08-Jun-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ)  ବଲାଙ୍ଗୀର ଜିଲ୍ଲାର ବିଭିନ୍ନ ଅଭ୍ୟନ୍ତର ଅଞ୍ଚଳ ଓ ବନାଞ୍ଚଳର ଝରଣା , ନଦୀଆଦିରୁ ବର୍ଷ ବର୍ଷ ଧରି ଦିନରାତି ଟ୍ରାକ୍ଟର ଓ ଅନ୍ୟାନ୍ୟ ଯାନବାହନ ଦ୍ବାରା ଧଳାହୀରା ବନାମ ବାଲିର ଚୋରାଚାଲାଣ ଅବ୍ୟାହତ ରହିଛି । ଗତକାଲି ପାଟଣାଗଡ ନିକଟସ୍ଥ ଏକ ଋତୁକାଳୀନ ବର୍ଷାଦିନିଆ ଶୁଖିଲା ନଦୀରୁ  ପାଟଣାଗଡ ତହସିଲଦାରଙ୍କ ପକ୍ଷରୁ ବାଲି ଚୋରାଚାଲାଣ କରୁଥିବା ୪ ଟି ଟ୍ରାକ୍ଟରକୁ ଜବତ କରାଯାଇ ଲକ୍ଷେ ଟଙ୍କା ଜରିମାନା ଆଦାୟ କରାଯାଇଛି ।  ଆଗରୋ ମଧ୍ୟ ରାମପୁର ନିକଟସ୍ଥ ସୁବର୍ଣ୍ଣରେଖା ଶଯ୍ୟାରୁ ଲୋକଙ୍କ ଅଭିଯୋଗ କ୍ରମେ ବାଲି ଚୋରି କରୁଥିବା ଜଣେ ଠିକାଦାରଙ୍କ ଜେସିବି ଧରାପଡିଥିଲା । ଯାହାକୁ ତହସିଲଦାର ଦଫାରଫା କରି ଛାଡିଦେଇଥିବା ପ୍ରକାଶ ପାଇଥିଲା । ତେବେ କେବଳ ଏହି ଅଞ୍ଚଳରୁ ନୁହେଁ , ସାରା ଜିଲ୍ଲାରେ ଏଭଳି ଚୋରାଚାଲାଣ ଅବ୍ୟାହତ ରହିଛି ଓ ତହସିଲଦାରଙ୍କ ଚଢାଉରେ ଧରପଗଡ ଚାଲିଥିଲେ ହେଁ , ଏହା ଯଥେଷ୍ଟ ନୁହେଁ ।

ବିଶେଷକରି ଖପ୍ରାଖୋଲ , ବେଲପଡା ଓ ଲାଠୋର ଅଞ୍ଚଳର ସଂରକ୍ଷିତ ଜଙ୍ଗଲରୁ ବର୍ଷ ବର୍ଷ ଧରି ଦିନରାତି ନିୟମିତ ବାଲିର ଚୋରାଚାଲାଣ ଚାଲିଛି । ଲାଠୋର ରେଞ୍ଜ ଅନ୍ତର୍ଗତ ବେନ୍ଦେର , ଧାମନଡଙ୍ଗା , ଭରୁଆମୁଣ୍ଡା ଓ ଅନ୍ୟାନ୍ୟ ବନାଞ୍ଚଳର ଶୁଖିଲା ନାଳା , ଝରଣା ଓ ଛୋଟ ଛୋଟ ଶୁଷ୍କନଦୀଶଯ୍ୟାରୁ  ଶହଶହ ଟ୍ରାକ୍ଟର ବାଲି ଉତ୍ତୋଳନ , ଚୋରି ଓ ଚୋରାଚାଲାଣ ଚାଲିଛି । ଏହା ବିଭାଗୀୟ ଅଧିକାରୀ ଓ କର୍ମଚାରୀଙ୍କ ଜ୍ଞାତସାରରେ ଚାଲୁଥିବା ଓ ଏଥରୁ ବିପୁଳ ବଟି ଆଦାୟ ହେଉଥିବା କେତେକ ବିଭାଗୀୟ କର୍ମଚାରୀ ନାମ ପ୍ରକାଶ କରିବାକୁ ମନାକରି ସୂଚନା ଦେଇଛନ୍ତି । ଏପରିକି ପ୍ରାୟ ପ୍ରତିମାସର ବଟିରୁ ଉପରର ଅଧିକାରୀଙ୍କ ଅଂଶ ରହୁଥିବା ଅଭିଯୋଗ ଚର୍ଚ୍ଚାରେ ରହିଛି । ଏଣୁ ଏଥିପ୍ରତି ଏକ ଉଚ୍ଚସ୍ତରୀୟ ଭିଜିଲାନ୍ସ ଟିମ୍ ଗଠନ କରାଯାଇ ଅଚାନକ ଚଢାଉର ଆବଶ୍ୟକତା ରହିଥିବା କୁହାଯାଇଛି ।