିବା ଚିକିତ୍ସାଳୟ ମାନଙ୍କରେ ଡ଼ାକ୍ତର ନିଯୁକ୍ତି କରାଯିବା ନିମନ୍ତେ ଜିଲ୍ଲାପାଳ ଶ୍ରୀମତୀ ବାନାର୍ଜୀ ବରଗଡ ସିଡିଏମଓ ଙ୍କୁ ନିର୍ଦ୍ଦେଶ ପ୍ରଦାନ କରିଥିଲେ । ଜିଲ୍ଲାରେ କିଡନୀ ରୋଗ କାୟା ବିସ୍ତାର କରିବାରେ ଲାଗିଛି ।ଏହାର ପ୍ରତିକାର ନିମନ୍ତେ ମାନ୍ୟବର ସାଂସଦ ଶ୍ରୀମାନ ପୂଝାରୀ ସିଡିଏମଓ ଙ୍କୁ ନିର୍ଦ୍ଦେଶ ଦେଇଥିଲେ । ଏହାପରେ ସର୍ବଶିକ୍ଷା ଅଭିଯାନ ବିଭାଗ ଓ ଜିଲ୍ଲା ସମାଜ ମଙ୍ଗଳ ବିଭାଗର କାର୍ଯ୍ୟ ସମିକ୍ଷା କରାଯାଇଥିଲା ।ଯୋଗାଣ ବିଭାଗ ର କାର୍ଯ୍ୟ ସମିକ୍ଷାବେଳେ ଜାତୀୟ ଖାଦ୍ୟ ନିରାପତ୍ତା(ଅନ୍ତୋର୍ଦ୍ଦୟ)ଆଇନ ଦ୍ୱାରା ୩୫୩୨୮୯ ପରିବାର ଙ୍କୁ ୩୫ କିଲୋ ଚାଉଳ ଏକ ଟଙ୍କା ଦରରେ ଜୁଲାଇ ୨୨ ପର୍ଯ୍ୟନ୍ତ ଯୋଗାଇ ଦିଆଯିବ ବୋଲି ବିଭାଗୀୟ ଅଧିକାରୀ ପ୍ରକାଶ କରିଥିଲେ ।ଅର୍ଣ୍ଣପୂର୍ଣ୍ଣା ଯୋଜନା ରେ ମାଗଣାରେ ୧୦ କିଲୋ ଚାଉଳ ୧୨୧୪ଟି କାର୍ଡଧାରୀଙ୍କୁ ଯୋଗାଇ ଦିଆଯାଉଅଛି ।

ପିଏଚଏଚ ଯୋଜନା ରେ ଏକ ଟଙ୍କା ହିସାବରେ ୫ କିଲୋ ଚାଉଳ ଯୋଗାଇ ଦିଆଯାଉଛି । ପ୍ରଧାନମନ୍ତ୍ରୀ ଗ୍ରାମୀଣ କଲ୍ୟାଣ ଅନ୍ନ ଯୋଜନା ରେ(ଅନ୍ତୋର୍ଦ୍ଦୟ) ଜାତୀୟ ଖାଦ୍ୟ ସୁରକ୍ଷା କାର୍ଡଧାରୀଙ୍କୁ ୫ କିଲୋ ଚାଉଳ କିମ୍ୱା ଗହମ ମାଗଣା ରେ ଯୋଗାଇ ଦିଆଯାଉଛି ବୋଲି ଜିଲ୍ଲା ଯୋଗାଣ ଅଧିକାରୀ ପ୍ରକାଶ କରିଥିଲେ। ଶେଷରେ ଜିଲ୍ଲା ଗ୍ରାମ୍ୟ ଉନ୍ନୟନ ପ୍ରକଳ୍ପ ନିର୍ଦ୍ଦେଶକ ଶ୍ରୀଯୁକ୍ତ କୃତିବାସ ରାଉତ ଧନ୍ୟବାଦ ଅର୍ପଣ କରିଥିଲେ ବୋଲି ବରଗଡ ଜିଲ୍ଲା ସୂଚନା ଓ ଲୋକସମ୍ପର୍କ ବିଭାଗ ଅଧିକାରୀ ଶ୍ରୀମତୀ କଲ୍ୟାଣୀ ଦାଶ ସୂଚନା ପ୍ରଦାନ କରିଛନ୍ତି l