12-Jun-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ)  ବଲାଙ୍ଗୀର ଜିଲ୍ଲାର  ୫- ଟି ଯୋଜନାରେ ୧୦୦ଟି  ହାଇସ୍କୁଲ ଗୁଡିକର ରୂପାନ୍ତରକରଣର ଉଦଘାଟନ ସମାରୋହ ସ୍ଥାନୀୟ ପଥରଚେପା ବଲାଙ୍ଗୀର ସଦରବ୍ଲକ୍ ର ଓଡିଶା ଆଦର୍ଶ ବିଦ୍ୟାଳୟଠାରେ ମୁଖ୍ୟମନ୍ତ୍ରୀଙ୍କ ଦ୍ବାରା ଆଭାସୀ କାର୍ଯ୍ୟକ୍ରମ ଜରିଆରେ ଅନୁଷ୍ଠିତ ହୋଇଯାଇଛି । ଆଜିକାଲି ସରକାରଙ୍କର ଏଭଳି ଅଭିନବ ଢଙ୍ଗରେ ମୁଖ୍ୟମନ୍ତ୍ରୀଙ୍କ ଉଦଘାଟନ ପରି ଏହି ଅଭିନବ ସ୍ବତନ୍ତ୍ର ବିନା ଟେଣ୍ଡରର (ବଲାଙ୍ଗୀର ଜିଲ୍ଲାରେ ହେଉନଥିବା, ପଡୋଶୀ ବରଗଡ ଜିଲ୍ଲାରେ ଟେଣ୍ଡର ହେଉଥିବା ଶୁଣାଯାଇଛି)  କୋଟି କୋଟି ଟଙ୍କାର ବ୍ୟୟ ଅଟକଳ ଓ ବ୍ୟୟରେ ତରବରିଆଭାବେ କରାଯାଇଆସୁଥିବା ବିଭିନ୍ନ ଅନ୍ୟାନ୍ୟ ପାଣ୍ଠିର ସଂମିଶ୍ରଣରେ ତଥାକଥିତ ' ମୋ' ସ୍କୁଲ୍ ' ଯୋଜନାରେ ବ୍ୟାପକ ନିମ୍ନମାନର କାମ ଓ ରାଜନୈତିକ ଠିକାଦାରତୋଷଣ କରାଯାଇ ଆସୁଥିବା ମାଳ ମାଳ ଅଭିଯୋଗ ଗଣମାଧ୍ୟମରେ ପ୍ରକାଶ ପାଇ ଆସୁଥିଲେ ହେଁ ସଂଖ୍ୟାଗରିଷ୍ଠ ଶାସକଦଳ ବନାମ ସ୍ଥିତିଦୁର୍ବଳ ବିରୋଧୀଦଳମାନଙ୍କର ଫାଇଦା ନେଇ ସମ୍ପୂର୍ଣ୍ଣ ଅମଳାତାନ୍ତ୍ରିକ ନିୟନ୍ତ୍ରଣରେ ରହିଆସିଥିବା ରାଜ୍ୟ ସରକାର ଆଦୌ କର୍ଣ୍ଣପାତ କରୁ ନାହାଁନ୍ତି  !

ତେବେ ବିଭିନ୍ନ ଗଣମାଧ୍ୟମରେ ପ୍ରକାଶିତ ଘଟଣାବଳୀ ଓ ଲୋକଙ୍କର ଅଭିଯୋଗର ପ୍ରତିଫଳନ ଅନୁଯାୟୀ, ସ୍କୁଲ୍ ଗୁଡିକୁ ରଙ୍ଗବେରଙ୍ଗରେ ଚୂନଧଉଳାଯାଇ ଓ ଚିତ୍ରବିଚିତ୍ର କରି ଉପରଠାଉରିଆ ଚକମକ କରାଯାଉଥିବା ସହ ପୂର୍ବରୁ ଥିବା ମଜବୁତ ପିଲାଙ୍କର ଟେବୁଲ୍, ବେଞ୍ଚ୍ ଆଦି ଫର୍ଣ୍ଣିଚର ସ୍ଥାନରେ ପ୍ରାୟ ପାଞ୍ଚ / ଛ' ମାସରେ ଭାଙ୍ଗିଯିବାର ସମ୍ବାବନା ଥିବା ହା ଲ୍ କା ପ୍ଲାଏଉଡ୍ ଲଗା  ଉପକରଣ, ଡିଜିଟାଲ୍ ଶିକ୍ଷା ନିମନ୍ତେ କମ୍ପ୍ୟୁଟର ଆଦି ଉପକରଣ କିଣାଯାଇ  ବିନା ବିଦ୍ୟୁତ୍ ବା ଇଣ୍ଟରନେଟ୍ ନଥିବା ଅଞ୍ଚଳରେ ଲଗାଇବା ଆଦିରେ ବିପୁଳ ଖର୍ଚ୍ଚ କରାଯାଉଛି । ଯାହାକି ଅଦୂରଦର୍ଶିତାର ଜ୍ବଳନ୍ତ ଉଦାହରଣ । ଏହାକୁ ଚଳାଇବାରେ ଶିକ୍ଷକଙ୍କର ଅନଭିଜ୍ଞତା ମଧ୍ୟ ଏକ ସମସ୍ୟା ହୋଇ ଛିଡାହେବ । ସର୍ବୋପରି ବ୍ଲକ୍ ଅଧିକାରୀ, ଇଞ୍ଜିନିୟର ବା ରାଜନୈତିକ ସୁପାରିଶର ପାରମ୍ପରିକ ପେଟି ଠିକାଦାରଙ୍କ ପିସି କାରବାର ଅବ୍ୟାହତ ରହିଛି । ବଲାଙ୍ଗୀର ସଦରବ୍ଲକ୍ ରେ ଏଭଳି ଅଭିଯୋଗ ଆଜି ପ୍ରକାଶ ପାଇଥିଲାବେଳେ, ପାଟଣାଗଡ ବ୍ଲକ୍ ରେ ଜଣେ ଜେଇ ଏଭଳି ୫- ଟି ସ୍କୁଲ୍ କାମରେ ପିସି ନେଇ ନିମ୍ନମାନର କାମକୁ ବିରୋଧ କରିବାରୁ ତାଙ୍କୁ ଠିକାଦାରମାନେ ହତ୍ୟା କରିଥିବା ପରି ଗୁରୁତର ଅଭିଯୋଗ ମଧ୍ୟ ଉଠିଛି । ନିମ୍ନମାନର ସାମଗ୍ରୀ କିଣାଯାଇଥିବା ଅଭିଯୋଗ ପ୍ରକାଶ ପାଇଛି । ସବୁଠାରୁ ବଡକଥାହେଲା, ସ୍କୁଲ୍ ଗୁଡିକରେ ଆବଶ୍ୟକସଂଖ୍ୟକ ଶିକ୍ଷକ ଅଭାବ ଦୀର୍ଘଦିନ ଧରି ମୁଖ୍ୟ ସମସ୍ୟା ହୋଇ ରହିଛି । ଏହାଛଡା ଏସବୁ ସ୍କୁଲ୍ ରେ ଶିକ୍ଷାର ଗୁଣାତ୍ମକମାନବୃଦ୍ଧି ଏକ ଚିରନ୍ତନ ସମସ୍ୟା । ଏଣୁ ହଠାତ୍ ଏଭଳି ଶୀତତାପ ନିୟନ୍ତ୍ରିତ କୋଠରୀରେ ବସି ଉଚ୍ଚ ଅମଲାତାନ୍ତ୍ରିକ ଉର୍ବର ମସ୍ତିଷ୍କର ଉଦ୍ ଭୂତ  ଯୋଜନା ଓ  ଯୁଦ୍ଧକାଳୀନ ଭିତ୍ତିରେ ଏହାର ଆଧୁନିକୀକରଣର ଉଦ୍ଦେଶ୍ୟର ଅନ୍ୟ କୌଣସି ପ୍ରଚ୍ଛନ୍ନ ରାଜନୈତିକ ଉଦ୍ଦେଶ୍ୟ ଥାଉ ନଥାଉ, ଏତଦ୍ଦ୍ବାରା ଯେ ପ୍ରକୃତରେ ଶିକ୍ଷାର ଉନ୍ନତି ହେବନାହିଁ, ଲୋକେ ଏଭଳି ସମାଲୋଚନା କରିଛନ୍ତି ।